Urang taduan hu rilo pandap dong ba di dom kapul nyaom 

Kayua bala meng langik tasik rah tabiak srau kadau saong dom khut, taya biak trak damak meng hajan ia sua di dom tỉnh bhum kreh negar, piah khik ka bhap bini klah di eik lipa,  Mintri Lao động Thương binh saong Xã hội hu pok panuac likau Thủ tướng rajaei daong pabak 6.500 tấn brah brei ka dom tỉnh: Quảng Bình, Quảng Trị, Thừa Thiên - Huế saong Quảng Nam. Dahlau di nan, harei 19/10, Thủ tướng Rajaei hu tabiak sarak brei buh brah meng gilang khik piah di negar, daong ka dom tỉnh: Quảng Bình, Quảng Trị, Thừa Thiên - Huế, Quảng Nam, Hà Tĩnh piah daong ka bhap bini bhum njauk bala, hajan ia sua, yaok 1.000 tấn. Lingiu di nan, Thủ tướng Rajaei hu daong yaok tỉnh 100 tỷ đồng piah daong chip ka bhap bini bhum ia sua, saong dom bruk daong karei tui sarak di karja.

Meng dom bruk ngak hu saong dom ilamu bac megru hu meng mbang bloh, Nyaom roya  Đảng bộ tỉnh Ninh Thuận mbang ka XIV tuk vak  2020-2025 hu peih tabiak tuk mesup ini  27/10 di ban  Phan Rang- Tháp Chàm  tacei lac mek  bruk ngak mbang tasik ngak pren khang;  batabiak jalan ngak ka  5 thun tal: ba bruk kinh tế praong tal puac tuk vak  tagok  1,9 mbang dut song thun  2020. Khik ramik song patagok dom yaom glaong  ilamu dom bangsa; paglaong rai duik mbang ngui dok dang di bhap bini, khik kajap quốc phòng - an ninh. Tal thun  2025 lac  tỉnh patagok  di bhum song dalam negar .

Dalam taneh ia urak ini hu 237 rabau hecta taneh ngak nong hữu cơ, rilo jang labaih 53 rabau ha duk saong thun 2016. Việt Nam urak ini hu 97 doanh nghiệp ngak pandap hữu cơ saong 60 doanh nghiệp hu bruk pablei tabiak negar lingiu, haong yaom jien mek tame jaik 335 triệu USD sa thun. Kaya nong hữu cơ Việt Nam hu pablei dalam taneh ia saong urak ini hu pablei tapa 180 taneh angaok dunya, dalam nan hu dom darak pasar kan tame yau ye Mỹ, EU, Trung Quốc, Nhật Bản, Đức, Anh... Min bruk ngak nong hữu cơ daok hu rilo kan kandah yau ye: urang ngak nong oh ka hu ilamu dalam bruk ngak siphau pala drak, daok ngak tui jalan meng kan, oh ginup thau piah ngak dom tanut ka ngak nong hữu cơ, takik phun jien piah ngak.. Dom jalan ngak piah jhul patagok bruk ngak saong peih praong darak pasar pablei kaya nong hữu cơ di Việt Nam lac asal kadha hu pataom tame ginum biai di nyaom biai “Jhul patagok bruk ngak saong cakrok kaya nong hữu cơ” kayua Mintri ngak nong saong patagok palei pala peih tabiak tuk biar harei kabroi (26/10) di  TP.HCM.

Labaih 1.000 rahra di Đắk Lắk hu mbaok tame dom tal bac tong main  cồng, chiêng (janih alat ragam di dom bangsa takik bhum  Tây Nguyên) dalam labaih 5 thun tapa. Tal bac hu peih pato biak siam, lagaih haong bruk daok caong hu di puk palei, hu Sở Văn hóa Thể thao Du lịch tỉnh Đắk Lắk song dom puk palei  peih bruk pato pasram. Abih di nyu nan lac dom puk palei hu 110 tal bac tong main cồng chiêng ka uranaih.

Tui yaok pataom oh ka ginup abih, tal urak ini, Thành đoàn, Kapul dam dara, kapul Sinh viên saong Hội đồng Ðội TP Hà Nội ieu pataom, jak ba hu jaik 4 tỷ đồng jien mbaok saong pandap mbang menyum daong ka dom tỉnh bhum kreh negar njauk rabuk, ia sua. Tui kuhria, akaok bilan 11 tal, Thành đoàn Hà Nội pambuak haong dom gah karei padang 4 kapul halan hatian, pajeng ba dom pandap daong nao tal dom tỉnh Hà Tĩnh, Quảng Bình, Quảng Trị haong Thừa Thiên Huế; peih bruk padang ngak, pasiam veik sang bac, sang daok, alin hadiah pandap, daong pasiam dom khut, tayah hadei di hajan ia sua.

Tui jabat  khí tượng Japon, ribuk Molave meda tuh tame takai tasik Việt Nam hu hangin khang 144 ki-lô-mét yaok tuk  di mon 7 mesup  harei page (28/10) dahlau di tuk jeng áp thấp nhiệt đới di mon 7 mesup harei  29/10. Dahlau di nan, Dom rayo di  Japon song Hải Quân Mỹ brei thau,  tal page mesup, hangin di ribuk  Mô-lây dok 144 ki-lô-mét yaok tuk, handaok  198 ki-lô-mét yaok tuk, atah di takai tasik  Phú Yên song  Đà Nẵng di  Việt Nam labaih 140 ki-lô-mét.

Ong Tedros Adhanom Ghebreyesus Tong Yam ndok gah Y tế dunya (WHO) hu panuac ieu dom taneh ia jhui klaak biak avar dom jalan ngak piah pasang iek  jit ruak, ndom lac bruk klaak nao dalam tukvak ini meda ngak brei tayah bruk mesruh pacang jit ruak Covid-19. Panuac nan di urang dang akaok gah Y tế dunya hu ba tabiak hadei di tuk Chánh văn phòng Nhà Trắng Mỹ Mark Meadows puac adit blaoh lac, rajaei Mỹ “oh pasang iek jit ruak”, salih tame nan lac pataom tame duah patagok vắc-xin pacang ruak saong dom jalan taong ruak.

Kapul Di cư dunya  (IOM) brei thau, hu dong sraong labaih 100 urang  di cư suan hukum di langui tasik Li-bi dalam adit bloh.Tui kapul ni yaok pataom mboh,  meng akaok thun tal ni, hu jiak 10 ribau urang di cư suan hukum, dalam nan hu urang kamei song uranaih hu daong sraong saong ba nao veik Li-bi.Min,jeng hu labaih  220 urang di cư suan hukum metai song  287 urang karei lahik  angaok jalan Trung Địa Trung Hải meng di akaok thun tal ni./.

Urang lang: Mousaphuong- Hanipha- 27/10