Akok UBND TPHCM ong Nguyễn Văn Được birau mai rivang, alin pandap Tet ka labaih 400 baoh sang bhao bini di 4 xã  huyen Hoc Mon dahlau diah. Bruk peih ngak dalam tuk chreih chrai dom harei jaik Tet thun nethak Athaih Waw 2026, brei mboh  bruk sangka  di urang ngak praong Ban raya HCM ka bruk khik tani tanat raidiuk xa hoi, piah grauk manuac urang  hu mbang tet ginup, raok thun birau, bian pataih rilo bui sambai. Bingun Tet Nguyen dan 2026, TPHCM pataom tame rilo prein khang, peih ngak sumu gauk  dom sarak daong ka urang ngak bruk daong taneh ia dahlau diah, baoh sang kathaot, jaik kathaot soang dom urang mbuan gaok kan kandah.

Di Ban Can Tho, tapa 20 thun peih ngak Tet bol lin padang ngak birau, ramik pasiam hu 1.075 baoh sang ka dom urang dalam sarak karja, baoh sang kathaot…Alin 16.000 paok jien bac saong 4.570 sruh radaih juah ka saih bac naih joi, raidiuk kan kandah; alain 48 tu garong tapuk hukum ka dom baoh baha; padang 48 pambang palei ilamo; padang ngak saong paglong labaih 473 km jalan nao mai dalam pablei. Iek ruak oh mek jien, alin pandap ka 168.000 bhap bini.

Kayua darak pasar samar blei baoh thanh long daok tagok ralo, yaom tagok min oh hu baoh ginup pablei. Di tinh Dong Thap urang blei baoh thanh long hatai bhong janih 1, yaom 35.000 dong sa kilo, hatai patih yaom 40.000 dong sa kilo, yaom ini tagok glong dut saong adit dahlau meng 3.000 – 5.000 dong sa kilo min oh hu peih pablei. Yaom nan , yaok kilo baoh thanh long janih 2 ba mai kein laba ka po bein jaik 20.000 dong.

 Tal thun 2030, tinh Ca Mau kham ngak hu 20% GRDP saong 100% doanh nghiep sit saong mbiah hu pandar kong nghe so. Piah ngak hu siam dom bruk ba tabiak nan, tinh Ca Mau ba tabiak bruk Salih pandar so, dalam nan, hu dom nyaom kapol saong jalan ba ngak, dalam nan hu paglong jalan sahaneng pandar so, ngak salah harak, patagok ha tang saong du lieu so. Ca Mau brei pataom tame padang Pasak khik iek du lieu pataom tame, salih birau. Min tapa nan, bruk khik iek khaw tin mang hu caik hatai.

Cuc Khik iek saong Padang ngak danak binek kraong ribaong, Mentri Ngak nong saong Moi truong kuhria dalam bilan 2, di Bhum taneran kraong Cuu Long hu dua mbang njom ia mbak di dom tuk ia ndik meng ini tal harei 6 bilan 2 saong meng harei 13-2 tal harei 19 bilan 2. Di dom pabah kraong ribaong Cuu Long, njom ia mbak 4 gam sa lit meda tame  meng 42 tal 45 km. Njom ia mbak ngak kan bruk mek ia di dom binek atah di tathik meng 45 tal 55 km dalam dom harei ia ndik.

Gah chuc nang di Campuchia hu peih bruk duah mek kol duis  pachot pagat  online di tinh Svay Rieng. Dalam tuk pagui mek, gah chuc nang  chap hu labaih 2.000 urang mai meng rilo taneh ia. Pho Akok Dang Bhap bini Campuchia pan akaok Men Sam An tacei ba gah chuc nang  pagui mek kol dius kong nghe piah khik angan je di taneh ia dalam meta tuai damuai saong dom gah buh jien tame ngak mbang meng negar langiu.

Hu takik abih 200 urang metai dalam mbang glut jaleih taneh trak di labik la-on kaya khoang san di gah Pur CHDC Congo harei 28/1. Jabat chuc nang khan lac, bruk ba tal glut jaleih kayua hajan praong. Urak ini, dom urang njauk rambuac hu payua tal dom labik y te piah iek ruak. Dalam panuac khan di mang xa hoi X, Rajaei Congo payua panuac klak rabha  tal baoh sang dom urang gaok bala, tui nan ndem puac bol lin kuac mek suan hukum saong mbuan rah tabiak bala di labik ini.

Mbuan khat lahik jien ralo meng tuk langik la-ar di Mỹ hadei ribuk di bilan La-ar tuyet daok laik di bhum gah meraong negar Mỹ, ba tal labaih 100 urang metai saong labaih 2.100 mbang ahaok par padeih. Dalam tuk gah Pur taneh ia ini daok dang anak langik la-ar dui atah, ngak kan kandah tal bilan paik baoh kayau di labik ini. Kuhria tal harei 31/1, labaih 194.000 baoh sang saong doanh  nghiep lahik ndien. Ngak kan kandah tal yaok pluh trieu bhap bini, ribuk gam haong tuyet praong, kateik tagok dom bhum taneh gaok bala trak meng adit dahlau./.