Harei ini rah tabiak mbang nyaom biai ka X di HĐ Bhap bini Ban raya Ho Chi Minh. Di mbang nyaom biai ini, UB Bhap bini Ban raya Ho Chi Minh ba tagok HĐ Bhap bini Ban raya Ho Chi Minh ka jalan ngak danak dak padang jalan pamuak pabah lamnge Cát Lái – Phú Hữu pambuak jalan peih samar Ban raya Ho Chi Minh – Long Thành – Dầu Giây saong jalan Vanh dai 3, taong abih phun jien jaik 8.800 ty dong, piah patrun bruk gar tavak saong paglaong logistics labik lamnge. Kuhria di mbang nyaom biai ini UB Bhap bini Ban raya jeng ba tagok dom danak dak jalan mbak hu makna yau ye: paglaong pakat, peih praong jalan Vĩnh Lộc (huyen Bình Chánh klak); yasa piah tinh Dong Nai dang ngak danak dak dui atah jalan metro Ben Thanh – Suoi Tien mai Pasak karja tinh Dong Nai saong mblang kapal ahaok par Long Thành…

Di 5 xã bhum taphia negar di tinh Lam Dong , Quan khu 7 pambuak haong UBND tinh Lam Dong daok peih ngak rilo bruk “Xuan bol lin” nethak Athaik Waw 2026. Peih akaok  danak dak, Quan khu 7 hu alin labaih 500 baoh sang bhap bini gam urang jakar, urang lin Bo Chi huy  Bol lin  tinh Lam Dong daok ngak bruk di bhum taphia negar. Tui nan alin brei  2.600 paok kaya  tal mikva saong dom urang lin di dom xã taphia negar Đắk Wil, Thuận An, Thuận Hạnh, Quảng Trực saong Tuy Đức.

UB Bhap bini tinh Vinh Long bahrau peih danak dak “Tet Bol lin – Rahra” di xa Chợ Lách. “Tet Bol lin – Rahra” thun ini hu rilo danak dak hu makna yau ye: buh jien tame 5,8ty dong padang dom jalan betong pambuak puk palei. Langiu di nan, daok buh jien tame 800 trieu dong padang tatua Tân An; pagam majam camera an ninh. Danak dak daok peih bruk rivang tangi, alin kaya jaik 400 baoh sang mbang tui sarak, baoh sang kathaot; padang 20 baoh sang anit ranam; alin 200 paok jien pachreih bac ka anek saih kathaot; pasang iek ruak, brei jru oh mek jien ka 100 urang kamei.

Nyaom roya ngan haong kadha “ Bruk rah tabiak, kein lagaih saong pamong tal bruk patagok di phun kreim gam haong kein lagaih di tinh Dak Lak” kayua So Ngak nong saong alam moi truong  tinh Dak Lak peih ngak, dom urang mboh lac: Dak Lak hu taneh glai praong saong phun kreim  lac janih palih ruak lagaih piah ngak bhap bini pala duah jien tame, abih di nyu nan lac urang bangsa takik. Yau nan min, taneh pala phun kreim dalam tinh birau hu labaih 3.500 ha. Yau nan ye,  tinh samar kuhria taneh pala, jhul pasamar pambuak 4 baoh sang, pachreih doanh nghiep buh jien tame ngak, parilo kaya kan meng bruk ngak my nghe, kaya padang ngak danak dak  tal ndap nda pandar dalam sang, pablei tabiak negat langiu.

Di rilo bhum palei pala bangu ngak mekre di tinh Vinh Long daok rah tabiak bruk rahra pataom mai tal jabat Uy mban bhap bini xa piah likau brei thau hu ngak meng halei, labik pala bangu. Anak bruk ini, karja palei brei jak ba dom kapol chuc nang paglaong bruk pathau khan, langyah piahmikva thau tani tanat ka bruk pajeng ba bangu ngak mekre nao pablei oh khin likau harak mbaoh tangin. Bruk likau mbaoh tangin labik pala bangu, phun ngak mekre meng dahlau mai oh ka hu pandar.

Malaysia ngak tui hukum pakauk blei tame hareik dien tu, piah khik kajap bruk blei tame dom kaya kan mbuan rah tabiak bala saong khik alam moi truong. Malaysia lac sa dalam dom labik dang akaok di dunya ka hareik thai katak saong dom janih hareik labaih, min hareik tuh klak ban glai ban glo. Tui kuhria, ta-eng Mỹ pablei tabiak labaih 33.000 tấn hareik dien tu yaok bilan, dalam nan Malaysia lac taneh ia blei tame.

Uy mban Kein lagaih Bruk ngak Samu gauk, sa jabat di My ngak hukum pakauk bruk pambuak urang ini urang oh yau gauk di labik ngak bruk pambak tame ralo darah bangsa, sambo kalik, agama, likei kamei, thun umo…daok pasang duah angan je gah pahat padhih NIKE ngan haong sa bruk yak pambuak urang ini urang diah oh yau gauk ngan haong urang kalik patih tapa dom sarak rilo di drei. Mbang pasang duah brei mboh bruk kham merat bahrau abih  di Tong thong My Donald Trump piah tayah klak dom sarak rilo, samu gauk saong ba drei tame patruh di rajaei, labik ta-eng menuac urang saong gah patp megru dai hoc.

Harak khan brei thau di Lien hop quoc brei thau gah khung bo Karja Islam IS, daok patagok samar saong mbuan ngak sraw kadau kuhria meng tuk kreh thun 2025. Sa urang jakar pakat glong di Jabat khung bo  di Lien hop quoc, brei mboh: IS saong dom kapol nyaom pambuak, daok pakhang bruk di bhum Tay Phi saong bhum Sahel, tui nan taong tame dom labik di Iraq saong Syri./.