“Kapal ahaok pajeng urang kong doan thun 2026” peih ngak 3 mbang karei di gauk, par meng TPHCM tal dom bhum Barak saong bhum Kreh negar, ba labaih 550 urang ngak nao palei mbang Tet. Tong Lien doan Lao dong Viet Nam daong 500 harak ve, Vietnam Airlines daong 50 harak ve oh mek jien ka urang kathaot raidiuk kan kandah saong ngak tui sarak daong trun yaom tuk Tet. Langiu di danak dak “Kapal ahaok pajeng urang kong doan” kuhria daong labaih 2.000 harak ve radaih pui nao saong mai gam hu pandap tet, kayua dom bhum palei pambuak bruk haong Kong doan Jalan pasei Viet Nam peih ngak.

Bo Chi huy Bol lin tinh Vĩnh Long birau peih pakak Tet Bollin - Bhap bini thun 2026. Tet Bol Lin - bhap bini thun ini hu peih ngak gam haong bruk pakacah “ Daong prein padang palei pala birau”, “ Pajum prein daong ka urang kathaot - oh caik veik thei daok gah likuk”. Di xã Bình Phú, tỉnh Vĩnh Long, rilo danak dak, bruk khik brei tani tanat raidiuk hu peih ngak lagaih haong raidiuk bhap bini. Langiu di nan daok daong padang ngak birau saong ramik pasiam 17 baoh sang ka urang dalam sarak karja, baoh sang kathaot, jaik kathaot.

Mentri Ilamo, The thao saong Yulit palih ruah tinh Gia Lai dang peih ngak Thun Yulit pakat negar 2026. Ngan haong kadha “ Gia Lai - Caik glai pambuak haong tathik hijao”, brei mboh kadha pambuak ceik glai gam haong kaoh pulao tathik, langik siam gheih  saong ilamo biak karei, bruk khik ramik saong patagok khang kajap. Tui kuhria hu 244 bruk ngak gah yulit, ilamo soang padhih the thao peih ngak luac thun, hu 22 tinh, ban dalam negar tame.

UB bhap bini tinh Dong Nai peih bruk padang ngak, peih jalan brei radaih tapa dom danak dak praong. Ini lac dom danak dak rik tame ngak siam jalan mbak, peih praong labik patagok saong pabak prein khang ka kinh te - xa hoi tinh Dong Nai. Dalam nan, bruk mboh siam abih lac ngak salah tatua Thống Nhất saong jalan pasak lac danak dak praong, rik tame ngak siam jalan mbak  dalam ban Bien Hoa.

Dalam bilan 1 meng tapa, bruk patagok kinh te di tinh Dong Thap ngak brei tani tanat. Njauk ndem tal lac bruk ngak tabiak di kong nghiep  bilan 1 kuhria tagok 2,9% dut saong bilan dahlau; kuhria abih tih kaya pablei le saong jien mek tame  di bilan dahlau labaih 25.500 ti dong, tagok labaih 28% dut saong tukvak ini thun dahlau. Bruk ngak mbang pablei salih tabiak negar  mboh hu lagaih  tuk rilo kaya yau baoh kayau, kaya ikan…jien mek tame ralo.

Dalam dua adit tapa, rilo bhum palei di Nhat Ban gaok rilo mbang langik la-ar saong tuyet laik kapal. Urak ini, hu 30 urang metai, labaih 290 urang njauk rambuac, rilo jalan mbak, sang danaok, radaih, phun pala…khut metai. Anak dom bruk khat lahik trak, Rajaei Nhat Ban peih bruk ginum biai kuhria caga saong iew bhap bini jeng yau dom gah brei daong pacang bala tui rilo bruk piah hu lagaih dalam tuk ramik tuyet. 

Thai Lan saong Campuchia peih bruk ginum biai yaok bilan dalam di UB bhum taphia negar, piah pambuak khang bruk ngak brei salamat, tani tanat raidiuk di labik taphia negar. Dua gah brei mboh bruk khik siam padeih mesruh; dom bruk pambuak tal brei parabha jalan negar hu ginum biai. Tui nan, kakei bhap bini  taduan khaw tin meng dom jalan cambaic laic  klah meluh, ba mbuan lagaih langyah dom bruk di labik tapen negar.

Sa mbang apui khuah biak trak rah tabiak di dom labik daok di bhap bini di bhum gah Pur Malaysia, ba tal 40 baoh sang apui khuah mbang abih saong yaok rituh bhap bini brei ba nao labik karei. Karja bhum palei peih sa pasak daong anak meta, taduan raok labaih 300 urang gaok kan kandah. Dom jabat chuc nang daok pasang iek, ngak brei sambaic laic bruk apui khuah./.