-Meyah dahlau diah tuk mboh pren yava oh siam, amuk Trần Thị Ngoan (daok di phường 8 quận 11) kuhria caga meng melam dahlau piah mesup harei hadei tame pasak ban raya iek ruak. Amuk Ngoan brei thau, medeih meng 5 tuk page mesup blaoh anek taluac pajeng tame sang iek ruak mek số, dak hàng, abih sa harei meng iek ruak hu. Barau ini, mahit ayut sahabat yaih khan ka chất lượng iek ruak di sang iek ruak Quận 11 oh lah hagait dom sang iek ruak đa khoa di pasak, bo daok jaik sang yau nan ye mbang ini amuk nao takai mai tal ini iek ruak. Oh ka tal dua tuk meng tukvak hu mbaok di sang iek ruak, amuk Ngoan hu par dalam tangin kết quả saong paok jru piah nao sang. “ Dahlak mahit urang lac pak ini bác sĩ iek ruak lac dom bác sĩ sang iek ruak tuyến angaok trun, bác sĩ saong dom urang jakar y tế abih hatai sangka, libik daok laneng bingi la-ar, hacih saat, oh mertiak gauk daok. Dahlak mboh biak njauk hatai saong meda salih thẻ bảo hiểm y tế mai di ini ka mbuan lagaih iek ruak”, amuk Ngoan khan lac yau nan. Oh ta-eng hagait amuk Ngoan, bo rilo urang ruak karei jeng mboh biak njauk hatai tuk iek ruak pak ini. 

Tui bác sĩ Phạm Quốc Dũng, Giám đốc sang iek ruak Quận 11, sa dalam dom jalan ngak di sang iek ruak piah dui pachreih urang ruak lac sang iek ruak hu daa dom chuyên gia di dom sang iek ruak tuyến cuối padheih hưu bloh ngak cố vấn chuyên môn brei, hu mboah tangin pambuak bruk jao brei kỹ thuật haong dom sang iek ruak tuyến angaok di ban raya. Meyah tukvak tabung glaong akaok thun 2016, sang iek ruak tok iek ruak ka 700 - 800 mbang urang ruak sa harei ye sa thun hadei, urang ruak mai iek ruak tagok tal 1.400 mbang, harei tabung glaong tagok tal 1.750 mbang. Sang iek ruak hu blei dom janih jamriak barau saong ngak pasiam rilo duk piah rami ramik veik dom khoa, phòng lagaih ka bruk ngak, saong daok khang hatai dak padang đề án mesraiy jien kích cầu, pambuak bruk saong dom công ty trang thiết bị blei jamriak xét nghiệm meng phun jien xã hội hóa, peih ngak kỹ thuật xét nghiệm barau piah pabak bruk blac raih, chẩn đoán saong iek ruak. Meng hu yau nan bo bhapbini jia tame sang iek ruak Quận 11.

-Sa sang iek ruak jeng daok salih barau yaok harei oh lah hagait nan lac sang iek ruak Quận 9. Meyah dalam dom thun camereip ngak bruk, dom janih kỹ thuật di sang iek ruak tok hu 30% - 50%  ye urak ini  hu 80% dom janih kỹ thuật di sang iek ruak hạng 3. Tui bác sĩ Nguyễn Khoa Lý, Giám đốc sang iek ruak Quận 9, bruk buh jien tabiak blei rilo trang thiết bị hu daong ka sang iek ruak peih ngak hu siam dom kỹ thuật barau yau: blac raih nội soi viêm ruột thừa, blac raih nội soi huan tung pruac, blac raih nội soi cakak hạch giao cảm, blac raih nội soi u nang buồng trứng, blac raih mek anek kamar mbang ka dua tagok. Taphia nan, sang iek ruak daok sangka pandar hệ thống công nghệ thông tin dalam bruk khik ramik, tacei pato dom bruk iek ruak, piah salih barau meng bruk taduan raok tal bruk iek ruak piah dui katut tukvak iek ruak, bayan kết quả chiếu chụp, xét nghiệm awar; padang bruk xác nhận bàn giao njauk menuac ruak saong urang jakar y tế. Yau nan ye, dom urang ruak mai iek ruak nội trú saong ngoại trú jeng tagok jang duk saong dom bilan ini thun dahlau. Dalam thun 2018, abih tih dom mbang iek ruak di sang iek ruak Quận 9 lac  171.119 mbang, tagok 10,42%,  iek ruak nội trú lac 7.667 mbang, tagok 12,6%. Bruk ba tagok tuyến angaok trun 18% duk saong thun 2017.

-Tui PGS-TS Tăng Chí Thượng, Phó Giám đốc Sở Y tế ban raya HCM, dalam thun bloh, dom sang iek ruak tuyến ala hu đầu tư saong  patagok biak sumu gauk di rilo gah. Kayua ini hu maong lac bruk piah paglaong chất lượng iek ruak saong ngak patrun bruk quá tải di dom sang iek ruak tuyến angaok. Dalam thun 2018, hu 8 sang iek ruak quận/huyện hu padang ngak barau, ramik pasiam saong blei  rilo trang thiết bị kỹ thuật bahrau, paglaong tangin ngak di dom y, bác sĩ... piah duh ka bruk iek ruak. 

-Rilo sang iek ruak tuyến ala oh lac pabak hu bruk iek ruak di  bhapbini puk palei bo daok taduan raok dom urang ruak mai meng rilo tỉnh karei. Tabhia nan, thun 2018 jeng lac thun akaok meti hu dom bác sĩ barau tốt nghiệp tut angan mai ngak bruk di dom sang iek ruak tuyến huyện rilo di abih. Sở Y tế hu brei 327 bác sĩ barau tốt nghiệp di sang bac Đại học Y khoa Phạm Ngọc Thạch mai ngak bruk di dom sang iek ruak tuyến huyện saong dom sang iek ruak đa khoa khu vực di ban raya. PGS-TS Tăng Chí Thượng caong lac: “Meng bruk đầu tư gah anek menuac, cơ sở vật chất saong thiết bị máy móc, dom sang iek ruak quận/huyện daok dak harei dak salih barau piah pabak bruk iek ruak jeng yau hatai caong di bhap bini”./.

Thúy Linh