Dang akaok mbang nyaom biai ka 17 di Hoi dong Kacah - Meyaom pakat Trung uong, Thu tuong Pham Minh Chính pandar padang nội hàm, jalan ngak, jalan sahaneng, bruk ngak piah peih danak dak pakacah salih bahrau hadah krah piah patagok ilamo khoa hoc kong nghe, salih lek taka so, salih hijao. Gam haong nan Thu tuong jeng pandar pataom tame danak dak pakacah patagok bruk kinh te ta-eng menuac urang, paglaong siam lagaih kinh te karja; patui veik danak dak “brei oh daok baoh sang taik tahak”; danak dak “bac megru luac rai”…

Thanh uy TPHCM birau peih bruk meyaom 233 bi thu chi bo naih joi pakat Ban raya thun 2026. Tui Pho Bi thu Thuong truc Thanh uy TPHCM Le Quoc Phong dom urang ini yau dom baoh canu kareih pasang hadah, ngak bruk abih hatai, mbuan mbiah, sahaneng iek praong bruk ngak, kham merat ngak siam bruk di bhum palei, don vi, patagok bruk brei ngak dahlau, hu angan je, daok dang gheih ghang haong bhap bini, lac “tangin pambuak atah”, “dui ba pagam” hu makna praong, jum pataom taong abih bhap bini, rik tame pambuak Dang saong Bhap bini, Bhap bini saong karja.

Di bingun pahadar 96 Harei padang Ndang Cong san Viet Nam (3-2-1930 - 3-2-2026), Mbang Thuong vu Tinh uy Dong Thap hu alin brei saong duah iek veik alin brei Huy hieu Ndang ka 804 urang ndang praong thun umo naih gheih. Dalam nan hu 796 urang Ndang hu alin brei huy hieu Ndang saong 8 urang ndang hu duah iek veik alin brei Huy hieu Ndang. Harei alin brei Huy hieu Ndang daok hu dom kapul, jabat Ndang dalam tinh peih ngak praong prang, hu makna, njauk adat. Hadei pagam tal ini, Ndang mbo tinh Dong Thap hu labaih 121.100 urang ndang.

Lien hiep Dom kapol nyaom huu nghi tinh Dong Nai saong UB bhap bini xã Bù Gia Mập hu alin brei 10 baoh sang, kuhria tui jien labaih 830 trieu dong ka dom baoh sang bangsa takik hu raidiuk kan kandah. Dalam tuk padang ngak, karja bhum palei hu jak ba po sang, gauk gar rik jien tame ngak. Meng nan, jien ngak sang tagok rilo jang tuk ngak blaoh dut haong tuk camereip. Tukvak anak tal, tinh Dong Nai pambuak bruk langiu karja daong bhap bini dom bhum tapen negar daok kan kandah.

So Ngak nong saong Alam langik ban raya Can Tho peih 37 labik pabak ia oh mek jien ka rahra dom xa, phuong tapen tasik labik tinh Soc Trang klak. Pakuang padang ia hu ngak ta-eng tu dong, piah tuk halei jeng khik tani tanat halau ia hu dahlau. Bruk kham merat ini piah piah khik kajap oh luai ka baoh sang rahra halei kurang ia, rilo meng lac dalam bingun Tet Nguyen dan jaik tal saong bilan thu. Di labik Soc Trang klak jeng daok labaih 30% baoh sang rahra labik palei pala oh ka hu pandar ia hacih meng majam pabak ia pataom.

Kuhria tal ini, urang metai kayua glut jaleih taneh di tinh Tay Java, Indonesia tagok 38 urang ngan haong 27 urang daok lahik. Gah daong duah daok kham merat pasang iek  labik mbuan rah tabiak glut jaleih meng mac moc biak trak saong manuac piah ngak bruk. Hajan praong ngak glut jaleih  taneh di tinh Tây Java, Indonesia di harei 24/1, ngak tayak 50 baoh sang saong labaih 650 urang njauk panduan ba nao labik karei.

Ia sua trak di gah Meraong negar Mozambique, hu ngak ka yaok ribau rahra klak sang danaok, duah labik pandaok anal meta. Thaik thaot kayua Reuters thaot binguk brei mboh rahra nao tapa dom jalan ia dauk tal la-uk takai, rilo jalan jaleih, dalam tuk gilai gaiy hu pandar piah pajeng menuac urang ba ndap nda daong chip. Dom taneh pala tangei dalam bhum jeng njauk dauk dalam ia. 

Tui Gah Pato megru, Khoa hoc saong Ilamo di Lien hop Quoc (UNESCO) bruk pamaoh mebai Do Thái dak harei dak ralo di dom tal bac di Lien minh chau Au (EU). Urak ini, hu tal 78% gru pato hu tangin sua khan lac hu mboh rilo mbang pamaoh mebai Do Thái dalam saih bac. 42% gru pato khan lac gaok ayut sahabat ngak bruk haong gauk mebai urang Do Thái./.