Meng hatai saneng kak kajap suai lavik haong bruk y khoa, rik daong iek glang pren yava siam abih ka bhap bani, labaih 5 thun tapa, bác sỹ ranaih bangsa Cam Bá Duy Khương palei daok pak Ninh Thuận oh padeih kham merat bac megru, paglaong ilamu piah gam saong kapul urang y, bác sỹ Sang iek ruak Gia Định Bal raya Hồ Chí Minh iek glang saong cấp cứu ralo urang ruak tapa truh metai lahik.

     Bác sỹ Bá Duy Khương ndih tapui thun 1985 dalam sa baoh sang urang nong daok pak pali Cam Hữu Đức, xã Phước Hữu, huyện Ninh Phước, tỉnh Ninh Thuận. Bác sỹ Khương lac anek likei ka 3 dalam baoh sang hu 5 adei sa-ai. Rai diuk kan kandah oh pacang cakak hu hatai takre ngak gah y khoa, caong khin ba pren di drei brei ka bruk iek glang pren yava bhap bani. Lac urang takre bac, kham merat, tari taring nan ye hadei di 6 thun bac megru ye mek hu bằng bác sỹ đa khoa Sang bac Đại học y dược Bal raya Hồ Chí Minh (di thun 2010), hu bruk meyaih khan di gru pato, bác sỹ Khương nộp hồ sơ tame sang iek ruak Nguyễn Tri Phương saong hu brei bruk ngak di khoa tim mạch. Ngak hu sa thun, bác sĩ Khương hu salih tapa sang iek ruak Gia Định – sa dalam dom sang iek prong di Bal raya Hồ Chí Minh. Ini lac labik lagaih, labik pataom ralo bác sỹ naih jioy piah ka dom bác sỹ ranaih yau sa-ai hu bac megru, paglaong ilamu ngak bruk di drei.

       Yam tame labik ngak bruk bahrau, oh huac kan kandah, glaih glar, bác sĩ Khương taduan ngak bruk di khoa cấp cứu. Ini lac labik hu bruk ngak kan, bác sĩ brei hu ilamu naih jioy, ranam bruk ngak, anit urang ruak biak biai, kayua lac tok chẩn đoán suan atau caik suai hasit ye mbuan ba tal metai. Piah paglaong ilamu, dalam tuk ngak bruk bác sỹ  jeng duah ralo tài liệu gah y khoa; tame dom khóa bac katut panak gah xét nghiệm, điện tim, nội soi, citi, Xquang… bac megru, klah rabha ilamu haong dom ayut di dom sang iek ruak karei dalam bal raya piah pataom, pabak ilamu. Kayua yau nan ye, yaom lac umo daok ranaih, min bác sĩ Khương langyah bruk chuyên môn biak samar.. Bác sỹ Khương khan veik, hu ca cấp cứu kan, urang ruak njauk sốc tim, tắc nghẽn mạch vành biak mbuan metai. Bác sĩ Khương samar  xử lý chính xác, brei caik sốc điện, điều chỉnh huyết áp tani tanat ka urang ruak, can thiệp mạch vành, chụp hình piah duah mboh labik tim tắc nghẽn, daong plaih metai ka urang ruak.

      Hadei di ca ruak akaok mereip nan, hu biak ralo ca ruak kan karei yau: chấn thương sọ não, chấn thương hatian, dom ruak gah tim mạch… hu sa-ai chẩn đoán saong ba nao cấp cứu samar drah, pasiam veik pren yava samar. Meng nan, bác sỹ Khương hu sang iek ruak, dom đồng nghiệp saong urang ruak anit ranam, caik hatai jia.

          Urak ini, bác sỹ Khương daok bac tal chuyên khoa gah hồi sức, sa-ai tuk halei jeng pachreih rup drei roh duah dom kadha bahrau piah ngak siam jang bruk iek glang pren yava ka urang ruak. Oh lac ngak siam bruk chuyên môn, bác sỹ Khương jeng bhian daong ba, tacei pato dom đồng nghiệp ranaih thau cambaih ka bruk di urang ruka. Sa-ai daok hu nao gam haong 10 kapul thiện nguyện di bal raya nao iek ruak saong brei jru ka bhap bani bangsa takik kan kathaot di dom tỉnh Bình Phước, Đà Lạt, Tây Ninh; tacei jalan, yaih khan bác sỹ naih jioy atau sang iek ruak điều trị chuyên sâu dalam bal raya piah daong ka ralo urang ruak bangsa Cam, urang bangsa takik di dom labik karei njauk ruak trak hu jalan iek ruak siam abih, samar pasiam veik pren yava; atau jak ba rik daong jien padai daong ka dom urang ruak ung thư hu rai diuk kan kandah di Sang iek ruak Ung bướu…

          Bác sỹ Trần Văn Lượng – Khoa nội tiết Sang iek ruak đại học Y dược Bal raya Hồ Chí Minh, đồng nghiệp dahlau deih di bác sỹ Khương brei thau:  Ndom puac haong adei sa-ai ye Khương biak siam, hu dom ca ruak ye Khương tuk halei jeng daong ka đồng nghiệp piah hu dom jalan ngak siam piah điều trị ka urang ruak. Hu dom bác sỹ nao thực tập dalam khoa di Khương ye Khương abih hatai tacei pato veik dom ilamu bo Khương hu tapa blaoh. Daong ka dom bác sỹ ranaih bac megru, roh duah y khoa.  

     Tui Bác sỹ Bá Duy Khương, kiến thức y khoa biak prong, bac megru luac rai jeng oh ka ginup abih. Ngan saong bác sỹ ranaih njauk bac megru, duah thau yaok harei, yaok tuk. Bruk y khoa nyu oh yau bruk karei lac tui ilamu meng dahlau bo tuk halei jeng duah thau dom janih ruak bahrau tamuh piah hu jalan iek ruak ka nyu njauk, ka nyu samar. Sa-ai jeng caong khin hu mbaok nao gam haong dom bác sỹ ranaih nao tal bhum atah bayah, labik kan kandah piah iek ruak saong brei jru ka bhap bani kathaot rambah, daong ka dom urang nan hu pren yava siam jang piah cakrok patagok kinh tế, salih bharau rai diuk./.