Mbang nyaom biai ka 8 (mbang nyaom chuyen de), HĐ Bhap bini Ban raya Ho Chi Minh mbang ka X, tukvak thun 2021 - 2026 brei rah tabiak di harei 6/2 biai ka dom danak dak jalan mbak hu makna. Abih di nyu  nan lac, mbang nyaom biai brei ndom meyai ka bruk yasa UB Bhap bini tinh Dong Nai ngak danak dak dui atah jalan Metro Bến Thành – Suối Tiên mai Pasak karja tinh Dong Nai saong Mblang kapal ahaok par Long Thành tui jalan ngak bruk karja saong menuac urang nao tapa labik dua jabat karja pakat tinh Dong Nai saong Ban raya Ho Chi Minh. Langiu di nan, kuhria dom danak dak Buh jien tame padang tatua Thủ Thiêm 4; danak dak padang jalan pambuak tapen gilai Cát Lái – Phú Hữu tal jalan Vanh dai 3…

Nyaom darak pasar Pachreih bruk pablei salih, Yulit - Uan raok Ndang, bilan Xuan thun birau nethak Athaik 2026 daok hu So Kong thuong tinh Vinh Long peih ngak. Ini lac piah yaih khan dom kaya kong nghiep palei pala naih gheih, kaya nong OCOP, kaya palei ngak meng kan saong kaya bhum palei: tapa nan rik yame ngak brei patagok kaya bhum palei, peih praong darak palei, jhul pakhang bruk pablei salih, yulit tui khang kajap. Bruk njauk hatai di nyaom darak lac danak dak parang iek kaya mbang ngan haong kadha “ Ilamo Vĩnh Long”, yaih khan saong ngak dom kaya mbang di bhum palei…

Di tukvak ini, pabui hơi di Can Tho hu pataom blei haong yaom 7,5 trieu dong sa tạ, tagok labaih 1 trieu dong sa ta dut saong jaik 1 bilan dahlau. Ngan haong yaom ini langiu di jien buh tabiak ye mek hu laba labaih 2 trieu dong sa ta. Dalam thun ta tapa, Chi cuc Raong glang saong enek Athur ban raya Can Tho hu srap gap, kham merat pambuak haong dom bhum palei saong urang raong glang peih bruk pasang iek, patagok bruk raong glang saong pacang caga jit ruak anek athur, menuk ada mek hu jak jeng glaong.

So Ilamo, The thao saong Yulit tinh Lam Dong birau hu harak payua UBND tinh pasang iek harak Ho so ilamo “ Bruk ngak ia methin meng kan Phan Thiet” ba tame sarak drap ilamo oh mboh di meta pakat negar thun 2026. Ia methin Phan Thiet hu meng kan mai labaih 300 thun, danei angan bingi pahe, lac kaya bingi di bhum taneh Binh Thuan klak, ini lac tinh Lam Dong. Di ban Phan Thiet klak hu labaih 200 labik pablei salih ia methin, yaok thun ngak tabiak yaok pluh trieu lit ia methin.

UB Bhap bini xa Nguyễn Phích, tinh Ca Mau brei thau, ong Đ.V.Đ. hu bayar jien taong bhat 7,5 trieu dong ka bruk taog paoh dalam baoh sang.  Dahlau nan, dalam luac raidiuk daok haong gauk, amuk L, diuk ong Đ sa brei padang baoh sang saong raong ba dom anek bik. Bahrau blaoh, kayua ong Đ oh daong bruk sang nan amuk L hu puac ka pasang. Dalam tuk pandiak darah, ong Đ taong diuk mabuh trun dhuk kieng caneing blaoh langek saong hu ba nao labik y te. Dalam luac jalan pasang duah, amuk L khan bruk ini tal Kong an xa Nguyễn Phích saong kham merat pandar taong bhat, gham urang pasang.

Thái Lan saong Campuchia njauk hatai ka bruk taphia negar pambuak tal bruk khik iek bhum taneh taphia negar di tinh Sa Kaeo hadei 2 harei ginum biai. Thai Lan saong Campuchia daok cagar gauk dui atah ka taneh rilo di dom palei taphia negar. Klau palei ini  lac labik rah tabiak mesruh metak di bol lin Thái Lan saong Campuchia di bilan 12 thun 2025. Campuchia saong Thái Lan njauk hatai padang di harei 27/12/2025 hadei 3 adit kalin kan mesruh gauk ngak dua gah metai lahik, njauk rambuac.

Dom ngoai truong Lien minh chau Au (EC) hu brei tapa dom bruk taong bhat bahrau taong tame Iran, pamaong tal dom menuac urang saong kapul hu pambuak tal bruk pacang cakak urang trun jalan dalam negar jeng yau bruk daong di Iran brei ka Nga. Bruk ini brei ramik Kapul Bol lin Kat mang Islam Iran tame sa kapul Karja Islam ta-eng padang (IS) saong kapul Al Qaeda, bruk salih bahrau brei mboh ka bruk lambaok dalam bruk pambuak di chau Au ngan haong urang dang akaok Iran.

Mbang tamuh jit ruak soi tabung glong bang  South Carolina, Mỹ rah tabiak trak hu 89 urang njom ruak kuhria meng harei 23/1. Kuhria tal tukvak ini, hu takik abih lac 416 mbang urang ruak soi dalam negar Mỹ. Tui pasak pasang iek saong pacang caga jit ruak (CDC) Mỹ brei mboh dom urang ruak sởi rah tabiak di dom urang umo ala 19 thun. Labaih  2%  kuhria abih urang ruak di Mỹ brei ba tame sang iek ruak./.