Dang akaok Mbang nyaom biai online tal 27 tinh ban ka dom danak dak hu makna pakat negar, pasak gah jalan mbak, Thu tuong Phạm Minh Chính pandar brei mboh danak dak pasak, hu makna. Dalam nan, pataom tame salah blaoh 600km jalan peih samar di Bhum taneran kraong Cuu Long; brei caik dahlau ka dom tinh di bhum ceik yau ye Cao Bang, Tuyen Quang, Lai Chau, dom labik tok hu jalan mbak; brei caik dahlau bruk pambuak haong negar Lao piah pagam jalan kuhria, khik kajap an ninh quoc phong, bruk mbang ngui daok dang di rahra; brei caik dahlau dom jalan ka dom tinh Tay Nguyen yau labik Dak Nong (klak)…

Kapol Urang Kumei Ban raya HCM peih ngak danak dak “Bilan anit ranam – Tet jum pataom” nethak Athaik Waw 2026. Danak dak alin  pandap tet ka 500 urang kumei ngak kong hu raidiuk kan kandah daok ngak bruk di dom don vi jitvu kong ich saong HTX moi truong di ban raya. Ini lac kapol urang ngak tapak, bhian ngak bruk glaih glar, rik tame khik brei hacih labik, mbaok meta ban medil raya HCM. Kapol Urang kumei ban raya hu alin pandap saong so jien patak pataom ka 41 uranaih metui medhar kayua jit ruak COVID -19.

Tet Bol lin Rahra thun 2026 ngan haong kadha: Uan Ndang, bui sambai Pataiah nethak Asaih Waw; ahati anit ranam di Ndang saong rahra, yam tame jaman bahrau” bahrau peih pakak di page di ban raya Can Tho. Harei peih pakak brei mboh ka bruk siam gheih di ilamo kraong ia Can Tho, dom adat cambat bhap bini, bruk pataom gauk, daok dang mbang ngui pagam haong gilai gaiy saong kraong ia, dalam nan danei abih lac ilamo darak ndong Cái Răng, daong yaih khan thaik thaot jirah rivang Can Tho. Bingun ini, di dom bhum palei brei rah tabiak rilo danak dak lagaih yau ye: pasang iek ruak, taong ruak, pabak jru oh mek jien ka urang kathaot; alin kaya ka baoh sang mbang tui sarak, baoh sang kan kandah.

UBND tinh Ca Mau mbaoh harak Khik iek glai khang kajap vaktu meng thun 2026 -2030 di Mban Khik iek glai pacang caga Đất Mũi. Bruk pamong tal, khik iek tani tanat taneh pal glai di urak ini, paglong  asar  moi truong sinh thai saong pacang caga bruk langik salih karei. Urak ini, taneh glai khik iek daok dalam bruk khik iek hu jaik 23 ribau, parabha di dua xa Phan Ngọc Hiển saong Đất Mũi.

Puac thun, darak pasar baoh kayau Bhum taneran kraong Cuu Long hu rilo tagok trun. Meyah yau urang ngak nong pala kruac aik, pa-aok cuah Hòa Lộc, durian…laba praong meng bruk paik hu, yaom pablei glaong ye rilo po bein pala baoh kruac laik tame bruk tavak sraiy. Di Dong Thap, thun ini tet bal pataih mai ngan haong yaok rituh po bein pala durian. Urak ini urang ikak kaiy jal val pataom blei, bayar jien takai piah paik baoh hadei Tet. Yaom durian pajaih Monthong janih 1 lac 90.000-110.000 dong/kg. Tui yaom ini urang ngak nong hu laba labaih 40.000-50.000 dong/kg. Langiu di baoh thanh long kanduh kanyik…jeng tagok khang dalam bingun puac thun ini, hu yaom labaih 60.000-80.000 dong/kg.

Tong thong Mỹ Donald Trump saong Urang ngak praong gah takik urang di Thuong vien daok ginum biai ka dung jien kayua Mentri An Ninh negar Mỹ, piah plaik njiak rajaei Mỹ kareik pabah mbang di puac adit ini. Tui bruk ba tabiak, Thượng viện Mỹ klak oh buh phieu dalam 6 hukum. Dalam nan njauk brei hu 60 phieu njauk hatai piah brei tapa, dalam tuk dang Cong hoa urak ini tok hu 53 ghaiy di Thuong vien.

Ukraine daok srap gap gaok sa mbang la-an langaoh trun tal -30°C, ngak meda tagok bruk srau kadau gah ngak pahla tuk yaok trieu rahra jeng oh ka hu bruk paghang pandiak, ndien saong ia tani tanat. Tong thong Ukraine kakei caga Nga daok srap gap dom mbang taong tame biak praong biak bahrau meng kamraik par oh hu urang peih par saong ten lua, dalam nan ha tang nang luong rilo bruk meda patui veik lac jalan ngak hu makna dalam tukvak la-an langaih abih di bilan la-an.

Bruk ndih tapui di Australia thun 2026 trun biak ralo hadei rilo thun trun patui gauk. Kuhria abih tih urang ndih tapui lac 2,1 anek sa urang kumei umo ndih tapui dalam jaik 50 thun. Tapa nan lac uranaih ndih tapui tabiak piah salih ka amaik ame oh ginup, ba tal takik bhap bini saong urang taha rilo. Rilo urang Australia palih ruah suai ndih tapui anek jang, dalam tuk urang kumei umo praong takik ndih tapui jang. Rilo baoh sang ndih tapui sa urang anek kayua bruk raong anek mbang bac di taneh ia ini abih biak ralo jien./.