Kapol Kong nghiep - Nang luong Pakat negar Viet Nam peih ngak danak dak “PetroVietnam - Xuan Pambuak  - Tet Anit ranam” di phuong Tam Thắng, TP Vũng Tàu klak, TPHCM. Di danak dak, Petro Vietnam hu lì xì Tết ka 60.000 urang ngak, daong 1.100 harak ve, ve radaih oto ka urang ngak bruk nao palei mbang Tet; daong jien ramik pasiam sang daok ka dom  baoh sang gaok bala. Langiu di nan, Kapol PetroViet Nam hu alin 6 ti dong daong ka danak dak “ Daong urang kathaot 2026” ka TPHCM, Dong Nai saong Tay Ninh; alin 3 ti dong piah kuhria ka urang ngak raidiuk kan kandah, jien bilna takik, alin 1,5 ti dong piah ngak Tet ka urang ngak bruk.

Kong an  tinh Dong Nai pambuak haong karja palei saong dom dom vi pambuak bruk peih ngak danak “ Daong urang tapen negar” ka mikva di xã taphia negar Lộc Thạnh, tỉnh Đồng Nai (dahlau tỉnh Bình Phước). Dalam nan hu jaik 500 bhap bini saong anek saih hu mbaok Darak Tet zero dong, cakak mbuk oh mek jien, ngak mekre sang bac adei…Njauk ndem tal, Mban peih bruk hu alin 30 paok pandap Tet, yaok paok 2 trieu dong) ka dom adei anek saih saong sang kan kathaot.

Tỉnh Vĩnh Long birau peih ngak Tet Bol lin bhap bini di xã Ngãi Tứ. Tet Bol lin di xã Ngãi Tứ brei ngak pasiam dom jalan mbak nao mai, pagam gom truac pahadah; pagam jalan ia hacih. Ngak sang, rivang, alin kaya ka baoh sang dalam sarak karja, boah sang jaik kathaot, baoh sang hu urang tagok jalan ngak bol lin; peih dom bruk pasram rup pabhap, bac megru ilamo nghe thuat, var huak  “ Tet Bol lin”…gam peih ngak sarak an sinh xa hoi, bui sambai. Dahlau diah tinh Vĩnh Long hu ngak Tet ka bol lin saong bhap bini di xã Bình Phú saong xã Chợ Lách. 

Pasak Daong Dam dara Kong an TPHCM pambuak haong don vi daong pasang iek radaih saong salih nhot radaih oh mek jien ka labaih 2.000 urang ngak kong, urang ngak bruk kan kandah di TPHCM. Langiu di nan, Mban peih bruk hu alin 400 paok pandap ka urang ngak kong kan kandah, yaok kapol yaom 500.000 dong. Urang hu mbaok mbang di hu iek ruak meta oh abih jien. Ini lac thun ka 3 harei roya jum pataom hu peih ngak.

Tuk jaik Tet, yaom pabui diuk, pabui rilo di tinh Dong Thap tagok glong labaih 7,5 trieu dong sa tạ, yaom pabui tagok tal 8 trieu dong sa tạ. Yaom nan, yaok tạ pabui urang laba pabaih jiak 4 trieu dong. Yaom lac pabui tagok min jit ruak pabui chau Phi daok rah tabiak sraw kadau. Dalam bilan tapa, dalam tinh hu jaik 600 drei njom ruak. Tinh Dong Thap lac bhum palei hu tapon manuk ada praong abih  di bhum taneran kraong Cuu Long labaih 470.000 drei.

 Hadei di ini hu khaw tin ndem ka bruk jayak di lien minh ka bruk palih ruah Ha vien mbang 51 dalam melam 8/2, Thu tuong Nhật Bản Takaichi Sanae peih sa bruk ginum biai. Thu tuong Takaichi Sanae khan lac pataom tame dom bruk tani tanat raidiuk xa hoi, brei caik hatai tal dom bruk pacang yaom pabui pablei tagok yaom yau urak ini. Rajaei Nhat Ban jeng jhul pakhang dom jalan ngak piah pakhang bruk an ninh - quoc phong, ngoai giao, gam tani tanat bruk karja.

Rilo bhum palei praong di grauk negar Tây Ban Nha patui bruk pacang caga hadei dom mbang ribuk tuh tame, hajan praong, hangin saong ribuk trak. Yaok pluh ribau urang gaok kan kandah, dalam nan hu labaih 11 ribau urang di  Andalusia brei ramik. Jaik 170 jalan dalam negar pacang tavak kayua ia ribuk sua, dalam tuk dom jalan pasei di taneh ia taphia Bồ Đào Nha pacang. Jabat kuhria langik pakat negar khan lac langik daok hajan veik dalam dom harei anak tal.

Rajaei  Campuchia daok peih ngak sa bruk bika praong piah chap mek saong ramik hacih dom kapol co blah online di negar. Bruk ini daok ba tabiak paga pacang bhong meriak, ba tabiak bruk caong khin ralo abih lac chap mek abih dom kapol nyaom co blah, pagat dahlau di bilan 4, piah khik caga siam ka bhap bini plaik njiak bruk pagat online biak kan thau di dunya. Meyah tinh atau ban halei daok hu mbih dom labik pagat pachot online, urang jakar labik nan njuak taduan abih bruk anak rajaei./.