Pahadar 85 thun Harei Chu tich Ho Chi Minh gilac mai negar piah Dui ba Kat Mang Viet Nam (28/01/1941 - 28/01/2026), malam kabroi peih tabiak Danak dak papar binguk “Dua tangin padang taneh ia” di 4 labik sajarah: Cao Bang – Ha Noi – Nghe An – Ban raya Ho Chi Minh. Ndom meyai di danak dak, Tong Bi thu Tô Lâm ndom lac, Yaom kaom praong abih di bruk Wa Ho mai negar oh lac bruk di sajarah, bo daok di dom kadha daok tamo makna di jaman. Nan lac kadha ka bruk ta-eng kham merat, ta-eng ngak – kien langaih dahlau abih piah khik kajap bruk bebas di bangsa negar. Nan lac bruk kadha pambak tame Rahra – sa prein yava khang kajap abih di kat mang. Saong nan jang lac bruk pambuak prein khang di bangsa negar haong prein khang di jaman – bebas min oh kareik drei, ba drei tame min oh ngak lahik drei.

Mban Tacei ba Bol lin Bien phong tinh Gia Lai pambuak haong UBND xã Ia Púch peih ngak danak dak “ Bilan pataih Bien phong - Paghang la-ar hatai bhap bini” thun 2026. Danak dak peih ngak hu rilo bruk bika lagaih yau: bac megru duah thau ka ilamo, daoh tamia; alin pandap ka dom baoh sang kathaot, baoh sang dalam sarak karja, baoh sang raidiuk kan kandah; iek ruak, tacei pato  khik prein yawa saong brei jru oh mek jien di bhap bini. Dom don vi saong urang ngak pahala  hu alin brei labaih 800 paok pandap, kuhria labaih 600 trieu dong. Ia Púch lac xã bhum taphia negar, ralo lac urang bangsa takik hu raidiuk kan kandah.

 Di dom xa Ia Lốp saong Ea Bung, Dak Lak, Kapul urang Kamei tinh hu alin brei 10 bruk daok dang mbang ngui ka urang kamei dalam kapul gaok kan kandah, piah daong ka dom baoh sang patagok bruk ngak mbang. tai tanat raidiuk. Dom bruk daong dalam nan hu raong pabui glai, limo atau kabao, lagaih haong hatai caong di yaok baoh sang. Dahlau nan, Kapul urang Kamei tinh Dak Lak jeng alin brei 9 bruk raong pabui ka urang kamei dalam kapul di xa Buôn Đôn. Gam haong nan alin brei 5 bruk raong limo di xa Tuy An Đông. Taong abih yaom kaom dom bruk daok dang mbang ngui hu alin brei lac 260 trieu dong.

So Noi vu tinh Ca Mau birau ba tabiak jalan ba urang ngak di bhum palei nao ngak bruk di negar Han Quoc  tui tukvak pambuak harak. Tui nan, yaok thun, tinh palih ruah labaih 100 urang ngak umo meng 25 thun tal ala 45 thun nao ngak bruk di Han Quoc. Urang ngak bruk gah ngak nong tui harak pambuak bruk meng 5 tal 8 bilan. Jien bilan takik abih di Han Quoc  kuhria di thun 2026 lac 10.320 won sa mon, sumu labaih 190.000 dong. Tukvak  ngak bruk meng 7 - 9 mon sa harei; meyah  ngak langiu tukvak nan, jien bilan hu kuhria tagok 1,5 mbang veik.

Piah khik kajap bruk pabak kaya mbang salamat saong pacang khik bruk daok dang mbang ngui ka rahra anak thun bahrau nethak Asaih Waw, tinh Dong Thap hu gam gam ngak bruk pahacih sa-at taong abih, pametai anek ruak di labik raong glang. Dalam nan pataom tame dom labik mbuan tamuh ruak yau dom baoh sang raong glang sit, labik pataom, dom darak pablei salih anek athur, menuk ada saong dom labik pataom, thik ralaow. Abih di nyu nan lac, di dom xa tapen negar saong dom jalan haluh, jalan peih, bruk pruh jru pametai anek ruak hu ngak catang piah pacang cakak takai ruak njom tame meng langiu.

Mentri Y te Campuchia khan lac, thun 2025 mboh rilo ruak min oh nyom mbak yau ye: ruak tagok darah, ruak baoh hatai, ruak ung thu saong njauk ndem tal ruak me-ik saradang. Langyah ka dom bruk ba tal dom ruak nan, Tiến sĩ Lo Veasna Kiri, Thứ trưởng Mentri Y te Campuchia mboh lac: Kayua drei takik sangka caik hatai tal kaya mbang yaok harei ba tal ruak dalam rup oh nyaom mbak.

Tal tukvak ini hu 25 negar ba drei tame Hoi dong Salamat Gaza kayua Tong thong My Donald Trump ba tabiak di akaok bilan 1 meng blaoh. Dalam bruk ndom meyai, Akaok Mentri pambuak negar langiu di 8 negar Islam brei thau: bruk di Hoi dong Salamat Gaza piah pasiam sa bruk pandar padeih mesuh metak miat miat, daong pasiam veik Gaza saong jhul tagok sa bruk salamat thei thei jeng samu gauk, karo kajap…

Amazon khan lac brei cakak trun labaih 16 ribau bruk ngak di dunya, dalam tuk daok kham merat ramik ngak veik di kapol kong nghe kuhria tui jien yaok ribau ti USD ini. Kong ty duah daong dom urang gaok kan kandah, tapa bruk brei ka urang jakar di Mỹ hu 90 harei piah duah kabik karei dalam jabat drei ngak bruk. Amazon  hu labaih 1,55 trieu urang di dunya ngak bruk./.