Pathau mikva saong taong abih gauk! Bilan pandiak thun ini, bhap bini palei H’ra Ea H’ning, xã Đ’rai B’hăng, huyện Chư Quynh, tỉnh Đắc Lắc oh daok huac kurang ia pandar. Hu yau nan meng hu “bể ia bhap bini” kayua Huyện đoàn Chư Quynh padang ngak di xã. Pren yava di dam dara hu daong ka mikva yam tapa dom bilan pandiak thu kan kandah. H Xíu, urang vak di rayo sap ndom VN daok di Tây Nguyên hu kadha vak brei thau ka bruk ini. Da-a mikva saong taong abih gauk tui pang:

Yaok harei, nao puh mai, sa-ai H Lăm H Mok (bhian ieu lac amí Manh) daok di palei H’ra Êa H’ning tabiak bể ia bhap bini piah mek ia mai menyum. Sa-ai brei thau, bilan ini lingik pandiak, sang menyum ia rilo jang nan ye yaok harei nao mek ia 2 mbang.

Ia bak dalam bể, nan ye H Lăm samar mek ia tame bak dom klaok, bloh menei ia raco kaok pak di mblang ia, sa bruk bhian randap min oh daok ngak hu dalam dom bilan pandiak thu jaik ini. Sa-ai H’Lăm lac: Di sang jeng hu bingun ia, min oh takre menyum ia bingun, takre menyum ia di mblang min. Kayua bhian randap paje, menyum ia bingun mboh oh bingi. Mboh nyu lợ lợ yau habar nan. Ia di tapen ini mboh nyu yamen jang”.

Tui taha Y Thák Bdap, dahlau deih dalam palei H’ra Êa H’ning jeng hu sa mblang ia min nyu sit, tok hu 3 vòi lồ ô cắm tame piah ba ia, ia nduac suai saong yếu, bhian rah tabiak bruk kurang ia. Mikva dalam palei bhian dak gauk dang cang, hu tuk meriak gauk, mesao gauk piah mek ia mai pandar. Meng tuk hu bể ia bhap bini ini, bruk pandar ia hu pabak biak rilo, nan ye di mblang ia tuk halei jeng hu sap menuac ndom klao, abih di nyu nan lac tuk page mesup saong tuk biar harei. Taha  Y Thák lac: “Tuk oh ka hu bể ia ini, puk palei kol dahlak biak glaih glar, meblah gauk mek ia, min meng tuk hu bể ini, ia hu luac harei, luac bilan, luac thun. Padang hu bể ia ini ka mikva dalam palei kol dahlak mboh biak bui. Kol dahlak thau dar phor kapul dam dara pakat negar, kapul dam dara  huyện saong xã hu sangka tal puk palei kol dahlak piah hu sa  bể ia biak lagaih”.

“Bể ia bhap bini” hu peih tabiak ngak meng akaok bilan 9 thun 2014. Ini lac sa bruk ngak kayua huyện đoàn Chư Quynh pambuak bruk haong kalup kapul “Hành trình trẻ ban raya Hồ Chí Minh”, kalup kapul “Sức sống trẻ” saong kapul halan hatian di Tây Nguyên jak ba daong brei tui jalan xã hội hóa taong abih. Công trình hu bể padang ia, halăng ia saong labik menei, papah, yaom jien ngak abih tih 40 triệu đồng. Meng kham merat di dom urang đoàn dam dara, rik pren tame ngak, hadei di labaih meteh bilan, công trình hu ngak salah bloh brei ka puk palei pandar, pabak hatai caong meng livik mai di bhap bini. Sa-ai Y Siêr Mdrak, urang đoàn dam dara  xã Đrai B’hăng lac: “Công trình mblang ia tuk ba mai palei, palei ini biak kan kandah ka ia, tok hu dom sang hu jien urang kuac bingun, daok veik jeng pandar mblang ia nan. Yaok thun, tal bilan ini ia thu, meyah oh hu mblang nan, oh hu labik padang ia ye ia oh ginup pandar. Lingiu di nan, mblang ia ngan saong urang Êđê nyu hu makna biak praong, hu mblang ia ini mikva dalam palei bui sambai lô”.

Tui sa-ai Y Lai Niê, Bí thư huyện đoàn Chư Quynh, công trình “bể ia bhap bini” oh lac hu yaom gah ia pandar bo daok hu yaom gah ilamu ngan saong bhap bini, nan ye dam dara dalam huyện kham merat ngak rilo jang dom mblang ia yau nan dalam tukvak anak tal: “Ini lac sa bruk hu mikva maong akaok meng livik mai, tapa nan kol dahlak hu rik hasit pren yava tame khik ramik saong patagok ilamu, jeng yau paglaong bruk mekre di mblang ia. Bể ia Ðrai H’ning daok hu pilih ruah ngak labik ieu yang mblang ia yaok thun di mikva urang bangsa Ê Đê. Kol dahlak daok patui jalan pambuak bruk haong dom pakat karja, dalam thun 2015 saong dom thun anak tal, kol dahlak pambuak bruk haong dom gah, abih di nyu nan lac dom kapul nyom, menuac urang daok dalam saong lingiu huyện, daong peih ngak siam dom bruk di dam dara”./.