Ramik caga pandap panda ka urang njom Covid 19

Meng ban sit tapen negar Bình Hiệp, khin nao tal bilai  pacang caga jit ka 4 di đồn Biên phòng pabah  mbang negar pakat dunya  Bình Hiệp (tỉnh Long An) njauk nao tapa dom mbiah jalan bak thun mun. Bilai  ka  4 dok di kreih sa mblang hamu, daning pacang bạt, atah di nan dom rituh mét lac dom labik main mbia di negar ayut  Campuchia. Urang lin biên phòng di bilai tuk halei jeng hu mbaok luac harei melam, kayua pak ni hu rilo jalan sit, jalan  vaih, oh caik hatai hasit ye khol nyu cang tal lavik melam piah nao tapa jalan  tapen negar suan hukum. Ngan saong Urang lin  biên phòng di bilai ka 4, dok dalam sup palup  oh hu điện, oh hu ia nan ye 2, 3 harei Meng menei ia sa mbang, min rambah di abih lac langik harei nyu pandiak khang, melam nyu liar, nan  oh ka ndom tal  rilo mbang “lisei srau haluk” kayua dom mbang hangin  meng dom mblang hamu par tapak tame labik daok.

Bilai pacang caga jit ka 1 di  đồn Biên phòng Lộc Thiện (Bình Phước), dok taeng di angaok mbon cao su jaruk hala. Harei camereip, bilai tok pacang tagok dom blah bạt, sa boh gom di bhap bini brei nyim. Langik pandiak, nan ye gam song dom mbang nao khik iek, urang lin biên phòng mek hala  buông mai ngak daning, ngak tabung, cong ngak patrun pandiak tal khuah klik di bhum tapen negar  di tỉnh Bình Phước. Adei saai urang lin di bilai hu panuac ndom sambai lac, ni “bilai brei dok karei” , kayua yaok mbang, quân y tagok dut iek, nhiệt độ thei jeng tapa tanut kayua langik pandiak nyu njom tame rup. Dok melam mai urang lin pak ni kak yin ndih  pak di jalan sit. Thiếu tá Phạm Đức Tuân – Phó đồn trưởng đồn Biên phòng Lộc Thiện daok brei thau lac:

"Jala nyu pandiak , rilo rui, adei saai jeng dok dalam kamo huak lisei. Hadei di nan, tabiak duah phun kayau kayua bier harei pandiak lo. Rilo kapul nyaom sangka mai brei pandap, min dok dalam lán oh khin dang lavik kayua langik pandiak lo".

Dom tuk lahaiy, Đại úy Hoàng Văn Điệp (umo 31 thun, akaok kapul ka 1 di  đồn Biên phòng Lộc Thiện ieu phone mai pachreih ba duik . Tui nan sa mbang tra, saai  “tavak sraiy” puac sinya daok tapen diuk tuk saai pandik tian ndih tapui anek. Mbang camereip atah di ni 6 thun, tuk saai jaik ndih tapui anek kacua jeng lac tuk đơn vị di saai hu mbaok tame  “bruk patagok khik iek”. Dok mbang ni, saai song  dom ayut hu mbaok tame bruk mesruh  pacang  Covid-19 labik tapen negar. Yaom lac hu urang jakar dang akaok daong palagaih, min  Đại uý Hoàng Văn Điệp khang hatai klaak veik bruk di drei, piah gam song ayut hu mbaok tame mesruh pacang Covid-19:

"Hulin jeng khin nao pachreih hatai duik, min dok dalam tuk yau urak ni, meng bruk di 1 urang lin quân hàm hijao, hu mbaok khik iek labik tapen negar pacang cakak song jhul kandun likuk jit ruak. Drei lac sỹ quan meyah oh khang hatai ye oh tacei pan akaok ba jalan  adei saai gah ala hu".

Dalam bruk mesruh pacang  Covid-19, tuk  Bộ Tư lệnh Bộ đội Biên phòng brei patagok menuac tui iek saong khik caga jalan tapen negar ye rilo urang lin biên phòng di dom tỉnh tapen tasik  yau : Trà Vinh, Bến Tre, Tiền Giang hu ba tagok bhum tapen negar angaok mbaok haluk .

Thiếu tá Huỳnh Văn Đẹp dalam Phòng Trinh sát di Bộ đội Biên phòng Trà Vinh lac sa dalam  75 urang lin hu ba tagok piah hu mbaok pacang caga jit di tapen negar  tỉnh Long An. Min, kan kandah di urang lin tasik tuk tagok bhum tapen negar angaok mbaok haluk samar hu  đồng đội klah rabha, anek kamei di saai bhian ieu phone pachreih hatai: Ame khang hatai piah ngak siam bruk , nan ye saai biak sahnang hatai. Thiếu tá Huỳnh Văn Đẹp brei thau:

"Urang ame halei jeng yau nan, hatai jeng suh sah kayua amaik ame ong muk daok atah, min drei jeng thau bruk prong lac pacang jit  Covid-19. Meyah oh ngak siam bruk ngak ye duhsa hong adei saai, mik va , haong Đảng. Njauk ngak siam bruk di drei dalam tukvak yau urak ni".

Bruk mesruh pacang  Covid-19 di khol drei yam tapa tuk vak bahrau, bruk ngak mbang, ngak huak di khol drei jeng dok mai veik yau dahlau daih, min ngan song urang lin  biên phòng di tapen negar , urang jeng dok  dang di kreh pandiak, kreh hajan piah ngak siam bruk bo Đảng, karja song bhap bini jao brei dalam bruk mesruh  pacang Covid-19./. 

Urang lang: Hanipha -8/5