Blah tờ rơi daong brei masre padang pandap ngak ja, pagam pabak tame angan di Tập đoàn Điện lực Việt Nam (EVN) 

“Kham merat tal harei 1/7 meda brei ngak 50 trieu thẻ căn cước bhap bini pagam chip điện tử duh ka bruk ngak pandar di bhap bini”. Ni lac khaw tin hu khan di Nyaom bai online Pataom iek veik Danak dak ngak brei mbuan lagaih harak gah hành chính, harak bhap bini saong cơ sở dữ liệu pambuak tal bruk khik iek bhap bini vaktu 2013 -2020 iew katut lac Danak dak 896 peuih tabiak page ini di Hà Nội. Di nyaom biai, Phó Thủ tướng Thường trực Trương Hòa Bình ndem cambaic laic, Danak dak 896 ngak brei salih birau bruk khik iek di karja ngan saong bhap bini tui jalan salih urak ini. Tapa nan, jhul pakhang bruk peih ngak dịch karja tapa online di dom mentri, dom tỉnh, ban yam tal padang ngak Rajaei điện tử.

Harei ni (24/4), Đăk Lăk peih bruk klauk labaih 17 ribau mbang vắc xin Covid -19, aval jang 3 harei dut saong jalan ba tabiak saong tui kuhria salah di harei 5/5/2021. Dahlau di nan, gah y tế tỉnh hu peih bruk pasram ka dom urang ngak bruk klauk jru; pato tacei pasang iek dahlau di tuk klauk jru saong dom jalan pacang caga ka labaih 95% urang hu brei klauk dahlau di abih, Đắk Lắk pandar hệ thống klauk jru peih praong saong 2 labik klauk jru salamat di 2 sang iek ruak. Tuk njauk ngak meda jak ba dom labik klauk jru dịch vụ saong dom labik karei ginup prein piah klauk jru.

Anak dom bala rah tabiak angaok jalan mbak, Sở Jalan mbak pajeng ba tỉnh Long An caong khin UB bhap bini tỉnh brei padang veik Jabat Mban khik iek salamat jalan mbak. Kuhria ta-eng quý 1 thun ini, tỉnh ini rah tabiak 40 mbang bala angaok jalan mbak, 25 urang metai, njauk rambuac 28 urang, dut saong tukvak ini thun dahlau tagok 9 mbang, tagaok 9 urang metai saong tagok 7 urang njauk rambuac. Bruk padang Jabat Mban khik iek salamat jalan mbak tỉnh piah samar pasiam, langyah dom bruk ka salamat ngaok jalan mbak, jhul pakhang bruk pathau khan ka hukum saong ilamu nao mai ngaok jalan mbak.

Tukvak jaik di ini, di dalam ban raya HCM saong dom tỉnh, ban gah maraong hu mboh dom blah tờ rơi brei thau bruk daong brei masre padang pandap ngak ja, pagam pabak tame thaot binguk, logo saong angan di Tập đoàn Điện lực Việt Nam (EVN). EVN brei thau lac oh hu kapul halei di dalam Tập đoàn atau doanh nghiệp pambuak bruk halei hu angan lac “gilang paraik Điện lực Việt Nam”. Ni lac bruk ngak suan hukum, mboh lac ngak pachot. EVN ieu kakei dom jabat, kapul, manuac urang paglaong hatai sangka, oh caik ka dom kol kanjak jhak pagam pambak tame.

Tòa án bhap bini tỉnh An Giang birau taong phạt nyaom urang peih bruk ba manuac tabiak negar suan hukum dalam tuk jit Covid-19 rah tabiak kan kandah. Dom urang nan lac Đỗ Văn Quên, daok di tỉnh Đồng Tháp; Vann Nath, daok di tỉnh Kandal, negar Campuchia, yaok urang daok guk 3 thun saong Nguyễn Văn Khải, daok di tỉnh An Giang njauk guk 2 thun 6 bilan sa duis saong gauk “Peih bruk ba manuac tabiak negar suan hukum”. Hu thau, bilan 6 thun 2020, dom urang nan njauk chap hu tuk ba 3 urang tapa Campuchia suan hukum. Dahlau di nan, nyaom urang ni hu ba manuac tapa blaoh blai 3 mbang, ngan saong 12 urang tapa Campuchia.

Rajaei Canada brei thau meda padeih dom mbang par meng Ấn Độ saong Pakistan dalam 30 harei piah patrun patakik bruk njom mbak jit Covid-19. Ni lac negar bahrau di abih ba tabiak bruk pakauk par meng Ấn Độ. Tui Mintri y tế Canada, tuai damuai Ấn Độ meblah tal 20% di dom mbang par dunya saong labaih 50% dalam nan hu dương tính haong Covid 19 hadei di tuk dut iek di mblang kapar haoh. Dom tiểu vương quốc Arập thống nhất dahlau nan jeng brei padeih dom mbang par meng Ấn Độ. Harei 22/4, Ấn Độ mboh dom urang njom Covid-19 glaong abih ngan haong 332.500 urang njom bahrau, labaih 2.250 urang metai.

Liên Hợp quốc brei thau lac bruk srau kadau gah padai brah pandap mbang saong srau kadau gah jien padai dak harei dak trak meda ba tal eik lipa ka labaih 3 triệu 4 ratuh rabau menuac di Myanmar dalam 3 tal 6 bilan tal. Yaom brah haong menyek mbang angaok darak pasar dalam taneh ia nyu tagok 5% saong 18% meng puac bilan 2. Danak dak padai brah pandap mbang dunya daok hu panuac ieu rik daong 106 triệu USD brei ka Myamar, daok laik tame srau kadau hadei di bruk pajaleih karja di bilan 2.

Dom urang roh duah ilamu di sang bac đại học Ohio, Mỹ bahrau duah mboh sa lubang jhuk sit abih mbiah tal tukvak ini di dalam dải ngân hà, biak jaik haong ia harei. Ni hu brei thau lac duah mboh bahrau di abih ka dom lubang jhuk dalam vũ trụ, njauk hu pasang iek roh duah biak tani tanat. Dom urang roh duah ilamo brei thau, lubang jhuk trak labaih 2,6 mbang dut saong ia harei saong hu prein njuk tame abih janih daok jaik nan./.

Urang lang: Ái Nghiêm – Thu Thảo – 24/04