Dalam baoh sang hu 3 rai daok haong gauk, yaom lac ganik ganong min ong Bá Bình Lợi urang Cam daok pak palei Mblang Kacak Phước Đồng, xã Phước Hậu, huyện Ninh Phước, tỉnh Ninh Thuận jeng hu caik sa labik siam piah tuan thaot Wa. Ndom biai haong khaol dahlak, ong Lợi brei thau, anek manuac drei diuk rai njauk hu dahlau hu hadei, “mbang baoh njauk hadhar tal urang pala phun”. Khaol drei hu rai diuk yau harei ini nan lac hu Đảng, hu Wa Ho, nan ye khaol drei njauk iek praong dom kadha Wa ndom, dom bruk Wa ngak. Bac megru ngak tui Wa oh njauk lac bac tui harak tapuk bo lac tui bruk di anak meta, meng bruk ngak di drei. Ong pagap yau: dom phong trào, dom bruk jak ba kayua karja palei ba tabiak ye drei njauk ba akaok nao dahlau, njauk ngak dahlau meng nan meng jak ba anek taco drei ngak tui. Dalam bruk ba gauk padang ngak palei pala bahrau di puk palei, ong Lợi hu pok brei jaik 1000m² taneh saong jak ba mikva, gauk gar hu jaik 100 triệu đồng piah ngak jalan nao mai dalam palei. Taphia di nan ong daok kham merat ba ilamu khoa học kỹ thuật bahrau tame bruk ngak mbang pala drak, salih janih phun pala ka nyu njauk haong taneh riya saong langik tasik di puk palei. Meng jaik 2ha padai pajaih saong 5.000m² medar cao sản, yaok thun sang ong mek tame hu labaih 100 triệu đồng. Oh lac ngak meda ka sang drei, ong Lợi daok jak ba saong pato tacei ilamu kỹ thuật ngak padai pajaih saong medar cao sản ka mikva dalam palei. Ong Lợi brei thau: Tapa bac megru saong ngak tui jalan di Wa ye bhian mboh Wa trun mai haong urang nong, daong urang nong tacoh haluk, bloh pala drak… sa urang vĩ đại yau nan, sa lãnh tụ yau nan bo tuk halei jeng daong ka bhap bani ye drei daok pak ini daong ka sang drei, puk palei drei, mikva drei habar drei oh ngak hu bruk nan. Mai meng nan bo dahlak hu nde halei daong nde nan. Ngak habar ka mikva drei thau pandar ilamu khoa học kỹ thuật tame dalam mblang hamu, ngak hu ralo padai, pala hu ralo phun, raong hu ralo anek saong duah hu ralo jien.

Jang yau ong Bá Bình Lợi urang Cam pak Ninh Thuận, Taha akaok palei Điểu Lên urang S’tiêng daok pak sóc Bom Bo, xã Bình Minh, huyện Bù Đăng, tỉnh Bình Phước jeng lac urang hu ralo ilamu dalam bruk cakrok patagok kinh tế baoh sang. Meng hatai takre bac megru ilamu khoa học kỹ thuật bahrau, ong khang hatai buh jien tame ngak, salih phun pala, patagok dom janih phun pala, athur raong ba mai yaom kinh tế glaong yau phun pa-aok bleit, amariak kalu, cao su pambuak haong raong pabui piah patagok jien mek tame ka baoh sang. Taphia di nan daok jak ba mikva dalam palei nao bac megru ilamu ngak nong kayua Kapul urang nong peih tabiak saong salih jalan ngak mbang oh daok sa  labik tapa định canh định cư, oh daok jah tak glai piah ngak apuh. Nan ye, oh ta-eng hagait sang ong dak harei dak kaya meda bo ralo sang dalam palei ong jeng tabiak truh kan kathaot saong hu labaih drap ar. Pak sóc Bom Bo labik ong daok, hu ralo salih bahrau, hu labaih 60 baoh sang kaya meda, hu ralo baoh sang hu jien mek tame yaok thun labaih 200 triệu đồng.

Dalam angan lac taha palei, urang hu angan je dalam bhap bani urang bangsa takik, ong Điểu Lên gam haong dom urang hu angan je dalam xã pambuak haong karja palei, mặt trận negar palei peih ralo bruk pathau khan, jak ba mikva dak padang rai diuk ilamo dalam bruk lakhah caga, ndam metai saong lễ hội; jak ba mikva dak padang saong khik ramik yaom glaong ilamo meng kan di bangsa drei yau padang kapul daoh tamia, cồng chiêng… Dalam dom mbang sinh hoạt bhap bini, dom van ndom biai haong anek kamuan dam dara dalam palei, Taha palei Điểu Lên tuk halei jeng khan brei thau dom dalikan ndom ka hatung hatian di Wa Ho brei ka urang bangsa takik saong jak ba mikva bac megru ngak tui Wa piah brei mboh hatung hatian di drei brei ka Wa Ho. Saong jeng yau dom bangsa adei sa-ai karei angaok mblang taneh hình chữ S, dalam dom harei bilan 5 ini bhap bani bangsa S’tiêng pak Sóc Bom Bo daok drut drui hadar tal harei menek di Wa. Taha palei Điểu Lên khan lac: Hadhal tal Wa njauk bac megru saong ngak tui Wa, urang jakar, urang nong, taha meda njauk bac abih. Đạo đức di Wa Ho ralo lô, prong lô, khaol drei oh kanar abih, min khaol drei tuk halei jeng hadhal tal sa kadha nan lac Wa biak sangka tal rai diuk bhap bani urang bangsa takik, abih di nyu lac bruk khik ramik saong patagok yaom glaong ilamo meng kan di bangsa. Đảng saong Karja biak sangka nan ye rai diuk di mikva drei hu siam jang dahlau. Kayua yau nan ye drei brei thau gul pataom gauk, khik kajap an ninh quốc phòng, sa hatung hatian haong gauk piah dak padang saong khik ramik ilamo meng kan di urang S’tiêng drei.

Dom manuac urang haong dom bruk ngak biak siam yau ong Bá Bình Lợi urang Cam pak Ninh Thuận saong ong Điểu Lên urang S’tiêng pak Bình Phước nan lac dom baoh bingu mekre piah pok tagok Wa dalam tuk pahdar 125 thun harei menek di Wa Ho./.