#/ Melam kabroi, 20/3 di Phủ Chủ tịch, akaok negar Trần Đại Quang song haduik ong hu taduan raok Tổng thống Israel Rơ-ven Ru-vi Ríp-lin song haduik dok rivang Việt Nam meng  harei 19- 25/3. Hadei di var taduan, akaok negar Trần Đại Quang hu ginum biai song Tổng thống Israel Rơ-ven Ru-vi Ríp-lin. 2 urang dang akaok ginum biai rilo bruk pambuak gauk di 2 negar gah pablei salih, ngak nong, ilamu, công nghệ, pato megru song brei patagok jang talei pambuak bruk ni dalam tuk vak anak tal, abih di nyu dalam bruk kinh tế song ilamu - công nghệ.

#/ Bruk pala toi Lý Sơn angaok taneh cuah di huyện Bình Sơn, tỉnh Quảng Ngãi tuk camereip hu jak jeng, ba mai kein laba glaong; urang nông mek tame labaih 30 triệu đồng ngan saong jaik 1.000m2 sa vụ pala. 

#/ Pachreih tui bilan dam dara Việt Nam 2017, Tỉnh đoàn Quảng Trị hu peih tabiak song tacei ba yaok  cơ sở Đoàn peih ngak dom danak dak, bruk ngak cambaih laih, hu chất lượng, jum pataom dak padang palei pala bahrau song văn minh đô thị.Meng phun jien XH hóa, Tỉnh đoàn Quảng Trị padang ngak 3 boh sang nhân ái brei ka dom boh sang dalam sarak karja, jao pok jien padang ngak danak dak dam dara “ Hadah hadai jalan palei” di huyện Triệu Phong, dong jien padang ngak danak dak mblang bein dam dara song cột mốc chủ quyền palao Trường Sa ka Đoàn sang bac Cao đẳng sư phạm Quảng Trị.

#/ Hajan sung bilan saong ia kakua gam gam hu ngak ka bọ xít jamuok caih anek, palai pajoa trak di dom huyện gah meraong tỉnh Lâm Đồng. Tukvak ini, 90% taneh pa-aok blait di puk palei njauk khat lahik abih, tui kuhria jaik 850 tỷ đồng.

#/ Pagam tal bruk ikan metai rilo ndaong mbak dom danao ia di palei Tân Lợi, xã Xuân Giao, huyện Bảo Thắng harei 17/3, Sở Tài Nguyên song Môi trường tỉnh Lào Cai hadei di tuk peih bruk tui iek, hu thau makna ikan metai lac kayua njom ia nerak tasuak di sang mac ngak khak DAP ka 2. Hadei di bruk nan, gah sang mac khak DAP ka 2, taduan trách nhiệm song bayar 200 triệu đồng piah bồi thường khat lihik ka jiak 7 tấn ikan metai di 10 boh sang di palei Tân Lập.

#/ Tapa 10 thun, ban Cần Thơ hu công nhận labaih 12.700 hồ sơ urang hu buh pren yava ka taneh ia. Urak ini, dom urang hu buh pren yava hu mbang tui sarak daong yaok bilan di ban lac labaih 7.300 urang ngan saong abih tih yaom jien jaik 10 tỷ đồng. Langiu di nan, ban daok sangka tal bruk iek glang pren yava, sang daok, y tế, sản xuất pablei salih, pato bruk ngak, ba bruk ngak ngan saong abih tih phun jien labaih 1,800 tỷ đồng; tapa nan rik daong paglaong rai diuk urang hu buh pren yava ka taneh ia.

#/ “Drak pasa puac adit di mblang bein Bạch Đằng”  hu peih tabiak dahlau di harei 30/4, mong lac sa bruk prong di du lịch ban raya HCM. Darak pasa peih ngak praong, lưu động, luân phiên peih ngak tui dom chủ đề karei di gauk, lagaih song yaok bilan, ngak jeng sa bruk bahrau song meda yaih khan hu rilo janih pandap di dom palei ngak karei di gauk di VN

Patui di ini dom khau tin dunya:

#/ Dalam harei dunya hanem phon (20/3) thun ini ngan saong kadha “Klah rabha saong anit ranam”, dunya pamaong tal sa rai diuk siam mekre, son mbon, padang sa dunya hanem phon, Liên hợp quốc saong ralo taneh ia angaok dunya hu peih dom bruk ngak  pahadar harei ini.

#/ Tổng thống Bra-xin Mi-xen Tê-mê harei kabroi hu panuac trấn an bhap bini, hadei di bruk rilaow mbau bruk di negar ni. Brei panuac haong gah báo giới, hadei di var taom gaok dom urang dang akaok negar langiu, ong  Tê-mê brei thau, Bra-xin hu pathau khan angan dom công ty pagam tal bruk bê bối ni. Tui ong Tê-mê, Bra-xin hu labaih 4 ribau sang mac ngak rilaow song tok hu 3 sang mac pambuak tal bruk ni.

#/ Sa sruh kapal haok di hãng pakal haok Nam Xu-đăng gaok bala tuk par trun di mblang kapal haok di ban sit Au, gah Tây nam taneh ia ini. Bruk ini rah tabiak harei kabroi 20/3 hu ngak dom urang njauk rambuah. Makna bruk ini daok hu pasang iek duah thau./.