Sang danaok oh ka ramik pasiam 

Angaok tasik gah timur Phi-líp-pin hu rabuk Molave meda tame tasik biển Đông dalam harei ini (26/10) jeng rabuk ka 9. Tui kuhria mboh dahlau, rabuk nao samar, khang saong praong, hu hajan khang tal biak khang di dom tỉnh Trung Bộ. Rabuk hu jalan nao saong khang drei yau rabuk ka 12 (Damrey) tuh tame tỉnh Khánh Hòa di bilan 11 thun 2017, ngak khut tayah khang di dom tỉnh, ban hu rabuk nao tapa. Piah caga pacang, jabat mBan tacei jalan pakat negar ka pacang caga bala meng langik tasik hu panuac tacei mBan tacei pato pacang caga bala meng langik tasik saong duah, daong urang njauk bala dom tỉnh, ban tapen tasik meng Thừa Thiên Huế tal Ninh Thuận bhian tui iek, tui pang panuac khan ka rabuk, ngak dom jalan samar drah piah khik caga siam mekre ka menuac sia saong drap ar di bhap bini.

Kayua hu ribuk , di tỉnh Thừa Thiên Huế dok hu hajan khang, UBND tỉnh Thừa Thiên Huế song Bộ Tư lệnh Quân khu 4 hu panuac ieu brei padeih bruk dong duah urang lahik kayua glut jaleih  Thủy điện Rào Trăng 3. Tong abih gah dong duah dok di pak ni hu ba tal labik padei padeih, caga  peih bruk dong duah tuk langik lagaih jang . Urak ni gah dong duah urang gaok bala  duah mboh  5 atau dalam 17 urang lahik kayua glut jaleih  di  thủy điện Rào Trăng 3. Dalam nan  2 rup atau  duah hu angan song ba mai sang kubo  urak ni dok 12 urang lahik.

Patui mbang nyaom ka 10, mesup ini, QH pang saong ginum biai ka pathau khan bruk ngak saong pathau khan taong yaom di Chánh án Tòa án bhap bini pakat glaong di abih, Akaok Viện kiểm sát bhap bini pakat glaong di abih; bruk pacang caga, mesruh pacang kol tội phạm saong ngak suan adat hukum haong bruk thi hành án; bruk pacang caga tham nhũng thun 2020. Daok bruk pacang caga kol tội phạm haong ngak suan adat hukum, gah chức năng hu pasang iek, ngak brei cambaih laih 33 rabau 131 bruk ngak suan gah trật tự xã hội, dalam nan án biak trak hu labaih 85,7%; án trak biak trak hu 95,9 %; khởi tố 20 rabau 242 bruk. Dom bruk praong, ngak pandik hatai menuac sia jeng hu pasang iek, duah thau, ngak brei cambaih laih. Ngak tayah 2 rabau 485 kapul nyaom tội phạm hình sự dom janih. Bruk pacang caga tham nhũng thun 2020 daok hu dom siam lagaih, ngan saong rilo jalan ngak mek hu siam mekre praong.

Melam blaoh  (25/10), UBND tỉnh Trà Vinh peih  “Adit ilamu , ravang me-in – harei pataom mbang huak  gah merong  gam song rija  Ok om bok tỉnh Trà Vinh thun 2020”. Ni lac bruk piah patagok khik ramik ilamu bangsa Khmer song meyaih khan pandap panda du lịch di pak ni.  Adit rah tabiak rilo bruk yau:  harei pataom mbang huak gah merong mbang ka II tỉnh Trà Vinh thun 2020; parang iek  “Du lịch bhum taneran krong  Cửu Long”; pok meyaom angan je  du lịch Trà Vinh; nyaom drak pasa pablei salih  – Du lịch; Adit yaih khan pok meyaom  pandap kaya nong hacih saat; harei pakacah ghe Ngo...song rilo bruk doh tamia, thể thao ndung mbak ilamu  bangsa Khmer. Dalam dom bruk di adit thun ni dok hu ginum biai  “Nghệ thuật sân khấu Dù kê - 100 thun  dak padang song patagok”. Adit "Ilamu, Du lịch – harei pataom mbang huak  gah merong  pagam song rija  Ok Om Bok tỉnh Trà Vinh thun 2020" rah tabiak meng ni tal abih harei  31 bilan  10 ini.

344 urang lambaok dom đội viên, uraniah naih gheih di taong abih dom tỉnh, ban dalam taneh ia hu mai ban ine Hà Nội hu mbaok tame nyaom roya Cháu ngoan Bác Hồ pakat negar mbang ka IX hu angan ieu lac “Bingu pahe pok tagok Wa” hu peih tabiak di harei 25/10. Nyaom roya Cháu ngoan Bác Hồ pakat negar lac bruk praong, harei raya praong di uraniah Việt Nam hu peih ngak 5 thun sa mbang, piah pok meyaom dom uraniah naih gheih dalam bac da-a, pasram megru, pakacah gauk ngak tui 5 kadha Wa Hồ pato uraniah.

Tui pathau khan di karja ban Cát-xga (Kashgar), bhhhum tự trị Tân Cương, Trung Quốc, tui kuhria ban hu peih bruk dut iek  Covid-19 ka tong abih jiak  5 triệu menuac pak ni  hadei di tuk mboh  yaok rituh urang njom Covid-19 oh mboh hagait dalam dom harei jiak di ni. Dahlau  di nan, dalam 2 harei  24 song 25/10, ban  Cát-xga hu  138 urang dương tính song  SARS-Cov-2 song jeng lac dom urang oh mboh hagait  . Urak ni, karja ban tagok tanut cảnh báo jeng tanut  ka  1, rilo  labik njauk pacang cakak, dom sang bac jeng brei kreih pabah mbang mbiah tal harei 30/10.

Thủ tướng Séc -Andrej Babiš brei thau taneh ia ini meda ngak catang dom jalan ngak dalam adit ini piah pacang veik dịch Covid-19, ong jeng ieu bhap bini ngak catang tui bruk ba tabiak piah pacang cakak bruk njom mbak di jit praong. Thủ tướng Babiš brei thau lac Mintri Y tế daok jhul patagok bruk dut iek saong duah thau urang njom Covid-19 piah pacang jit ruak. Akaok Mintri y tế Roman Prymula jeng hu khan lac dom urang njom di puac adit blaoh jeng daok tagok saong tagok di tanut glaong di abih.

Harei 25/10, mbang camereip dalam dakrai talei rohim song Thổ Nhĩ Kỳ, Prang hu ba Đại sứ di negar ni mai palei. Ni lac bruk rah tabiak dalam tuk catang tagok talei ngoại giao  meng dom panuac ndom jiak di ni di Tổng thống dua negar. Harei 21/10 meng bloh, negar Prang peih bruk pahadar pakat negar brei ka gru  pato Samuel Paty, urang njauk khol Hồi giáo khủng bố pametai di harei 16/10 kayua mek thaot binguk biếm họa di  nabi Mohammed di urang Islam piah jo klao dalam sa var pato bac. Dalam var pahadar ni, Tổng thống Pháp Emmanuel Macron hu ndom lac, negar Prang  oh yah klaak dom thaot binguk biếm họa.Panuac ndom ni di Tổng thống Prang ngak pandik hatai urang Islam di rilo negar. Abih di nyu nan lac dalam  2 harei  24 saong harei  25/10, Tổng thống Thổ Nhĩ Kỳ, ong Tayyip Erdogan gam gam ndom puac tapak  Tổng thống Prang Emmanuel Macron./. 

Urang lang: Hanipha- Mousaphuong- 26/10