Pathau mikva saong taong abih gauk! Phước Chiến lac xã bhum ceik biak kan kandah di huyện Thuận Bắc, tỉnh Ninh Thuận. Bhap bini di xã ini rilo meng lac urang Raglai. Dom thun jiak di ini, piah palagaih haong bruk biến đổi khí hậu, bhap bini Raglai di Phước Chiến kham merat salih yaok rituh ha taneh ngak padai oh hu kein laba atau taneh klak tasaoh, tapa pala dom janih phun takik harei pandar takik ia pruh saong tamuh siam dalam lingik pandiak. Tal urak ini, bruk salih phun pala hu ba mai rilo jien padai, daong ka bhap bini yam tagok tani tanat rai diuk. Kadha vak di Minh Triều, urang pambuak bruk saong rayo sap ndom VN daok di Ninh Thuận brei thau ka bruk ini:

Urak ini, ralo mikva Raglai daok di xã Phước Chiến, huyện Thuận Bắc, tỉnh Ninh Thuận meng salih tapa pala tabau ngak saradang hu jien mek tame tani tanat meng 30 tal 40 triệu đồng sa thun. Urak ini, xã Phước Chiến daok jak ba mikva salih labaih 20ha taneh puh daok pala bei kayau, pala tangei takik kein laba tapa pala tabau ngak saradang piah paglaong jien mek tame saong patagok kinh tế baoh sang. Ong Katơ Nhí tabiak truh kan kathaot meng salih bein pala rilo janih phun tapa pala tabau. Ini lac vụ ka 2, ong Katơ Nhí pala 5 sào tabau. Tuk hu mbaok tame mô hình, ong Nhí hu xã daong pajaih, vật tư, phun jien ramik taneh saong hu urang jakar kỹ thuật tacei pato dalam luac tukvak patagok di phun tabau. Ong Katơr Nhí, xã Phước Chiến, Thuận Bắc, Ninh Thuận chreih chrai lac:

 “Dahlau diah, drei jeng pala tangei, ratak. Urak ini salih tapa pala tabau. Thun bloh drei ngak, mek hu 30 triệu đồng. Livik livik harei jeng hu phun jien piah ngak. Meng hu jien nan bo drei pah urang ngak  vụ ini. Vụ ini công ty oh ka brei thau yaom nen ye drei oh ka thau. Kan kandah nan lac jalan nao oh siam kayua hajan nan ye bruk pajeng ba oh hu. Tui kuhria thun ini hu jiak 15 tấn”.        

Lingiu di nan, tuk tak tabau, mikva daok mek jung saong hala tabau ngak pandap mbang ka limo. Hu karja brei mesraiy 20 triệu đồng, saai Mấu Thị Đông buh tame raong limo palimek. Meng 2 drei limo binai tuk camereip, tapa labaih 10 thun tal urak ini sang saai hu 13 drei limo amaik saong 7 drei limo anek. Dom thun jaik di ini, meng hu ia di danao Sông Trâu nan ye sai Đông pala hareik brei ka limo mbang dalam bilan pandiak bhang saong pandar jung saong hala tabau ngak pandap mbang ka athur raong. Saai Mấu Thị Đông, xã Phước Chiến, huyện Thuận Bắc, tỉnh Ninh Thuận brei thau:

 “Tuk camereip drei mesraiy jien karja blei hu 2 drei limo. Bloh drei patak pataom piah blei pabe. Gah adei saai kamei jeng klah rabha bruk ngak mbang. Drei daok ngak puh hu 6 sào. Taneh ini lac 3 sào tra”.

Meng labaih 585 ha taneh pala drak, meng jhul pakhang bruk pathau khan, padang jalan patagok kinh tế cambaih laih, nan ye bhap bini di xã Phước Chiến meng labik pala drak sit sot, pala piah mbang dalam sang, urak ini padang hu dom bruk ngak kinh tế brei kein laba gloang yau: bruk pala tangei lai năng suất mek hu 5 tấn sa ha yaok vụ; bruk pala phun tabau di angaok taneh praong abih tih jiak 40 ha brei năng suất 60 tấn/ha; bei kayau brei năng suất 20 tấn/ha . Saai Patau asah Ngoan, Phaok akaok Ủy ban bhap bini xã Phước Chiến, huyện Thuận Bắc, tỉnh Ninh Thuận brei thau:

“Lac puk palei daok hu ralo baoh sang kan kathaot saong taneh pala drak takik, Xã jeng hu tacei ka mikva pala dom janih phun tamuh hu dalam lingik pandiak yau: tabau, bei kayau, keo lai, panat, pa-aok blait ghép. Daok phun mbang baoh ye daok jak ba bhap bini pala kruoc bung kanduh hijao, patei. Mikva salih janih phun pala, yam tapa truh kan kathaot piah tani tanat rai diuk”.  

Jak jeng meng bruk salih janih phun pala oh lac rik daong ka bruk salih bahrau jalan pala drak klak oh hu laba di mikva Raglai, paglaong kein laba kinh tế, bo daok daong ka rai diuk  di mikva dak harei dak hu trei sil jang. Ini jeng lac jalan ngak njauk di dom pakat ủy, karja dalam bruk ngak patagok kinh tế, XH di xã bhum ceik Phước Chiến tui jalan khang kajap./.