Te Tam Nduong

Piah tame ngak bruk khik hu salamat, patui veik bruk pacang caga jit ruak, hadei di tuk thau lac hu ngak veik, dom labik ngak mbang pablei salih di tỉnh Sơn La hu puh ramik haci hacih, caga siam di abih piah duh ka tuai. Sa-ai Bùi Ngọc Lâm, urang khik iek dom kuan mbang Lâm Tới, ban Sơn La brei thau: “Dalam bilan jit ini khol dahlak jeng khik kajap dom jalan ngak ka hacih sa-at pandap mbang menyum, jeng yau brei ngak njauk tui dom tacei pato di dom jabat y tế ka pacang caga jit Civid-19, piah ka sa lac khik caga hu salamat ka rup di urang ngak bruk, ka dua lac hu siam mekre ka tuai tuk tame kuan mbang.”

Ngan saong gah du lịch tỉnh Điện Biên,  meng akok thun tal ini njauk khat lahik ralo kayua jit ruak Covid-19 rah tabiak. Min, dom labik inem mek  hu peih pabah mbang veik meng puac bilan 4 piah taduan tuai. Nan ye, piah khik kajap bruk pacang caga jit, ye meng tuai, urang ngak bruk duh ka tuai saong dom urang langyah ka tuai pang  jeng brei cuk khẩu trang, rao tangin pametai anek ruak saong dut iek pandiak dalam rup.

Ong Nguyễn Anh Đạo, Yam ndoc MBan Khik iek inem mek tỉnh Điện Biên brei thau: anak meta mda mboh dom bui sambai, kham merat ngak brei tagok veik gah du lịch lac bruk ngak mbang duah hu rilo kein laba di tỉnh. Min, gam saong rilo tỉnh karei dalam taneh ia, du lịch di Điện Biên brei hu rilo bilan meng meda hu veik yau dahlau diah: “Tui kuhria brei hu meng sa tal dom bilan, kayua brei hu tuai  dalam taneh ia mai Điện Biên. Kayau yau nan ye, dalam tukvak anak tal khol dahlak daok pataom tame ramik pasiam labik piah raok tuai hu siam di abih. Ka dua lac ba tabiak jalan pasram ka dom urang langyah ka tuai pang piah bruk ngak di labik inem mek duh hu ka tuai mai rivang main dulich di Điện Biên.”  

Ngan saong Công ty cak rok patagok tea Tam Đường hu  jabat sang mac di phường Đoàn Kết, ban Lai Châu, tỉnh Lai Châu, meng akok bilan 2 bhian lac tuk ngak takik. Bruk nan ba tal yaok ribau baoh sang urang nong mbaoh tangin tame harak pablei tea ka Cty saong yaok rituh urang ngak di công ty kurang bruk ngak. Anak kan kandah yau nan, hu bruk daong samar chip di Gilang pariak Viet Nam, brei ramik veik tukvak bayar sraiy, miễn, trun jien laba, khik tamo nyaom srraiy piah daong ka urang hu mesre, nan ye trun meneing kan kandah ka doanh nghiệp. Muk Nguyễn Thị Loan, Yam ndoc Công ty cak rok patagok tea Tam Đường brei thau:  “Tukvak ini, công ty taduan hu bruk sangka, klah rabha di gilang pariak BIDV..Dom pok sraiy tukvak pagap mbiah, tuvak suai lavik tal bilan 6 thun 2020 ye hu trun meng 0,5 tal 0,7% dalam thun. Dom phun jien mesre tukvak katut panak ye urak ini jeng trun 0,5%  saong gilang pariak jeng hu khan brei thau blaoh”.

Daok di tỉnh Yên Bái, bruk pacang caga jit Civid-19 dalam tukvak birau jeng hu dom doanh nghiệp, công ty di tỉnh brei peih ngak catang piah khik prein yawa ka urang ngak. Tapa nan, kham merat yam tapa kan kandah piah pasiam veik dom bruk ngak mbang, pablei salih.

Tui ong Phan Thúc Hào, Yam ndoc Công ty Cổ phần Cao su Yên Bái, urak ini cong ty hu 200 urang ngak tui harak pambuak bruk saong labaih 500 urang ngak tui bilan, ralo meng lac urang bangsa takik daok dalam tỉnh. Tukvak ini Công ty daok pataom tame blei pandap panda, mac jamriah, patao pasram urang ngak  piah tame bilan kuac mek katak cao su birau. Kayua yau nan ye, Công ty Cổ phần Cao su Yên Bái hu peih ngak rilo jalan piah khik hu salamat, pacang caga jit: “Cong ty thau lac meyah caik rah tabiak jit Covid-19 meda ngak kan kandah ralo tal bruk ngak mbang di cong ty, yau: brei daok karei, brei peih ngak jalan pacang caga jit, pruh jru pametai anek ruak…Yau nan ye, Công ty hu ba tabiak tacei pato  ka dom kapol kuac mek katak, tacei pato jeng yau duah thau ka bruk di tỉnh, di Mentri Y tế piah khan ka urang ngak  bruk hu thau, piah patrun patakik khat lahik.”         

Dalam tuk jit ruak Covid-19 di negar drei daok hu pacang siam, bruk ngak tabiak pandap panda pablei salih hu peih ngak veik, caong khin lac raidiuk di bhap bini, dalam nan hu bhap bini dom bangsa takik di dom tỉnh, ban dalam taneh ia meda trun hu kan kandah, samar  tani tanat saong cak rok patagok dalam tukvak anak tal./.

Urang lang: Aí Nghiêm  12/5/2020