# Bỉa harei 16/6, pak jabat Raja-ei, Thủ tướng Nguyễn Xuân Phúc taduan raok phaok Thủ tướng Thái Lan Tha-na-sắc Pa-ti-ma-pra-kon daok rivang saong ngak bruk pak Việt Nam. Thủ tướng taong yaom glaong talei pambuak bruk du dua negar pak diễn đàn khu vực saong dunya, taphia di nan caong khin dua negar abih hatai pambuak bruk haong dom taneh aia, dom kapul nyoam dunya dalam bruk khik iek, pandar khang kajap saong hu kein laba aia kraong Mê Kong, khik caga kein laba di dom taneh aia gah ala kraong Mê Kong. Ndom lac Việt Nam saong Thái Lan lac dua negar pambuak bruk chiến lược, Thủ tướng caong dua negar pambuak bruk peih ngak siam danak dak peih ngak quan hệ đối tác chiến lược 2014 – 2018; peih ngak hu kein laba bruk Sanya họp rajaei dua negar Việt Nam – Thái Lan dalam tukvak anak tal.

#/ Jeng dalam harei 16/6, di HN, mintri công an pambuak bruk song mintri pato megru, mintri ilamu thể thao song du lịch peih mit tinh pachreih tui bilan pacang caga ma túy. Pok panuac di labik ni, Phó Thủ tướng Trương Hòa Bình ndom lac. Tuk vak tapa, bruk pacang caga ma tuy hu bruk sangka biak praong di Đảng, rajaei song bruk pachreih tui di dom pakat, dom gah song abih bhap bini, bruk pacang caga ma túy hu siam lagaih jang.

# Sơn La urak ini jeng daok dalam angan dom tỉnh hu urang njaom HIV/AIDS glaong abih dalam negar, ngan haong labaih 9.000 urang hu hồ sơ khik riak.  Ngan haong bruk daong di Dự án “Paglaong pren khang pacang caga HIV/AIDS labik tiểu vùng kraong Mê Công peih prong” mesre Gilang pariak Patagok Châu Á, thun dahlau, tỉnh Sơn La hu pataom tame peih ngak bruk pacang caga HIV/AIDS pak 46 xã, dalam 7 huyện dalam tỉnh. Tapa nan, hu duah mboh labaih 300 urang njaom HIV bahrau, pataom veik urang njaom HIV daok diuk dalam tỉnh nan lac jaik 2.800 urang.

#/ Kapul pasang iek liên ngành ka pandap mbang hacih saat ban Đà Nẵng hu pasang iek, mek mẫu dut iek di dom  kho đông lạnh dom janih pandap kaya ikan pabak ka bruk pablei salih dalam tỉnh., mek mẫu dom janih kaya ikan piah payua nao dut iek dom chất yau phenol, chì, thủy ngân. Bruk dut iek chất lượng dom janih pandap kaya ikan caik liar piah tagok bruk hacih saat pandap mbang  dalam ban, dong ka bhap bini pablei salih song pandar kaya ikan hacih saat. Mesup 16/6. Kapul hu pasang iek, mek mẫu dom janih kaya ikan di 5 cơ sở kho liar di drak đầu mối cảng ikan Thọ Quang piah payua nao dut iek.

# Đội Cảnh sát môi trường Công an bal Quy Nhơn, tỉnh Bình Định hu peih bruk am cuh klaak labaih 1 tấn rilo pabui mbau bruk. Taduan hu panuac khan di bhap bani, Đội Cảnh sát môi trường Công an Quy Nhơn pambuak haong dom gah chức năng duah mboh pak canah 4 jalan Lê Đại Hành - Trần Quốc Toản, bal Quy Nhơn hu 11 giỏ pandap oh hu po dang. Tapa pasang iek, gah dalam hu 1.028kg rilo pabui mbau bruk. Bol lin chức năng hu pathau khan duah po pandap ini min jeng oh mboh thei tabiak mbaok taduan nan ye ba nao am cuh tui njauk adat hukum.

#/ Sang iek ruak Đa Khoa Cai Lậy, tỉnh Tiền Giang bahrau cấp cứu hu siam sa mbang njauk jru mek ngak ka 62 urang ngak tame sang iek ruak. Kreik pandiak 15/6, hadei di var lisei laho. 62 urang ngak Công ty trách nhiệm hữu hạn dệt len Ecoway di xã Phú Nhuận, huyện Cai Lậy, tỉnh Tiền Giang tame sang iek ruak kayua taaok, havin akaok, pandik tain, pandik akaok. Var lisei laho ni hu rilaow pabui kho, ratak xào, ia bai bei plom, mắm kho chay, tương hột...Biak patuah, dom urang ngak njauk jru hu ba tame sang iek ruak njauk tuk vak.

# Dalam dua harei tapa (15-16/6), Ban tacei pato 389 tỉnh Vĩnh Long tabiak pasang iek bruk ngak tabiak, pablei salih khak drak dalam 2 huyện Trà Ôn saong Tam Bình, tapa nan duah mboh saong pacang cakak urang ngak tabiak khak drak suan adat hukum, piah pasiam veik trật tự gah pablei salih pandap panda kaya nong. Ban tacei pato 389 tỉnh Vĩnh Long brei thau, tui bruk ba tabiak, Kapul meda nao pasang iek 535 đại lý, labik pablei salih jru khik caga phun pala dalam tỉnh.

Patui di ni dom khau tin dunya:

#/ Mintri Quốc phòng Japon brei thau, sa kapan di hải quân TQ hu mbaok pak di di gah langiu bhum tasik Nhật Bản, jiak palao Ki-ta-đa-i-tô di tỉnh Ô-ki-na-oa dalam tuk bruk meriak gauk daok tagok khang kayua dom bruk ngak di TQ angaok bhum tasik. Mintri ngoại giao Japon hu jao ka Đại sứ quán Trung Quốc di Tokyo công hàm oh njauk hatai ka bruk kapan do thám lớp Đông Điệu di TQ nao tame labik ni.

 # Dom urang jakar gah y tế Malaysia harei kabroi 16/6 brei thau dom urang njauk ruak tangin takai cambuai dak harei dak tagok samar di negar ini. Urak ini hu jaik 1.380 urang njauk ruak tangin takai cambuai meng 5 bingun tal 11 bingun bilan 6, patagok 6,4%  dut haong adit dahlau. Jalan patagok samar hu mboh meng 24 tal 30 bilan 4 ngan haong 794 urang njauk ruak. Mentri Y tế Malaysia hu payua harak kakei tal taong abih dom jabat y tế puk palei piah pacang cakak jit ruak pambak prong.

#/ Báo chí Mỹ brei thau sa gilang pariak angan Stonegate di bang Florida (Phlo-ri-đa) di Mỹ hu vak angan tame sajarah VN tuk tabiak thẻ tín dụng camereip meda pandar di Cu Ba meng di tuk Washington song La Habana pambuak veik talei rohim. Giám đốc điều hành (CEOdi gilang pariak Stonegate, ong David Seleski (Đa-vít Xe-le-xki) ndom lac , salih ka  jien mbaok, urak ni thẻ tín dụng pandar di Cu Ba, urang meda pandar dalam dom mbang ngak bruk bayar ka dom chi phí yau di dom negar karei karei./.