Hadei di rilo thun kan kandah, glaih glan,  ông Nguyễn Đức Luân (umo 56 thun daok di Nghệ An) ngak hu siam mo hinh var raong glang  tổng hợp, ba jien mek tame yaok ratuh trieu dong yaok thun. Kadha “ urang ngak hamu caong thau” harei ini, kol dahlak likau yaih khan ka ông Nguyễn Đức Luân, daok di  xã Đông Vĩnh, ban sit Vinh, tỉnh Nghệ An. 

Thun 1998, karja brei salih taneh pala padai oh kein laba tapa padang ltrang trại raong glang praong, ông khang hatai taduan mek labaih 3 ha taneh piah patagok mô hình ini. 

Thau lac khin ngak kaya meda meng raong glang njauk khang hatai buh jien padai pren yava tame ngak, ông Luân pataom tame ngak praong tui jalan sản xuất khép kín. Taphia bruk padang ngak dom var raong menuk binai praong labaih 1.000 m2, ông daok brei caoh danao raong ikan, pala njam patam piah mbang saong piah duah jien tame. Kayua trang trại daok di bhum atah bayah, nan ye bruk raong glang gaok rilo kan kandah. Oh ka hu ilamu pacang cakak jit ruak nan ye rilo mbang menuk ada metai. Gaok tuk hajan ribuk ia tagok glaong dauk abih danao, rilo tấn ikan theik nao abih. “Dahlak saong diuk anek kham merat ramik pasiam dom cuang kandah ini,  nan ye hadei  di nan, trang trại meng hu siam, ông Luân brei thau yau nan. 

Urak ini, trang trại di sang ông Luân tagok hu 3 ha danao. Yaok thun ông raong 2 mbang ikan ginup dom janih, pablei  hu 12 - 13 tấn yaom meng 25.000 - 35.000 đồng/sa kg. Kaoh bloh phun jien buh tame, ông daok laba hu labaih 150 triệu đồng/sa thun. Jien mek tame meng tapol menuk binai labaih 6.000 drei, saong bruk pablei labaih 5.000 baoh sa harei, yaom pablei  1.700 - 1.800 đồng/sa baoh hu daong diuk pasang ông mek tame sa triệu đồng sa harei. Trang trại di ông daok hu raong labaih 3.000 drei menuk caga piah salih tapa tapol menuk amaik ame. Tui kuhria, abih tih jien mek tame di trang trại ini yaok thun hu 700 - 800 triệu đồng, kaoh abih dom janih jien buh tame, daok laba hu labaih  450 triệu đồng. Meng bruk ngak mbang trang trại hu tani tanat, ông Luân hu jien raong 3 urang anek mbang bac tal labik tal dhua, padang ngak sang danaok praong, siam saong daong ka rilo sang jaik taphia ngak mbang. Urang nong praong thun meng tangin saoh ngak  jeng, daok brei jien mesraiy yaom laba lap, daong anek pajaih piah dom sang kan kandah hu jalan ngak mbang /.