#/ Harei kabroi 11/12, akaok negar Trần Đại Quang song kapul urang QH ban raya HCM hu taom gaok tapon nyaom bol pan phao krong di ban raya HCM, pathau khan ka mbang nyaom ka 2, QH mbang 14. Javap Jalei dom panuac di cử tri, Akaok negar ndom lac, bruk khik ramik palei negar dalam tuk vak salih bahrau dok caik tabiak dom bruk ngak bahrau, caik ka gah tapon nyaom bol pan phao krong brei caga ngak siam dom bruk, khik kajap chủ quyền, yasa, tong abih di taneh ia dalam yaok bruk ngak

#/ Jeng dalam harei 11/12, di mblang bein Thống nhất (HN) peih bruk nduac “ka uranaih HN”, kayua kapul hữu nghị VN – Canada peih tabiak, piah padang kadung jien daong iek ruak ung thư saong ruak baoh hatai ka dom uranaih gaok kan kandah. Tal urak ini, bruk nduac kayua uranaih HN hu rik daong jaik sa tỷ đồng sa thun. Meng kadung jien daong ini, labaih 300 uranaih njauk ruak gaok kan kandah di grap labik dalam taneh ia tapa truh hu ruak kik, hu diuk rai siam jang dalam gavang tangin anit ranam di amaik ame, gauk gar, puk palei.

#/ Tỉnh Sơn La urak ni hu 100.000 boh sang pachreih bac, 127 talei but pajaih pachreih ba. Tapa nan, rik dong dak padang talei jum pataom bangsa, padang XH bac megru, paglong ilam, pato pakai urang, pabak urang naih gheih di bhum mik va bangsa takik. Tuk vak anak ta, Sơn La palagaih piah kapul pachreih bac dom pakat peih ngak siam lagaih, padang ngak Sơn La jeng sa labik hadah hadai dalam bruk pachreih bac, pachreih megru, padang XH bac megru di taneh ia.

#/ Urak ini, bruk tảo hôn dalam sang bac di dom huyện bhum ceik Nghệ An daok rah tabiak khang. Tapa nan oh lac ngak kan kandah tal dom adei bo daok ngak kan kandah tapak tal chất lượng dân số saong dom bruk kinh tế, XH di puk palei. Anak bruk pandiak yau nan, dom kapul nyaom saong karja dom huyện bhum ceik yau Kỳ Sơn, Tương Dương, Quế Phong, Quỳ Hợp, Con Cuông, Quỳ Châu…hu tame bruk, patabiak saong peih ngak ralo sarak pambuak tal bruk baoh sang; ba dom quy định di hukum ka umo likhah caga. Sanya oh tảo hôn.

#/ Hội Chữ thập đỏ ban Đà Nẵng bahrau peih harei patom brei darah halan hatain. Ngan song kadha “ Sa taok darah brei nao, sa rai duik dok veik” jiak 600 urang đoàn, dam dara hu mbaok tame brei 500 đơn vị darah. ĐN lac sa labik hu urang brei darah halan hatain glong abih di taneh ia,  labaih 500 urang di 18 kapul brei darah dự bị song kapul kapul brei darah halan hatain hu mbak tame brei darah.

#/ Harei kabroi 11/12, di sang megik Rahim-Quận 1, ban raya Hồ Chí Minh, mban lambaok Islam ban raya Hồ Chí Minh peih bruk ngak Maulid Nabi Muhammad, 1438 Hồi lịch -2016 saka ia bulan. Ban raya HCM hu labaih 6.500 urang Islam, ralo meng lac bhap bini Chăm, daok pataom gauk jeng 21 jamaah vil val dom surao, sang megik. Dalam dom thun tapa, hu bruk sangka di Đảng, karja, saong dom gah chức năng, rai diuk mbang ngiu daok dang di bhap bini Chăm Islam di ban raya HCM dak harei dak hu tani tanat saong patagok.      

#/ Gah pato megru tỉnh Bạc Liêu dok pambuak bruk song dom jabat chức năng, cơ sở pato megru di tỉnh jhul pakhang bruk pathau khan pacang caga bạo lực học đường song dom tệ nạn xã hội (cờ bạc, lô đề, game online, cá độ bóng đá, ma túy...) tui rilo jalan ngak,  lagaih song bruk dong ba paglong akaok sahaneng song bruk ngak di anek saih, SV. Pagap yau, dom cơ sở pato megru pataom tame pathau khan, paglong ilamu,  adat hukum ka anek saih, SV, peih bruk pathau khan asar kadha dom hukum, jhul pakhang bruk duah thau hukum tapa dom mbang   sinh hoạt chuyên đề, ginum biai, diễn đàn dam dara.

Patui di ini dom khau tin dunya:

#/ TQ saong NB njauk hatai gauk brei pambuak bruk piah padang jalan taom gaok angaok lingik saong angaok tasik di mintri QP dua taneh ia dalam tukvak samar di abih. Dua gah jeng njauk hatai peih mbang nyaom akaok meti piah dom chuyên gia ginum meyai ka ô nhiễm hàng hải dahlau bilan 3/2017 saong peih praong dom mbang ginum meyai piah pambuak bruk taong tayah kol tội phạm tapa dom taneh ia, yau buôn lậu saong pablei salih ma túy. Dua taneh ia jeng sanya jhul pakhang talei pambuak bruk ka khik iek bruk ngak ikan saong mbaoh tangin tame sanya duah saong daong urang njauk bala angaok tasik.

#/ Rajaei Pháp meda brei dui atah bruk khẩn cấp tal harei 15/7/2017 piah khik caga siam mekre ka mbang palih ruah tổng thống song Qh hu rah tabiak dalam bilan xuân anak tal. Min piah ngak hu bruk nan, brei hu Hạ viện song Thượng viện Pháp brei tapa. Meng harei 11/2015, hadei di tuk rah tabiak rilo mbang tấn công khủng bố di Paris (Pháp) ngak ka 130 urang metai, Rajaei kayua Đảng XH dang akaok hu ba tabiak bruk khẩn cấp, dalam nan hu tagok quyền hạn piah cảnh sát hu adat parang iek song chap kreik dom urang medhil lac pambuak kol jhak.

#/ Harei 11/12, TQ hu cuh vệ tinh thời tiết Phong Vân-4 tagok quỹ đạo baoh taneh. Phong Vân-4 lac vệ tinh akaok meti dalam dom vệ tinh thời tiết ka 2 di TQ hu cuh tagok quỹ đạo baoh taneh. Vệ tinh Phong Vân-4 meda tui iek bầu khí quyển, aih ngin saong lingik tasik di TQ saong dom bhum jaik taphia, daong TQ salih barau bruk kuhria mboh dahlau bruk di langik tasik./.