1#Harei 15/6 Quốc hội nyoam mbang tamat hadei di 19 harei ngak bruk. Tui danak dak, Quốc hội hu biểu quyết brei tapa Hukum pasiam veik. Patui di nan, Quốc hội nyaom mbang tamat, biểu quyết brei tapa Sarak ka bruk tangi sua di bang nyaom ka 5, Quốc hội mbang XIV; Sarak mbang nyaom ka 5, Quốc hội mbang XIV; bloh urang dang akaok Quốc hội brei panuac tamat mbang nyaom.

2 Harei 14/6), 300 dam dara urang daok ranaih di  ban Đà Nẵng hu brei  labaih 250 đơn vị darah , pabak ka dom  cơ sở y tế, sang iek ruak  ban Đà Nẵng. Thun ni, Đà Nẵng hu peih jiak 100 mbang halan hatian brei darah, pataom mek labaih 36.000 đơn vị drah. Urak ni, Đà Nẵng lac labik hu urang brei darah glong abih dalam negar. Dalam ban hu  30 kapul  caga brei darah song kalup  kapul halan hatian brei darah hu jiak  2000 urang.

3# UBND ban sit Cần Thơ bahrau ngak bruk haong ong Simon van der Burg, Tổng Lãnh sự Hà Lan di ban raya Hồ Chí Minh ka dom bruk dalam patagok ngak nong công nghệ cao saong pacang caga biến đổi khí hậu. Brei panuac di var ngak bruk, amuk Nguyễn Thị Kiều, Phó Giám đốc Sở ngak nong saong patagok palei pala Cần Thơ brei thau, Cần Thơ thau lac công nghệ cao lac jalan peih tabiak ka gah ngak nông mbeik drei tame. Tukvak tapa, bruk pandar công nghệ cao hu ban raya peih ngak catang, ba mai ralo kein laba.

         4 # Melam 14/6, sa bala khang rah tabiak di angaok krong Hậu, labik nao tapa tỉnh An Giang. Hu 1 urang metai, 1 urang lihik  song  3 urang njauk rambuac. Tui panuac khan, tuk vak nan kapul pasang iek gah tỉnh An Giang hu: Cảnh sát môi trường, urang jakar Sở Tài nguyên - môi trường song dom gah chức năng. Tuk kapul peih  ca nô tal labik  phà An Hòa, ban sit  Long Xuyên, tỉnh An Giang ye paoh gauk haong sa baoh sà lan.

5# Bruk cang maong World Cup 2018 di Bạc Liêu  biak chreih chrai. Urang takre dit blong nao blei tivi bahrau, caga dom janih piah tui iek bruk pakacah 4 thun meng hu sa peih tabiak sa mbang. Tui nan, gah chức năng tỉnh Bạc Liêu brei patagok bruk pasang iek, oh caik rah tabiak bruk cá độ, co klaik, srau kadau puk palei.

              Patui di ni dom khau tin dunya :

            6 # Karja Căm-pu-chia brei am cuh klaak labaih 100 tấn pandap mbang oh siam, ngak suan hukum song hu  hóa chất, hu cap mek meng thun bloh . Tui akaok mintri Nội vụ Căm-pu-chia, ong Sa Kheng (Sar Kheng), ni lac mbang am cuh klaak pandap ja, oh siam prong ka 3 kuhria meng bilan 10 thun blohi. Dom pandap hu jru hóa chất oh brei pandar tui hukum  negar Căm-pu-chia, kayua nyu meda ngak brei ung thư song dom janih ruak ba tal metai.

7 #Tổng thống Vê-nê-duê-la Ni-cô-lát Ma-đu-rô (Nicolas Maduro) harei 14/6 hu tacei urang dang akaok Quốc hội lập hiến Đen-xi Rô-đờ-ri-ghết (Delcy Rodriguez) ngak phó tổng thống. Ini lac sa dalam dom kham merat pasiam rajaei di tổng thống Ma-đu-rô hadei di tuk ong tái cử bilan dhlau. Jeng dalam harei 14/6, tổng thống Ma-đu-rô hu tacei 10 akaok mintri bahrau, min oh salih dom urang dang akaok dom mintri dầu mỏ, kinh tế saong quốc phòng

          8 # Harei 14/06, dom urang cứu hộ  Inđônêsia hu ba dom urang njauk rambuac dalam mbang  2 kapan kram di bhum tasik negar ni, tal dom sang iek ruak dok jiak nan piah iek ruak, 2 mbang kram kapan di   Inđônêsia ngak takik di abih 15 urang metai song dom pluh urang karei urak ni oh ka duah mboh ./.