Akaok Mentri Ngak nong saong Alam langik bahrau hu Sarak ka bruk paglaong bruk khik kajap raok Tet Nguyen dan nethak Asaih Waw 2026 bui sambai, siam mekre, salamat, patak pataom. Dalam nan sarak ndom khang ka bruk pasang duah, khik kajap hu ginup ndap nda kaya ngak nong, pajaih phun pala, athur raong duh ka bruk ngak njauk tukvak; paglaong bruk pacang caga jit ruak, apui ghuah glai, kaoh phun glai; pasang iek asar siam ndap nda kaya ngak nong, pahacih sa-at salamat kaya mbang; gam haong nan khik tani tanat bruk daok khik, dil samu langyah dom bruk rah tabiak di tukvak Tet.

Bo Tu lenh TPHCM birau peih bruk ba 1.249 bol lin ngak salah blaoh bruk gilac veik mai palei. Ini lac dom ha sĩ quan, urang ngak bol lin bilan 2 thun 2024, ngak salah blaoh bruk bol lin 24 bilan tui hukum ba tabiak. Yaok urang lin gilac veik mai hu taduan dom sarak daong ka urang lin sa mbang, daong bruk ngak, bac bruk ngak, daong jien BHXH sa mbang kuhria abih tih labaih 35 trieu dong sa urang.

Di xa Biển Bạch, tinh Ca Mau peih bruk “anek hadang kuan phun padai” daong urang ngak nong hu jien mek tame tani tanat saong daok ngak jeng sa mbaok meta “bhum palei hacih hijao”. Urak ini bruk ini ba mai jien mek tame labaih 100 trieu dong sa ha dalam sa thunm glaong tagok 1,5 mbang dut saong dom thun dahlau. Min, yaom glaong abih lac bruk pamedeih di he sinh thai. Tuk majam kraong ribaong saong blang hamu dak harei dak hacih sa-at, taneh tachop jang, ye oh lac tok mbang pala padai bo mbang raong hadang su saong aring dalam dom bilan thu jeng mek hu siam lagaih glaong.

Tok labaih 2 adit tra tal Tet Nguyen dan, jien blei kaya mbang meda tagok meng 10-15%. Yau nan ye, Chi cuc Raong glang saong Thu ý Ban Can Thơ caong khin dom doanh nghiep, labik ngak, urang raong brei ba tabiak jalan pabak lagaih tui darak pasar. Tui nan, pambuak bruk pathau khan, tacei pato labik raong glang, thik ngak rilo saong pablei salih njauk tui hukum, piah khik brei tani tanat, asar siam, salamat ka urang blei pandar dalam tuk Tet.

Mbang hajan ia sua puac bilan 11 ngak ka mbang pala padai Dong Xuan 2026 – 2027 di tinh Dak Lak njauk suai jaik sa bilan dut haong saka pala padai. Min, tal ini hamu hu chreih chrai gilac. Tui kuhria, dalam tinh hu trun pajaih labaih 70% taneh dalam taong abih lac 26.000 ha padai Dong Xuan. So Ngak nong saong Alam langik tinh Dak Lak hu pato tacei dom labik ilamo tacei ba rahra pandar bruk pala drak, raong glang piah paglaong siam lagaih saong khik kajap patagok karo kajap dalam tukvak anak tal.

Rajaei An Do kuhria mboh dahlau kinh te taneh ia ini tagok meng 6,8% tal 7,2% dalam thun jien padai 2026, biar jang 7,4 % dut saong dahlau di nan. An Do daok kham merat duah jalan langyah piah plaik njiak klaik klaoh saong tani tanat bruk ngak kinh te hadei Tong thong My Donald Trump kuhria jien je 50% ngan haong dom janih kaya kan di taneh ia ini blei tame Mỹ.

Jabat Pasang iek Bao hiem Y te Negar Trung Quoc hu duah mboh sa bruk bleik saleik trak pambuak tal kadung jien daong urang kamei menek metian. Mbang pasang duah camreip brei mboh di sa gah ngak mbang pablei salih di Côn Minh, dalam taong abih 15 urang ngak bruk hu tal 13 urang menek anek dalam tukvak katut saong taduan labaih 1 trieu Nhan dan te jien daong urang menek metian. Min tui pasang duah ye rilo meng lac paok jien daong njauk gah ngak mbang pablei salih khik veik, urang ngak bruk tok taduan meng 30.000 - 40.000 Nhan dan te yaok urang./.

Jabat pacang caga bleik saleik  di Lien minh chau Au (EU) khan lac, pambuak kajap di Ba Lan saong rilo taneh ia pambuak tal bruk ini, sa kapol nyaom ngak bruk suan hukum chap mek hu, tapa nan duah mboh 760 sruh radaih pablei tabiak negar chau Au sang Nga. Tui pathau khan gah padang khik, dom radiah ini pablei ka Thổ Nhĩ Kỳ atau dom taneh ia karei. Yau nan min, dom radaih nan lac mai meng Nga, lac taneh ia daok ndua nong jien je biak catang di EU.