Pathau mikva saong taong abih gauk!

Đề án pato saong bac sap negar lingiu dalam dom sang bac karja tukvak 2008-2020 nao tapa hu 2/3 tukvak ngan saong yaom đầu tư jaik 10.000 tỷ đồng. Min, hadei di 8 thun peih ngak, eng bruk bac sap Anh jeng ngak ka ralo urang thất vọng. Panuac tangi sua hu ba tabiak lac kayua halei đề án ini oh ka mek hu kein lagaih, jalan ngak halei piah salih barau?Ngọc Luân, urang vak di rayo sap ndom VN daok di ban raya HCM hu kadha vak brei thau  dom panuac ndom ka bruk ini: 

Hadei 8 thun peih ngak đề án pato saong bac sap negar lingiu, ye sap Anh hu kết quả biar mboh katuak drei. Mbang pakacah tamat THPT pakat negar thun 2016 meng bloh, điểm trung bình di môn sap Anh tok hu 3,48 điểm. Tui kuhria mboh, labaih 88% anek saih hu điểm ala trung bình di môn pakacah ini. Hu jaik 200 ribau kadha pakacah hu meng 2 tal 2 điểm meteh. Yau nan, sap Anh lac môn pakacah hu điểm ala trung bình ralo di abih. Ralo anek saih ndom lac, bruk bac sap negar lingiu dalam sang bac, abih di nyu nan lac sap anh bhian sangka bika rilo tal ngữ pháp, min oh ka hu ralo tukvak piah hu ndom puac tapak. Lê Bảo Anh, sinh viên sang bac Đại học Khoa học Tự nhiên, Đại học Quốc gia ban raya Hồ Chí Minh lac:

  “Drei brei hu tukvak ndom sap anh, bac sap anh lac sa bruk suai lavik piah pasram saong pasiam. Yau habar drei ndom gheih sap Việt kayua drei ndom ralo, taom gaok ralo nan ye drei kanal hu. Daok sap anh drei takik taom gaok”.

Nan lac sa dalam dom makna ngak ka bruk bac sap anh dalam sang bac oh ka hu siam lagaih. Dalam tuk nan, bruk ngak di đề án pato saong bac sap anh lac tal thun 2020 ralo dam dara VN tamat meng trung cấp tal đại học meda ndom puac hu sap negar lingiu, ngak bruk hu dalam labik hu rilo ngôn ngữ, ralo ilamu, ngak brei sap negar lingiu jeng pren khang di bhap bini Vn.

 Amuk Võ Ngọc Thu, dahlau daih lac akaok Jabat pato megru Quận 5, ban raya Hồ Chí Minh ndom lac, makna kan mek hu bruk ba tabiak di angaok nan, lac ralo gru pato sap anh oh ka mek hu chuẩn yaom lac hu bằng cấp tui ilamu pasram megru. Urak ini bruk pato jeng daok tui jalan meng kan, anek saih oh sami samar, gru pato puac yau habar ye anek saih puac tui yau nan. Sĩ số tal bac urak ini biak ralo, nan ye bruk pato saong bac di gru pato saong anek saih piah patagok bruk ndom puac oh siam lagaih, bruk pang, bruk ndom jeng biak takik. Giáo trình sap anh bhian salih barau, oh ka hu bruk najuk gauk ka khung giáo trình. Dalam tuk nan, bruk taom gaok ndom puac daok takik, anek saih takik hu tuk ndom puac tapak lingiu tukvak bac  di tal bac. Amuk Thu ndom lac brei daong palagaih ka gru pato paglaong ilamu saong kỹ năng chuyên môn.     

 “Daong palagaih ka gru pato di drei nao negar langiu, tal dom labik, dom tal bac piah rivang iek, bac megru bruk pato di gru pato negar langiu tui jalan năng động, tui jalan daong hu ka anek saih. Gru pato di drei hu mboh, hu pang saong bac ye dahlak saneng jalan nan hu pandar ngak saong siam jang”.

Bruk pachreih bac sap negar lingiu oh ka glaong lac paga pacang urang bac nao tal sa sap negar lingiu. Dom chuyên gia gah pato megru ndom lac, dom salih barau dalam kiểm tra taong yaom kadha sap anh oh ka samu saong dom salih barau dalam bruk pato saong bac sap negar lingiu jeng yau sap anh di pakat phổ thông. Ong Võ Thanh Bình, pato sap Anh sang bac Đại học Ngân hàng ban raya Hồ Chí Minh brei thau, mintri pato megru pandar pato bac sa gah, min pakacah tui sa gah karei, nan ye bruk pachreih bac di ralo anek saih, sinh viên oh glaong. Urang pato jeng njauk áp lực pato tui điểm số jeng yau kết quả bac daa. Danak dak pato saong bac oh ka salih karei tui jalan patagok dom kỹ năng hu salih barau taong yaom tui jalan giao tiếp. Kayua yau nan ye, bruk kiểm tra taong yaom môn ngoại ngữ meng pakat phổ thông brei salih barau, abih di nyu nan lac jalan pakacah dalam mbang pakacah THPT pakat negar brei salih barau tui jalan kiểm tra 4 kỹ năng lac pang, ndom, puac, vak. Taphia di nan, gru pato jeng brei hu paglaong năng lực, jalan pato saong nhất quán ka giáo trình pato, atau pablak dom kadha ka ilamu sajarah dak rai di VN piah ba chreih chrai ka urang bac. Ong Vũ Thanh Bình lac:

  “Bac ngôn ngữ ye brei bac ndom, bac pang dahlau bloh meng bac vak. Min drei ngak cagar veik, drei ép anek saih vak yaok akhar, yaok từ nan ye lỗi di ini lac pato anek saih bac sap oh pato anek saih bac ndom, nan ye nao sung jalan ka ngôn ngữ. Urang pato siam sap anh tok phát âm chuẩn sap anh, hu ilamu ngữ nghĩa ka sap anh saong thau jalan pato lac hu. Nan lac drei thau học viên di drei caong hagait”.

 Mintri pato megru daok pachreih dom labik pato megru taduan dom danak dak sap negar lingiu hu dunya công nhận, patagok bruk pato bac ngoại ngữ chuyên ngành dalam dom labik pato megru, pato dom môn khoa học tự nhiên meng sap anh di phổ thông… Yam tal salih barau bruk pato saong bac sap negar lingiu urak ini, ba dự án pato saong bac sap negar lingiu dalam dom sang bac quốc dân jeng  siam mekre jang, kein lagaih jang./.