Anak bruk tamuh di jit ruak kayua virus Nipah di An Do saong dalam dunya kuhria lac bruk metai menuac urang meda tagok tal 75%, Mentri Y te pandar dom Sang iek ruak paglaong bruk pasang iek, pacang caga jit ruak kayua virus Nipah. Dalam nan, paglaong bruk pasang iek, duah dom bruk medil ka njauk ruak di pabah mbang negar, dom labik y te saong di bhap bini piah pasang iek, brei daok karei, jru ruak dil samu. Pacang labik hu urang ruak camreip, oh luai ka jit ruak pambak dalam bhap bini, abih di nyu nan lac dalam bingun Tet Nguyen dan saong bingun raya Tet akaok thun 2026.

Melam harei 6 bilan 2 ( 19 bilan puac) anak tal, Ban uy, HĐND, UBND, UB MTTQ Viet Nam TPHCM brei peih ngak danak dak “ Pataom mbaok urang Viet Nam daok di negar langiu mai palei raok Thun birau nethak Athaik Waw thun 2026”, hu labaih 1.000 urang Viet daok di rilo taneh negar langiu di dunya. Kadha njauk ndem tal  dalam dom bruk nan lac nyaom biai kadha “ Urang Viet Nam daok di negar langiu naih gheih pambuak bruk haong ban raya salih pandar taka so” . Jeng dalam danak dak ini hu parang iek thaot binguk ka dom bruk rik daong biak siam  gheih di urang Viet Nam di negar langiu.

UB Bhap bini tinh Lam Dong bahrau pajrak dom so, dom gah saong pambuak gah buh jien tame piah jhul samar tukvak ngak danak dak jalan peih samar Bảo Lộc – Liên Khương, kayua bruk caga srap gap suai jang dut haong kuhria dahlau. Meng bilan 6/2025 tal ini, gah buh jien tame ngak bahrau mek hu tok labaih 20% bruk ngak pasang duah taoh talaih mbom siu, kaya patuh saong thiet ke ilamo ky thuat. Jalan peih samar Bảo Lộc – Liên Khương atah jang 73km, lac jalan mbak hu makna di jalan peih samar pambuak Ban raya Ho Chi Minh haong Da Lat, brei daong prein patagok KT-XH ka tinh Lam Dong.

Tinh Dong Thap hu taneh pala njam patam praong abih di bhum taneran kraong Cuu Long. Tukvak ini, urang ngak nong daok samar pala trak, iek glang njam patam bingu piah duh ka darak Tet caong khin ngak tabiak hu rilo njam patam, pablei hu rilo jien. Dut saong palei ngak hamu padai meng kan ye hamu pala njam patam hu kein laba glong  rilo mbang. Hadei pagam, tinh Dong Thap yaok thun hu labaih 64 ribau ha pala nyam patam, ngak luac thun brei labaih 1,8 trieu tan. Bruk pala njam patam hu daong ka urang ngak nong tinh Dong Thap yam tagok patruh kathaot, ngak kaya meda.

Di bhum pala menah danei angan Ba Đình, xa Vĩnh Bình saong Tắc Cậu, xa Bình An, tinh An Giang dom harei jaik ini, urang ngak nong jal val tabiak bein sangka saong paik menah piah pablei. Urak ini menah di bein hu meng 10.000 – 12.000 dong sa baoh (janih 1kg sa baoh). Yaom menah tagok glaong saong kuhria lac daok tagok yaom veik dalam bingun Tet kayua urang ikak kaiy pabak ka dom darak pasar di An Giang, Ban Can Tho saong Ban raya Ho Chi Minh ngak mut piah pablei Tet.

Urang po negar Kim Jong Un khan lac, nyaom roya di Dang Lao dong Trieu Tien jaik brei thau ka bruk peih ngak anak tal piah pakhang jang bruk pacang caga mesruh metak hat nhan. Gam haong nan brei mboh bruk padang ngak pah pacang taong tame biak khang saong suai lavik kajap piah pacang caga bruk taong paoh gauk meng phao ndao lac sarak hu makna praong di Dang Lao dong Trieu Tien.

Tong thong My Donald Trump hu kadha ndom meyai jak ba meraik gauk palih ruah di kreh tukvak ngak bruk akaok meti dalam thun ini di bang Iowa, ieu da-a dom urang cu tri daong hatai tui ndang Cong hoa pacang khik bruk hu palih ruah rilo di Quoc hoi. Ong Trump kakei caga meyah gah Dan chu pan quyen dalam mbang palih ruah kreh tukvak ngak bruk, dom sarak kaoh patrun jien je, laba ka kinh te saong danak dak ginum biai di ong njauk bleik cagar. Gam haong nan brei mboh lac ong meda gaok dom mbang pasang duah saong kham merat kaoh duas.

5 bang saong bhum taneh di Australia daok yam tapa langik pandiak biak trak ralo mbang langik panjiak biak catang. Rilo labik panjiak tagok tal jaik 50 do C. Bruk panjiak  daok ngak ka apui khuah glai biak trak di bang Victoria. Langik panjiak tagok glong  ba tal bruk pandar ndien tagok jeng rilo, glong abih dalam 17 thun tapa. Tui kuhria mboh dahlau, langik pandiak mbang ini meda dui atah  tal puac adit ini./.