Katơr Thị Xính – urang khik sử thi Raglai

Baok sang di amuk Katơr Thị Xính daok sa drei taphia jalan tame palei Ma Ty. Pandap glaong yaom abih lac baoh tu klak, angaok lac dom harak meyaom ka dom rik daong di amuk dalam bruk khik ilimo bangsa Raglai. Dalam bilan 12 ini amuk meda tabiak Hà Nội piah hu mbaok di harei pok meyaom urang hu angan je, nhân sỹ trí thức saong doanh nhân hadah trah bangsa takik hu Ủy ban bangsa pok angan. 

Amuk Katơr Thị Xính thun ini labaih 60 thun, min sap daoh jeng daok lai li-an. Amuk Sính meda lac sa dalam takik urang daok hadar kanal sử thi di bangsa drei. Hu thau amuk megru meng daok sit, ndom lac bac min biak di nyu hu pato meng pabah, takre blaoh mboh lac oh kurang hu dom kadha daoh sử thi. Ngan saong amuk Xính, sử thi yau suan yava,  tuk bui sambai atau duh hatai, amuk jeng daoh.

Dalam hatai jai amuk Sính saong rilo urang Raglai, sử thi di bangsa ini biak rilo, biak kheih. Hu biak rilo asal kadha, ndom ka raidiuk, ka anek menuac, ka bruk meyut meyau saong hatai caong di urang Raglai. Meda ndom tal dom sử thi hu angan yau:  Sa-er, akha juka atau Uđai. Amuk Xính khan lac: daoh sử thi daoh saoh oh ginup, njauk thau asal kadha panuac daoh meng ginup, yau nan ye tuk pato, takik hu menuac thau hu suan yava di sử thi. 

-Urak ini, pak palei Ma Ty ini meda lac tok hu saai Pinăng Thị Hương, akaok kapul Liên hiệp urang kumei xã Phước Tân, lac anek saih gheih abih di nghệ nhân Katơr Thị Xính. Tui saai Hương, njauk takre meng thau hu saong tuk thau blaoh meng mboh hu hatai jai urang Raglai tapa sử thi. Takre saong abih hatai khik ilimo bangsa drei, amuk Sính oh huac glaih glan. Di riya roya atau bruk halei di xã, di huyện, amuk jeng hu mbaok tame daoh, yaom lac oh hu jien. Hu dom mbang pato dui atah tal meteh thun, amuk tok hu daong labaih 1 triệu đồng.

Dom gah chức năng jeng mboh hu bruk ini, min kayua kurang jien atau hu jien min biak takik yau nan ye oh thau langyah yau habal. Cei gru Trần Thanh Nam, sang bac tiểu học Phước Tân A, brei thau, dahlau thiah sang bac jeng hu daa amuk Xính mai pato ka kalup kapul dalam sang bac, min piah khik dom kalup kapul yau nan biak kan bo makna praong jeng lac kayua kurang jien. Karja xã Phước Tân jeng hu daong ka nghệ nhân Katơr Thị Xính, min bruk daong nan oh hadom, yau nan ye nghệ nhân  ini jeng daok glaih glan haong bruk duah jien piah diuk rai.

Saai Pinăng Thị Hương, Anek saih di nghệ nhân Katơr Thị Xính, thau hu bruk kheih bruk siam di sử thi Raglai, yau nan ye duh hatai jeng. Tui saai, njauk hu chế độ đãi ngộ njauk ka nghệ nhân Katơr Thị Xính jeng ye dom nghệ nhân karei. Meyah oh ngak hu, sử thi Raglai sa harei oh lac bruk mengkan.

Thúy Linh