1# Harei ini harei som 11/06, Quốc hội yam tapa adit ngak bruk ka 4. Ini jeng lac adit ngak bruk puac abih di mbang nyaom ka 5, Quốc hội mbang 14. Harei camereip di adit ngak bruk ka 4, harei in, Quốc hội ginum biai di hội trường ka dom dự án Hukum: Đặc xá (pasiam veik) saong dự án Hukum pasiam pabak dom paka di Hukum Pato Megru. Jeng dalam adit ini, Quốc hội ginum biai ka 4 dự án hukum. Nan lac Dự án Hukum pasiam pabak dom paka di Hukum pato megru, Dự án Hukum pacang caga tham nhũng (pasiam veik); Dự án Hukum Công an bhap bini (pasiam veik) saong Dự án Hukum raong glang.

2 # Dalam tuk taneh ia pakacah gauk pahadar 70 thun harei  Chủ tịch Hồ Chí Minh tabiak panuac ieu pakacah gauk anit ranam taneh ia (11/6/1948 -11/6/2018), melam kabroi (10/6), Thành Đoàn Đà Nẵng peih bruk pok meyaom  71 dam dara naih gheih ngak tui panuac Wa song  Chi đoàn naih gheih thun 2018. Dom kapul nyaom, menuac urang hu pok meyaom mbang ni hu dom rik dong praong dalam bruk  Đoàn tui rilo jalan ngak bahrau, hadah krah siam lagaih cambaih laih.  

3# Di jalan nao takai Nguyễn Huệ, Quận 1, TPHCM, harei kabroi (10/6), hu biak ralo dam dara mai maong parang iek rup thaot “ban raya Hồ Chí Minh kham merat ngak tui panuac ieu pakacah gauk anit ranam taneh ia di Wa Hồ”. Hoàng Mạnh Dũng, sinh viên sang bac Đại học Kinh tế TPHCM brei thau, dahlau di tuk tame maong iek, sa-ai hu nao pok gilau di rup patau Chủ tịch Hồ Chí Minh angaok jalan nao takai Nguyễn Huệ, piah thau dhar phor tal Wa HO praong uranam di bangsa: 

     “Dahlak mboh panuac ieu di Wa nyu pambak khang tal bruk bac da-a urak ini, jeng ye bruk hit di harei hadei. Dam dara ye kol drei meda ngak dom bruk sit yau ye bilan hè hijao, dom bruk halan hatian...”

               4 # Tỉnh Bình Thuận urak ni hu 166 hợp tác xã song yaom phun jien abih tih  107 tỷ, dalam nan hu 81 hợp tác xã gah ngak nong. Dom  hợp tác xã ngak nong daok sit sot, taneh pala drak jeng sit , phun jien ngak mbang takik, urang jakar khik ramik oh ka pabak hu bruk darak pasar . Kayua yau nan ye, dom hợp tác xã oh ka duah hu labik pablei tani tanat  kaya nong 

5# Sang iek ruak Bà Rịa, tỉnh Bà Rịa – Vũng Tàu brei thau, hadei di 3 harei tame iek ruak, urang njom cúm A/H1N1 camereip abih di tỉnh ini pren yava hu siam mekre veik saong hu nao sang veik. Dahlau di nan , harei 4/6 Khoa nhiễm sang iek ruak Bà Rịa hu taduan sa urang likei ruak, ndih tapui thun thun 1964 daok di xã Bình Giã, huyện Châu Đức daok patuk, pandiak khang, sổ mũi, pandik tarakaong, rup glaih glar, lah mbang.

       Patui di ni dom khau tin dunya:

6 # Harei 10/6, harei roya brei ka urang takre giải vô địch chaoh blong dunya  2018  hu peih tabiak dalam prong prang meng danak dak hòa nhạc prong song danak dak ilamu di ban ine đô Matxcơva- Nga. Labik brei ka urang takre  (Fan zone) ginup labik ka  25 ribau menuac, hu padang ngak di angaok  Đồi chim sẻ, labik rah tabiak  mbang dit peih mbaok World cup harei 14/6 anak tal song  mbang chung kết harei  15/7.

7#Tui pathau khan drap ar di cư dunya thun 2018 bahrau ba tabiak, thun ka  miat Ôxtrâylia hu dom triệu phú pilih ruah lac labik daok siam mekre tuk pachreih hu labaih 10 ribau menuac hu drap ar meng 1 triệu đôla Mỹ tagok mai daok. Dalam nan, ralo meng lac urang Trung Quốc, Ấn Độ saong Anh. Men-bơn (Melbourne) saong Sit-ny (Sydney) lac 2 dalam 10 ban hu dom triệu phú pilih ruah piah daok. Dalam nan Sit-ny hu taong yaom lac ban chit  abih di dunya..

            8 # Abih tih yaom jien piah peih mbang taom gaok  pakat lgong  di Mỹ song  Triều Tiên meda tagok tal 20 triệu đôla Mỹ - Nan lac panuac khan di  Thủ tướng Xinh-ga-po Lý Hiển Long ba tabiak harei  10/6. Ong Lý Hiển Long brei thau, yaom lac ini sa pok jien prong, song nyu biak njauk bruk kayua ni lac mbang camereip rah tabiak mbang taom gaok di 2 urang dang akaok 2 negar, hu mong lac oh njauk gauk  . Mbang taom gaok ni cong khin peih tabiak dom jalan  prong ka siam mekre tani tanat di  khu vực jang yau di dunya./.

Ái Nghiêm/ VOVTPHCM