Urang kathaot hu dong limo rong pak di sang 

Brei panuac di nyaom biai, Phaok Thủ tướng raja-ei Trịnh Đình Dũng, Akaok Mban tacei pato Trung ương danak dak bruk ngak pakat negar padang ngak palei pala bahrau hu pok meyaom saong tadhau ayuh dom bruk ngak hu praong dalam padang ngak palei pala bahrau dalam negar, dalam nan hu dom bruk ngak hu tuk akaok mereip biak hu yaom glaong dalam padang ngak palei pala bahrau di dom bhum biak kan kandah. 

Phaok Thủ tướng hu panuac caong tỉnh patui jalan rami ramik veik bruk ngak mbang kinh tế di tỉnh saong di puk palei; ngak jeng labik lagaih piah dui pachreih doanh nghiệp buh jien tame gah ngak nong, palei pala abih di nyu lac di bhum biak kan kandah. Paglaong kein laba bruk ngak di dom hợp tác xã ngak nong dalam nan brei ngak dahlau dom hợp tác xã ngak nong pandar công nghệ glaong, hợp tác xã cak rok patagok bruk ngak saong pandap panda OCOP. Dom hợp tác xã njauk khik hu labik dang di drei piah jhul patagok bruk ngak nong, kinh tế palei pala padang ngak palei pala bahrau… Buh jien tame ka gah pato menreu, patagok manuac ngak; khik ramik saong patagok asal ilamo meng kan siam gheih di dom bangsa pambuak pagam haong cak rok patagok bruk rivang ma-in dalam bhap bani, rivang ma-in bhum palei urang bangsa takik. Caik hatai tal dom kadha pacang khik môi trường saong ngak brei palei pala nyu hadah – hijao – hacih - mekre….

Pathau khan pataom iek veik 5 thun padang ngak palei pala bahrau bhum biak kan kandah vaktuk 2016-2020 ndom cambaih: tal urak ini hu 8 dalam 64 huyện kathaot tabiak truh kan kandah saong 14 dalam 30 huyện kathaot hu mbang tui Sarak 30a tabiak truh kan kandah min oh ka hu huyện mek hu angan chuẩn palei pala bahrau. Tal urak ini hu 315 dalam 2.430 xã biak kan kandah, xã ATK daok dalam danak dak 135 saong xã biak kan kandah bhum tapen tasik saong pulao kaoh mek hu chuẩn palei pala bahrau (samu 13%)... Taong abih jien padai ieu pataom buh tame ka bruk padang ngak palei pala bahrau dalam bhum biak kan kandah vaktu 2016-2020 lac jaik 800.000 tỷ đồng. 

Dom bruk ngak hu praong njauk ndom lac, lac: hạ tầng kinh tế - xã hội palei pala bhum biak kan kandah, abih di nyu lac bhum urang bangsa takik saong bhum ceik hu sangka buh jien tame ngak, nan lac makna rik daong ngak brei paglaong bruk ngak mbang ngak huak saong rai diuk di bhap bani: tal harei ini, hu jaik 80% dom xã hu jalan radaih ô tô nao tal pasak xã hu tuh menjek atau bê tông; 73% jalan xã saong jalan meng pasak xã tal huyện hu ngak khang, labaih  70% dom palei pala hu jalan nao mai hu padang ngak khang kajap. Taong abih xã saong labaih 97,8% dom puk palei hu điện negar…

Bruk ngak mbang palei pala hu salih bahrau biak siam. Dom puk palei thau patagok pren khang di bhum palei drei, jhul khang bruk salih janih phun pala, athur raong takik kein laba tapa dom janih phun pala, athur raong hu yaom jien mek tame glaong, k padang hu bhum pala drak raong glang praong pataom sa libik. Tal urak ini, taong abih dom puk palei hu patabiak Đề án peih ngak danak dak OCOP pakat tỉnh. Angaok dom tỉnh dalam bhum biak kan kandah hu chuẩn hoá jaik 1.061 pandap OCOP (meblah jaik 50,8% dalam taneh aia).

Dom bruk ngak hu nan hu rik daong ngak brei patrun baoh sang kathaot dalam negar vak tu 2016-2020 lac 1,55% sa thun; dom baoh sang kathaot di dom huyện kathaot trun jaik 5,65% sa thun, dom xã biak kan kandah bhum urang bangsa takik saong bhum ceik trun jaik 4% sa thun. Jien mek tame kuhria rah tapa di baoh sang kathaot bhum palei pala tal puac thun 2018 tagok jaik 1,4 mbang dut haong puac thun 2015, tui kuhria tal puac thun 2020 tagok jaik 1,6 mbang./.

Urang lang: Jasi -9/12