Piah duh ka bhap bini nao mai hu lagaih, takik abih bala angaok jalan mbak saong gal tavak jalan dalam tuk Tet Nguyen dan nethak Athaik Waw, Akok Mentri Padang ngak  caong khin: dom jabat pambuak tal brei parilo radaih pajeng ba duh ka bruk nao mai di Bhap bini, juai caik ka bhap bini cang suai bo oh hu radaih pajeng nao palei; oh caik rah tabiak pablei harak ve tagok yaom, pambak tame pablei chiat oh njauk bruk ba tabiak.

Tỉnh uy Vĩnh Long birau peih bruk pataom mbaok, urang ngak bruk agama  saong dom urang hu angan je dalam bhap bini bangsa takik salam uan raok Dang, raok Bilan pataih nethak Athaik Waw. Thun 2025, tui jalan diukrai “diukrai siam radiuk, gheih agama”, dom agama saong bhap bini bangsa rik tame labaih 400 ti dong ka dom bruk ngak tani tanat raidiuk, padang ngak tatua jalan mbak, daong urang kathaot…rik tame ngak siam dom kadha padang palei pala birau. Mbiah tal ini, dalam tinh hu abih tih 98 dalam 105 xã bhum palei pala birau; 20 xã mek hu tanut chuan palei pala paglong saong 1 xã kieu mau.

Bo Tu lenh Bhum Canh sat tathik ka 4  padang kapol nao rivang, alin kaya saong ayuh Tet 42 baoh saong raidiuk kan kandah di Dac khu Phú Quốc, yaok paok yaom 1.000.000 đồng. Abih di nyu, Bo Tu lenh Bhum Canh sat tathik ka 4 alin brei 20 phieu “nao darak Zero đồng”, yaok phieu yaom 500.000 đồng ka dom baoh sang raidiuk kan kandah. Dom paok pandap yaom lac  mbuan mbiah min ndung bak hatai ranam di urang jakar, urang lin Canh sat Tathik Viet Nam ngan  haong bhap bini.

Kapol Pachreih bac Ban Can Tho pambuak haong dom don vi daong pahala birau alin brei paok jien pachreih bac, pacheih megru Lương Định Của ka 278 anek saih  naih joi, yaok paok yaom 3 trieu dong. Ong Nguyễn Văn Khởi, Phaok Akaok UBND Ban Cần Thơ khan lac, yaok paok jien bac yaom lac oh praong min ndung bak hatai ranam, pachreih ba, pabak hatai jia saong pakhang piah dom adei yam tapa kan kandah, kham ngak tui hatai caong takre bac da-a saong yam tagok dalam raidiuk.

Caong khin duah hu jien tame daong baoh sang, rilo anek saih sinh vien daok bac di TPHCM palih daok veik ngak bruk duah jien. Jien bilan harei Tet tagok 3 tal 4 mbang dut haong bhian harei. Bingu ini, Sang ilamo sinh vien TPHCM pambuak haong dom don vi peih bruk “ Bilan pataih yaok trieu hatai ameh” piah  alin 2.000 paok pandap  ka dom anek saih oh hu nao palei . Langiu di nan, dom sang bac dai hoc hu rivang, jak ba saong alin kaya ka sinh vien di ban mbang Tet, piah daong ka sinh vien bui sambai dalam dom harei akaok thun.

Bruk palih ruah di Thai Lan daok pachreih bruk caik hatai di manuac sia dalam saong langiu negar. Tapa mbang kuhria phieu mboh đảng Tự hào Thái ba akaok, peih tabiak bruk ngak chinh tri saong padang rajaei lien minh. Bruk duah thau hatai sahaneng  ka bruk ramik pasiam Hukum negar brei mboh labaih 19,5 trieu cu tri,  sumu 60% njauk hatai ka bruk ramik pasiam ini.

Tuyet laik kapal ba tal dom mbang ahaok di mblang kapal ahaok dunya Jeju Hàn  Quốc atah klaka di harei 8/2, ngak labaih 11.000 tuai damuai daok veik di kaoh pulao Jeju. Mblang kapal ahaok Jeju saong karja tinh tuk halei jeng caga blaoh blai kaya kan piah daong ka tuai damuai daok gar tavak. Panuac kakei tuyet laik kapal  di dom bhum ceik di pulao Jeju.

Mexico brei 2 sruh gilai pajeng labaih 800 tan kaya mbang saong kaya kan daong ka bhap bini Cuba, dalam tuk nang luong saong an ninh kaya mbang di taneh ia Caribe daok gaok kan kandah. Tong thong Mexico kakei taneh ia ini daok peih buk daong ngak pahala ka Cuba, gam haong nan ginum biai haong Mỹ daong ka Cuba menyek nhien lieu piah pabak dien saong bruk nao mai meng radaih, jeng yau palaik njiak bruk Mỹ ba tabiak jalan taong phạt./.