#/ Di kjabat ngak bruk di Rajaei, Thủ tướng Nguyễn Xuân Phúc taduan raok ong Chư-tô-mư Ta-kê-bê, Cố vấn đặc biệt Liên minh Nghị sĩ hữu nghị Nhật – Việt song ong Si-gê-nô-bư Na-ga-mô-ri, akaok Tập đoàn Nidec, daok rivang VN. Tapa nan, thủ tướng tong yaom glong talei pambuak bruk biak prong dalam VN- Nhật.

#/ Hadei tuk tahu hu bruk taong paoh uranaih dalam tuk mbang huak di nhóm uranaih tự phát di jalan Nguyễn Oanh, phường 17, quận Gò Vấp, ban raya Hồ Chí Minh, dom kapul nyaom di phường 17 hu nao pasang iek saong  brei padeih bruk ngak di nhóm uranaih ini. Amuk Huỳnh Thanh Nhàn, akaok Ủy ban bhap bini phường 17, quận Gò Vấp brei thau: “Urak ini công an phường daok kreik dua  urang khik uranaih nan saong daok ngak harak pathau tagok quận. Công an quận hu tacei pato bruk mek lời khai, nhân chứng saong ba dom uranaih nao giám định... bloh tapa nan bo hu jalan langyah”. 

#/ Sở Y tế, Sở pato megru ban raya song  Kapul dong uranaih kan kathaot ban sit Đà Nẵng bahrau mbaoh tangin tame danak dak iek ruak boh hatai ka uranaih metui medar ban ĐN tuk vak 2016-2020. Tui nan, meng ni tal thun 2020, hu labaih 300 uranaih kan metui medar di ban sit ĐN song tỉnh Quảng Nam hu blac draih boh hatai brei saoh, aong yaom jien piah ngak abih tih labaih 16 tỷ đồng. Hu thau, urak ni Kapul dong uranaih kan kathaot metui medar ban ĐN pambuak bruk song dom sang iek ruak peih bruk  Bilac raih saoh ka labaih 800  uranaih ruak boh hatai di ban ĐN song tỉnh QN, yaok mbang blai draih boh hatai meng 60 tal 90 triệu đồng.

#/ Tal urak ini, 112 baoh sang bhap bini bangsa Khmer daok di xã An Bình, huyện Phú Giáo, tỉnh Bình Dương hu peih brei taneh pala drak, ngan saong abih tih taneh labaih 116 ha. Dom baoh sang hu daong pajaih phun pa-aok blait, khak drak saong dom pajaih phun pala takik harei piah pala pablak. Dom baoh sang hu brei limo pajaih piah rik daong ba bruk ngak saong patagok jien mek tame.    

#/ Cục pacang caga bala meng lingik tasik, di Tổng cục thủy lợi mintri ngak nong song patagok palei bahrau pambuak bruk song Sở ngak nong song patagok palei pala tỉnh TG peih bruk brei bồn caik ia taba ka labaih 1.500 boh sang kan di bhum atah, labik daok atah jalan ia di dom  huyện Gò Công Tây, Gò Công Đông, Tân Phú Đông  song ban sit Gò Công.Tui nan, yaok boh sang hu brei 1 bồn inox –SOS hu caik labaih 1,5 mét khối ia, hu yaom 6 triệu 500 ribau đồng. Bruk hu bồn caik ia meda dong ka mik va khik piah ia taba, patrun kan kandah dalam bilan thu lagu.

#/ Meng akaok thun tal ini, tỉnh Quảng Ninh hu 23 urang ruak patuk, dalam nan hu 9 urang dương tính saong khuẩn patuk. Ini lac ruak ngak brei biến chứng nguy hiểm, mbuan ba tal bruk metai ralo ka uranaih umo ala 3 bilan. Ruak patuk dom bilan akaok thun ini rah tabiak di Quảng Ninh ralo jang duk saong thun bloh, min oh ka jeng jit saong jeng daok dalam pasang iek hu di jabat chức năng.   

#/ Mintri ngak nong song patagok palei pala hu panuac brei padeih pablei menuk ada song pandap ngak mbang menuk ada oh tapa xử lý nhiệt meng bang Wisconsin song bang Tennessee di Mỹ meng harei 10/3/2017, kayua dom bang ni dok hu jit cúm menuk ada hu động lực glong H7 song cúm menuk da  độc lực beir H5N2.

Patui di ini dom khau tin dunya:

#/ Harei kabroi 16/3, núi lửa Ét-na angaok pulao Xi-xin di Italia nyu pruh tabiak nham thạch, ngak patuh patau takik abih 10 urang njauk rambuah.

#/ Jeng dalam harei 16/3,  Ngoại trưởng Nhật Bản Fumio Kishida song Ngoại trưởng Mỹ - Tillerson njauk hatai jhul pakhang bruk ieu Triều Tiên tah klak dom danak dak tên lửa song hạt nhân. Brei panuac di var họp báo hadei di mbang ginum biai song Ngoại trưởng Tillerson di ban ine Tokyo, ong Kishida brei thau 2 gah mboh lac dom danak dak patagok tên lửa song  hạt nhân di  Triều Tiên lac “sa bruk oh njauk ngak”

 #/ Taneh ia Prang harei kabroi tatuan megei kayua bruk cuh phao di sa sang bac trung học Tốc-cơ Vin, ban Grát-xờ, gah meraong taneh ia Prang; ngak 14 urang njauk rambuah. Gam harei nan di Paris, sa bưu kiện patuh di jabat Quỹ Tiền tệ dunya. Dalam taneh ia Prang daok dalam bruk báo động./.