Adei Bùi Minh Thư, anek saih tal 8 sang bac Trung học cơ sở  Thanh Phú, ban sit Bình Long sang biak kan kandah: rup adei njauk ruak thận trak,  amaik adei njauk ruak gila tuk thau, tuk oh, klaak adei daok ka amuk ngoại taha umo labaih 60 oh daok pren ngak bruk. Dua amuk – taco tok maong tame sa sào pa-ok blait thun njauk thun oh, min anit taco amuk jeng oh mbuah kan hagait, harei harei amuk nao mek asar pa-ok blait mai laok kanduh pah piah duah jien mbang ka dua amuk taco saong raong taco mbang bac. Lingiu tuk bac di sang bac, mai sang adei jeng daok kham merat bac. Thun bac halei adei jeng lac anek saih naih joi. Adei Thư brei thau, kayua oh hu jien bac thêm yau dom ayut, bo dalam rup daok hu ruak bhian padeih bac piah nao iek ruak, nan ye khin bac samu dom ayut, adei njauk kham merat bac eng di sang, saong caik hatai tui pang cei gru anai gru pato, kan kandah yau nan, glaih glar yau nan , min adei brei thau oh ka tuk halei adei sahneng tal bruk padeih bac, lingiu bruk lac ruak kik oh nao bac hu.

       Hu thar vak kan kandah oh lah hagait Bùi Minh Thư lac adei Trần Thảo Vy, anek saih tal 5 sang bac Tiểu học An Lộc A. Hadei di tuk adei njauk bala 8 bilan ye ame di adei gaok bala metai nao, klaak veik 3 amaik anek adei metui medhar dalam baoh sang kayau sit taik tahak labaih 30m2 kayua ong amuk nội caik veik. Tui thun bilan, sang dak taik tahak jaleih tuk halei oh thau.  Sang oh hu taneh pala drak, 3 amaik anek pagam pambak tame dua sào taneh pala amraik kalu, oh caik ka dom anek padeih bac, amaik adei harei harei nao ngak pah duah jien raong adei sa-ai Vy mbang bac.

      Kayua oh hu jien iek ruak nan ye bala caik veik ndi chứng di tangin, takai, glo akaok, bruk nao mai, bac da-a di Vy biak kan kandah, brei hu amaik saong sa-ai likei daong. Yaom lac bac suai thau jang dom ayut, min adei oh nản chí, mặc cảm. Adei brei thau, oh ka tuk halei adei sahneng lac drei padeih bac, lingiu di bruk lac oh daok pren yava nao bac, ngan saong adei, bruk bac lac bruk adei ngak hu tuk ini. Saong tok hu bac meng daong hu ka amaik, ka adei yam tapa thar vak. Adei caong jeng bác sỹ piah daong amaik saong dom ayut hu thar vak dreih yau adei.

      Thau hu bruk kan kandah di sang drei, nan ye Vy biak kham merat. Lingiu tuk bac di sang bac, adei daok kham merat bac di sang. Anai Phạm Thị Hồng Anh – gru chủ nhiệm tal adei bac brei thau, adei Vy tari taring lo, lingik hajan ribuk atau li-an brak jeng brei amaik pajeng mai bac.

   Ini tok lac dua dalam rilo adei hu thar vak kan kandah kham merat yam tapa bac da-a siam urak ini dalam ban sit Bình Long.  Bruk kham merat yam tapa kan kandah bac da-a naih joi  di dom adei njauk lac dom kreih camin hadah piah ka dom ayut bac megru saong ngak tui, piah ka dom adei chreih chrai nao bac, padang hatai caong di drei. Saong dom adei njauk hu bruk daong ba di menuac sia piah hu ginup điều kiện cakrok patagok anak dom kan kandah di raidiuk./.