Pathau mikva saong taong abih gauk! Piah daong urang nông thau dom ilamu khoa học kỹ thuật, hu mesraiy phun jien saong kuhria mboh bruk darak pasar, padang jalan ngak mbang, pala drak, pablei salih patagok jien mek tame. Kapul urang nông tỉnh Ninh Thuận pambuak bruk saong mban điều phối dự án daong tam nông tỉnh hu padang dự án “kapul urang nông hu hatai takre yau gauk”. Jaik dua thun ini mai, tỉnh padang hu labaih 300 kapul, dalam nan hu dom gah yau: pala drak, raong glang, ngak mbang pablei salih… daong yaok ribau urang nông patagok labik dang di drei, salih barau rai diuk. Thúy Linh – urang vak di rayo sap ndom VN daok di ban raya HCM brei thau ka kein lagaih tuk camereip di bruk ngak ini di bhum urang Chăm tỉnh Ninh Thuận, daa mikva saong taong abih gauk tui pang:

Huyện Ninh Phước hu 3 xã tame ngak dự án ini, lac Phước Vinh, Phước Thái saong An Hải, ngan saong 27 kapul urang nông. Urang hu mbaok tame kapul ralo meng lac dom baoh sang urang nông kan kathaot, baoh sang jaik si kan kathaot, lao động kamei… Dom kapul urang nông hu padang dom tổ yau: tổ raong limo, pabe, pabo; tổ pala drak, tổ pablei salih, pambuak gauk pala drak. Dom baoh sang hu tame dự án langiu bruk hum ban khik iek dự án tam nông tỉnh Ninh Thuận daong phun jien, pajaih phun pala, athur raong, vật liệu dây dựng daok hu tacei pato ilamu raong glang, pala drak; padang jalan sản xuất, raong glang. Sang saai Mang Thị Quýnh daok di palei Liên Sơn, xã Phước Vinh, huyện Ninh Phước biak kan kandah, glaih glar. Saai hu 3 urang anek, min kinh tế tok pagam pambak tame bruk ngak pah saong dual khak athur. Mboh rai diuk kan kandah di sang saai Quýnh, urang dang akaok palei Liên Sơn 2, xã Phước Vinh hub a saai tame kapul raong limo bò Hifer di Dự án kapul urang nông hu hatai takre yau gauk di xã saong hu daong 2 drei limo binai menek. Meng harei taduan hu limo mai raong, saai iek glang biak tani tanat meng bruk raong palao, brei mbang tal klauk jru pacang cakak jit ruak. Nan ye, 2 drei limo di sang saai praong samar. Saai Quýnh chreih chrai lac:

“Karja, Đảng sangka brei sa yau limo, drei biak sambai. Sang drei jeng kham merat ngak, iek glang siam, brei mbang trei piah cadu glaih glar, patagok jang”.

Jeng yau baoh sang saai Mang Thị Quýnh, 10 baoh sang kan kathaot,  jaik si kan kathaot bhap bini Raglai daok di palei Tà Dương, xã Phước Thái, huyện Ninh Phước jeng chreih chrai tuk hu tame kapul dự án raong limo Hifer kayua mban điều phối dự án tam nông tỉnh Ninh Thuận daong. Langiu bruk daong dua drei limo binai menek, dom baoh sang kan kathaot daok hu pasram megru ilamu raong, jalan iek glang limo menek yau habar ka nyu hu kein laba. Meng nan, dom baoh sang kan kathaot, jaik si kan kathaot labik ini hu jalan patagok bruk raong glang, dak harei dak salih barau rai diuk. Saai Chamalé Thọ - akaok palei Tà Dương, xã Phước Thái, huyện Ninh Phước, tỉnh Ninh Thuận brei thau: 

 “Meng tuk tame dự án raong limo Hifer di Tam nông, ka sa nan lac hu pasram megru ilamu, jalan khik mepiah pandap mbang meng phế phẩm ngak nông yau pon; ka dua nan lac jalan iek glang limo, klauk jru yau habar; ka klau tra nan lac dự án hu daong ka mikva 2 drei limo binai piah salih barau rai diuk, abih di nyu nan lac baoh sang kan kathaot. Baoh sang kan kathaot urak ini biak kan kandah, urak ini meng hu raong limo, salih barau hu rai diuk”.    

 Saai Thọ Trường Khoa – akaok kapul urang nông xã Phước, huyện Ninh Phước brei thau gilac:

          Sap Chăm

Urak ini, dalam tỉnh Ninh Thuận padang hu 300 kapul urang nônghu hatai takre yau gauk, ngak bruk  dalam ralo gah pambuak saong dom chuỗi giá trị, dalam nan hu 96 kapul urang nông mek hu labaih 4 tanut ka ngak mbang pablei salih pambuak saong darak pasar. 196 kapul ngak bruk raong glang saong pala drak. Urak ini, dom kapul daok khik kajap  bruk ngak hu kein laba . Ndom ka jalaan ngak di anak tal, ong Châu Văn Kỳ, akaok kapul urang nông tỉnh Ninh Thuận brei thau, tui jalan ngak, tỉnh Ninh Thuận daok kuhria tamat dự án. Tui nan, kapul urang nông tỉnh hu pasang iek, pasiam veik veik 108 kapul, ưu tiên dahlau ka dom kapul hu taduan phun jien meng dự án tam nông; khik kajap bruk ngak, paglaong akaok saneng, patagok pren khang di kapul, khik kajap hu 4 kadha nan lac: bruk sản xuất hong gauk; padang bruk sản xuất pablei salih; bruk khik ramik jien padai; pambuak drak pasar… abih di nyu nan lac, brei patagok labik dang di dom kapul hu hatai takre ini, nan lac paglaong trách nhiệm di urang nông saong urang nông, ini jeng lac sa dalam dom hạn chế di kapul dalam tukvak tapa. Ong Kỳ khan lac:

“Dalam tukvak tal, kapul urang nông daok pok panuac tagok mban khik iek dự án likau buh phun jien piah peih bruk pasram megru ka dom giảng viên, piah urang hu ilamu langiu ilamu di rup pabhap ye urang hu kỹ năng pato veik ka urang nông. Hu yau nan, bruk ngak di kapul kol drei meng hu kein laba dalam tukvak tal”.

Oh lac ba mai kein laba tapak ka puk palei, dom dự án kapul urang nông hu hatai takre yau gauk kayua kapul urang nông tỉnh pambuak saong mban điều phối dự án tam nông tỉnh Ninh Thuận peih ngak hu rik daong pakhang năng lực di kapul tuk peih ngak dom mô hình tổ; kapul, daong ka urang brei mboh labik dang di drei dalam bruk patagok kinh tế - XH di puk palei, di bhap bini./.