1/ Công an ban sit Quảng Yên, tỉnh Quảng Ninh bahrau chap mek hu jiak 1 tấn limek, bì pabui nhập lậu, oh hu harak gar brei thau ka asar di nyu. Công an ban sit Quảng Yên ngak harak biên bản mek tong abih pandap nan song langyah njauk tui adat hukun.

2/ Tuk tết Nguyên Đán thun ini, Thành Đoàn Đà Nẵng pambuak bruk saong pasak bruk ngak XH dam dara ban raya HCM alin 350 harak radaih ka sinh viên gaok kan kandah di dom sang bac Cao Đẳng, Đại học dalam ban Đà Nẵng nao palei rok tết. Langiu bruk daong harak radaih, dom SV ini daok taduan hu sa paok pandap yaom 100.000 đồng. 

3/ Ngak tui tacei pato di mBan Bí thư Trung ương Đảng ka bruk tết patak pataom, UB bhap bini tỉnh Gia Lai bahrau tabiak harak, pandar dom jabat karja dalam tỉnh oh tadhau ayuh tết, oh alin hadiah pandap ka urang dang akaok. Langiu di nan, UB bhap bini tỉnh Gia Lai dok peih bruk pasang iek, langyah catang dom kapul nyaom, menuac urang ngak suan bruk pandar kadung jien karja, radeih, drap ar di karja suan jalan adat ka dom bruk ngak dalam tuk tết, rija roya.

4/ Daok labaih sa adit tra nan lac tal tết  anek sak menuk 2017, dom harei ini, urang nông di huyện Lai Vung, tỉnh Đồng Tháp daok jar var kuhria ka vụ quýt hồng pablei tết. Min, thun ini, kayua langik tasik oh lagaih  ngak ka sản lượng quýt hồng trun biak ralo. Duk saong thun 2015,  baoh kayau pablei tết thun 2017 trun meng 20% tal 30%.

5/ Meng ni tal dahlau Tết Nguyên đán Đinh Dậu 2017, Ủy ban Mặt trận negar tỉnh Bình Phước pambuak bruk song dom pakat ủy đảng, karja, kapul nyaom dom DN song urang ngak pahla…padang dom kapul nao rivang, brei pandap tết ka dom urang dalam sarak karja song dom boh sang kan, biak kan kandah. Tui kuhria hu jiak 40 ribau urang hu brei pandap dalam tuk tết ini. Yaok pok pandap yaom 300 tal 500 ribau đồng, dalam nan hu har, kẹ, dom pandap mbang menyum yaok harei song jien mbaok.

6/ Tết Nguyên Đán 2017, ban raya Hồ Chí Minh hu daong jien, pandap ka dom urang gaok kan kandah dalam ban rilo jang labaih 100 tỷ đồng duk saong thun dahlau. Thun ini, urang dalam sarak hu ban raya HCM alin hadaih pandap tui 3 yaom: yaom sa nan lac 3 triệu đồng sa urang. Yaom 2 lac 1,6 triệu đồng; yaom 3  lac 1,2 triệu đồng.

7/ Kapul nghệ thuật tỉnh Kon Tum pambuak bruk song kapul dong urang jaoh jo song uranaih metui medar tỉnh Kon Tum peih danak dak “ Aow liar bilan barak” ka urang kan kathaot di xã Đắk Long, huyện Kon Plông. Di labik ni, danak dak hu peih parang iek doh tako duh ka mik va kathaot, peih dom kadha main meng kan song dom adei, uranaih, cakak mbuk, cakak kakau tangin, jao pok jien bac ka anek saih kan kathaot yam tapa kan kandah bac da-a naih joi. Lingiu di nan, brei 600 pok pandap lac dom aow liar, phui, harak tapuk , har kẹo, ia tasau, pandap bac daa ka anek saih kathaot dalam tỉnh. Tong abih yaom jien ka danak dak “ Aow liar bilan barak” jiak 100 triệu đồng

Patui di ini dom khau tin dunya:

8/ Dom urang ngak praong Tây Ban Nha brei thau, dom tuai damuai mai tal taneh ia ini tagok 10% dalam thun 2016, lac thun ka 4 tagok gam gam. Jalan daong ka Tây Ban Nha taduan hu ralo tuai damuai mai meng bruk duh hatai ka kinh tế saong khủng bố ngak ka tuai damuai nyaik atah dom labik di Địa Trung Hải, lac dom labik du lịch merak gauk saong Tây Ban Nha.

9/ Mintri ngak nong Séc brei thau kum menuk ada daok mai veik negar ni hadei di 10 thun song hu panuac kakei bhap bini ngak dom jalan pacang caga jit ruak pambak tabiak. Anek ruak H5 hu duah mboh dalam darah di dom drei Thiên Nga song menuk ada di 2 trang trại rong sit di gah merong negar  Cộng hòa Séc. Dom nhân viên thú y hu pacang veik labik hu menuk ada njauk ruak dalam bán kính 10 km piah cakak jit ruak njom mbak.

10/ Tổng thống Venezuela Nicolas Maduro brei thau lac dui atah bruk pandar jien 100 bolivar, jien nội tệ hu yaom praong, tal harei 20/1/2017. Tui urang dang akaok Venezuela, bruk ini lac piah ngak sahanang hatai bhap bini dalam tuk bruk blei pandar tagok glaong tuk tame thun barau./.