Labik parang thaik binguk angan kadha “Bangsa negar naih joi, Ndang hadah hadai, Wa Ho praong uranam” njauk tame bingun pahadar 96 thun Harei Padang Ndang Cong san Viet Nam daok rah tabiak di Ban raya Ho Chi Minh. Labik parang yaih khan labaih 100 thaik thaot pamedeih dom inem krung hadah krah di katmang Viet Nam. Daok di jalan Đồng Khởi saong jalan Pasteur - Lý Tự Trọng, Gah Padang parang labaih 90 thaik thaot hu angan “Ban raya Ho Chi Minh je tame karo kajap tal Jaman bahrau”, brei mboh luac jalan ngak bruk karja palei 2 pakat. Labik parang daok rah tabiak di rilo labik karei di Ban raya Ho Chi Minh. Tapa dom thaik thaot di dom labik parang, Gah Padang ngak yaih khan 12 bruk hadhah krah di Ban raya Ho Chi Minh dalam thun 2025.

Padai Amaik  lac janih padai meng kan mai di urang bangsa K’ho,  Raglai di bhum ceik Phan Sơn, tỉnh Lâm Đồng (tỉnh Bình Thuận klak) birau pasiam veik, pambak tabiak saong ngak tui jalan huu co. Pajaih  padai Amaik  meng tuk drah tal tuk yuak dalam 6 bilan, min tuk hu ba ilamo ky thuat tame pala drak, phun padai Amaik praong drah jang jaik 2 bilan saong yuak hu ralo. Padai Amaik  oh lac kaya karei di labik ini bo daok ba tui dom ilamo meng kan pambuak pagam haong raidiuk bhap bini di labik ini.

 Pa-aok cuah Hòa Lộc di tinh Dong Thap danei angan hu rilo tuai dmauai dalam saong langiu negar thau tal. Di xa An Hữu hu labaih ha pala pa-aok cuah Hòa Lộc, dalam nan labaih 120 ha daok brei baoh duh ka darak pasar Tet Nguyen dan. Urak ini pa-aok cuah janih 1 daok hu yaom labaih 100.000 dong/kg, kuhria jaik Tet meda tagok 140.000 dong/kg. Brei mboh ini lac lac phun pala rilo abih, xa An Hữu brei patui veik khik tani tanat bhum pala, gam haong nan peih tabiak dom jalan langyah suai atah piah patagok karo kajap.

Dom harei puac thun ini, yaom aring tathik Ca Mau gam gam tagok glong, ba mai Tet caong khin  ginup meda ka mikva urang ngak nong. Urak ini, aring gạch pablei yaom 900.000 dong sa kilo. Tinh Ca Mau  hu taneh raong aring pablak tame danao raong hadang labaih 365.000 ha mek hu labaih 31.000 tấn sa thun. Aring Ca Mau taong yaom lac janih aring  bingi abih di Viet Nam; ba jien mek tame ka tinh Ca Mau labaih 10.000 ti dong yaok thun.

Peih tabiak mbang tabung glaong bruk pacang caga kol duis, jru phil, pablei menuac, pablei dauk, bleik saleik dalam pablei salih saong ndap nda kaya ja lau di bingun Tet Nguyen dan nethak Asaih Waw 2026, kapul bien phong tinh tinh An Giang gam gam duah mboh, mek kareik, taong bhat 135 mbang hu jaik 1.300 urang ngak chung hukum. Ndap nda kaya pataom khik labaih 7 ty dong, labaih 4kg jru phil patau. Dalam nan hu dom urang njauk gah Campuchia mek kareik saong bayar tapa jalan pambuak negar langiu.

Jabat chuc nang Thai Lan duah mboh saong chap mek 400 kilo matuy patau, yaom yaok trieu do la My di bhum Dong Bac Thai Lan. Njauk caik hatai, harei 31/1, di tỉnh Bueng Kan, gah chuc nang jeng duah mboh 6 kien pandap, hu abih tih 300 kilo matuy patau gam sa sruh radaih  patuh  oh hu bien so, klak caik veik tapen kraong Mekong. Dom don vi chuc nang Thai Lan peih ngak sumu gauk rilo jalan piah pacang caga saong taong tayah dom kapol nyaom  pablei saong blei matuy tapa rilo negar.

Trieu Tien hu peih pakak sa labik sang kreih camin taong abih hu ngak praong abih meng dahlau mai di ban Sinuiju, gah Pei Barak negar ini. Urang dang akaok Trieu Tien Kim Jong Un brei mboh hu njauk hatai tuk daak dak ini jeng sa kein lagaih ka raidiuk bahrau di rahra Sinuiju, dom urang njauk ciuk bala ia sua ia dauk tapa rilo rai rah. Labik sang kreih camin Sinuiju, hu peih ngak meng bilan 2/2025, hu maong yau lac danak dak hu makna, hu jhul tagok tui sarak patagok labik di ong Kim Jong Un.

Hu 330 urang jakar dunya tame pasang iek bruk Tong tuyen cu saong Duah thau hatai bhap bini meda peih ngak di harei 12/2 di Bangladesh. Dalam tuk palih mbang ini, jaik 2.000 urang tabiak mbaok palih ruah - lac urang lambaok ka labaih 50 ndang chinh tri di Bangladesh hu 300 gaiy di Quoc hoi. Ini lac bruk palih ruah akaok meti hu kuhria meng tuk rah tabiak trun jalan, sraw kadau ba tal bleik Rajaei kayua Thu tuong dahlau diah amuk Sheikh Hasina dang akaok./.