Kuhria caga raok Tet Nguyen dan Athaik Waw 2026, page ini, Tong Bi thu To Lam mai rivang saong ayuh Tet Dang bo karja bhap bini TPHCM. Di labik ini Tong Bi thu caong khin, Ban raya pataom tame lang talaih dom bruk daok gal tavak; ngak brok tagok dom sarak, ha tang jalan mbak, manuac urang; salih birau bruk patagok dalam; ngak patui veik siam dom sarak, jalan ngak lagaih di ban; mek bruk njauk hatai, trei sir saong haniem siam  di Bhap bini kuhria bruk ba kaok, nao dahlau khik iek; sangka kuhria raidiuk bhap bini, njauk ndem tal dom harei Tet, piah abih drei, abih baoh sang thei jeng uan raok Xuan, mbang Tet bui sambai, siam mekre.

Mban palih ruah  ka 1 urang Quoc hoi mbang XVI ban Cần Thơ birau ngak bruk palih ruah saong parabha bruk ka dom urang di Mban palih ruah. Tui nan, yaok urang ngak di Mban palih ruah brei ngak ba abih hatai ngak bruk, pambuak kajap haong dom jabat, don vi, karja palei saong dom urang hu pambuak tal; brei ngak dahlau parabha bruk, rik tame peih ngak siam bruk haong gauk di Mban palih ruah tui hukum.  

Tỉnh Vĩnh Long birau peih bruk duah thau hatai saong palih ruah urang cu tri labik daok ngan haong urang Quoc hoi mbang XVI saong Hoi dong bhap bini dom pakat vaktu meng thun 2026-2031. Hadei Nyaom biai mbang ka 2, UBMTTQ Viet Nam tinh Vĩnh Long vak angan 23 urang palih ruah saong eng drei tame palih ruah ka Quoc hoi saong 151 urang tame palih ruah saong eng drei tame palih ruah Hoi dong bhap bini tinh, vaktu 2026 -2031.

Dom harei jaik Tet Nguyen dan Athaik Waw 2026, dom urang ngak lan di palei Hamu Craok  - Bau Truc, tinh  Khanh Hoa biak thuvi thuvar mbek athaik piah pablei tuk Tet. Drei thaik hu urang blei biak takre, oh lac thun Athaik Waw bo daok ndung bak ilamo lac patuah jamo, khang kajap, kaya meda saong ngak hu jak jeng. Langiu di dom drei athaik yau dahlau diah,  dom urang gheih mbeik sarak drei athaik birau, gam  bingula Cam biak gheih oh labik halei hu.

Harei ini, TAND tinh Dong Nai peih bruk langyah Lê Sỹ Tùng (umo 33 thun, daok phường Phước Long - tỉnh Bình Phước dahlau diah) pametai 3 urang dalam sa baoh sang di Dong Nai saong khik piah, pajeng ba, blei saong pablei pandar phao siu suan hukum piah palai pajua drap ar.  Dalam bruk ini daok hu veik 3 urang karei tra nan lac: Nguyễn Văn Việt (di phường Hố Nai, Đồng Nai), Lưu Minh Tiến (di Tây Ninh) saong Phạm Quang Huy (di Ban Hà Nội) duis ngak tabiak, khik piah, blei saong pablei phao siu suan hukum.

Gah y te Dunya( WHO) khan lac hu sa urang kumei daok di gah Barak Bangladesh metai dalam bilan 1 hadei njom virus Nipah nan lac sa ruak mbuan metai ralo. Urang ruak umo meng 40 tal 50 mboh rilo rual kayua virus Nipah meng harei 21/1, ngak gah la-ar pandiak saong pandik akaok, hadei di nan samar ngak sre ia pabah, oh thau drei jan saong handaok. Urang ini metai hadei sa adit kayua virus Nipah.

Tong thong Mỹ Donald Trump khan lac, kinh te My bruk ngak hu yau bruk ba tabiak di ong. Ong Trump khan lac kinh te Mỹ daok siam tagok tal Gah đảng Dan chu atah klak kadha “ bruk bayar jien”. Gam haong nan, ong tuh thaik ka urang ngak rai dahlau Joe Biden ka bruk yaom kaom dom janih pandar yaok harei daok glong. Yau nan min, tui duah thau di PBS News, tok 36% urang ngak njauk hatai jalan ong Trump ngak mbang kinh te.

Dom nyaom Urang Is dak harei dak mek rilo angan urang hu rilo manuac sia thau tal di mang xa hoi saong dom urang pablei salih piah palih ruah likei dam di Đức tame ngak bruk kol nyu. Kol nyu pambak tame dom urang dam mbuan gaok kan kandah, kurang bac da-a saong takik duah hu bruk ngak. Dahlau diah, dom kapol Is duah dom urang ngak  bruk suai lavik ka dom kapol ini, urak ini, kol nyu khin dui ba tame hu rilo urang lin piah pacang dan siu ka kol nyu./.