Biến thể Omicron nyu caih tabiak samar jang 70 mbang dalam jalan suak yava

Tui roh duah bahrau ini, dut haong biến thể Delta, biến thể Omicron nyu caih tabiak samar jang 70 mbang dalam jalan suak yava. Kadha ini mbuan ngak njaom mbak meng urang ini tapa urang diah. Yau nan min, dalam dom mô phổi, Omicron nyu caih menek suai jang 10 mbang dut haong phiên bản gốc di virus SARS-CoV-2, nan ye meda ngak ka ruak takik trak jang.

COVID-19 oh kuhria mboh dahlau hu kuhria meng tuk bahrau duah mboh mbang akaok meti. Meng dom kadha brei thau lac ruak, tal ruak cak rok patagok, tal dom kadha kanjah jhak bo janih ruak njaom mbak ini ba tal manuac sia, yaok janih oh meda hagait tantu cambaih laih tuk ndom tal virus SARs-COV-2.  

Langiu di nan, dom biến thể bahrau yau Omicron jaik di abih meda kan giải mã. Yaom lac drei saneng nyu takik trak jang Delta, min bruk patagok manuac urang njauk ruak meda ngak ka bruk iek ruak angaok dunya nyu cuang kandah jang. Taong abih khaol drei jeng hu mboh bruk pandik harao meng biến thể Delta ba mai, kayua yau nan ye, meyah khin plaih njaik bruk dreih yau nan rah tabiak, khaol drei njauk ngak abih dom jalan pacang caga yau hadei ini:

Cuk pataih pacang mbaok, rao tangin saong daok atah di gauk

Virus SARS-COV-2 rilo meng njaom mbak meng manuac tapa manuac tuk daok jaik gauk. Kayua yau nan ye, cuk siuk pabang mbaok meda ngak brei patrun bruk njaom mbak virus biak rilo. Langiu di nan, brei dang atah dom urang karei, rao tangin hacih sa-at meng sabon hadei di tuk gaok tangin tame dom labik bhian hu menuac gaok tame, jeng ngak brei patrun bruk njaom mbak ruak.

Brei padeih dom bruk pataom gauk mbang menyum, takik peih ngak dom bruk langiu langik

Yaom lac hu klauk blaoh jru pacang caga atau oh ka hu klauk jru pacang caga, khaol drei jeng takik peih bruk pataom gauk mbang menyum, takik hu mbaok tame dom bruk pataom rilo menuac saong njauk plaih njaik dom bruk ngak langiu langik, abih di nyu lac tuk pambuak tal labik hu rilo manuac.

Dalam tuk dak harei dak hu rilo huac kanda ka biến thể Omicron bahrau, dom urang jakar y tế angaok dunya hu panuac kakei manuac sia njauk caik hatai sangka jang dalam dom mbang padeih lễ. Kayua biến thể bahrau nyu hu prein njaom mbak glaong jang biến thể Delta, nan ye bruk dunya njauk pambak meng nyu tok daok lac tukvak min.

Klauk vaccine ginup saong klauk mbang pabak

Tuk biến thể bahrau dak harei dak njaom mbak prong dalam tuk biến thể Delta jeng daok tamuh khang, klauk jru jeng lac jalan pacang caga siam di abih, pacang plaih ruak trak jang saong metai lahik kayua COVID-19. Kayua yau nan ye, njauk peih bruk klauk vaccine piah ka thei jeng hu klauk vaccine pacang caga ginup abih. Langiu di nan, mbang klauk vaccine pabak meda ngak brei patagok prein khik caga, pacang veik biến thể Omicron. Rilo taneh aia dalam nan hu Việt Nam daok peih  bruk klauk mbang pabak ka bol bhap, rahra./.

Urang lang: Jasi – 30/12