1# Kapul doanh nghiệp pandap Việt Nam chất lượng glaong (BSA) brei thau, dalam 4 harei meng 6 tal 9/10 anak tal, di pasak Xúc tiến pablei salih ngak nong  Hà Nội meda rah tabiak mblang darak Việt Nam chất lượng glaong gah pandap mbang menyum – kaya nong hacih. Mblang darak hu parabha jeng dom bhum praong ye : labik pandap ka mbang menyum; labik dịch vụ daong di dom gah sản xuất ka pandap mbang menyum ka bao bì, công nghệ; labik parang iek padai brah; labik kaya nong hacih …piah dui pagam doanh nghiệp.

2/ Di Yên Bái, lễ hội quế mbang ka 2 thun 2016 hu peih tabiak meng harei 7 tal harei 8/10 ngan saong kadha “Ngọt ngào hương quế Văn yên” piah patagok bruk yaih khan rup binguk, sản phẩm quế; daong jalan ka dom doanh nghiệp taom gaok, ndom meyai nao mai pachreih dom urang đầu tư; patui yaih khan tiềm năng, prn khang, dom yaom glaong ilamu meng kan hadah krah di bhap bini bangsa Dao bhum quế, ngak hu kein laba dom tuyến DL

3# Sở ilimo padhih saong du lich tỉnh Sơn La barau peih mbang pakacah “ duah thau adat hukum ka pacang caga taong paoh dalam sang thun 2016. Dom kapul pakcah meda pakacah 3 asal kadha hu : salam; duah thau ka hukum pacang caga taong paoh dalam sang saong tiểu phẩm sân khấu. Bruk ngak di mbang pakacah lac piah rik daong paglaong akaok sahanneg ka dom urang jakar, urang pathau khan mai meng dom huyện, ban ka bruk pacang caga taong paoh dalam sang jeng ye dom kanjah jhak di taong paoh dalam sang ka menuac urang, sang saong xã hội.

4/ Di Thừa Thiên Huế, mban chỉ huy pacang cakak ia sua saong ruah duah daong urang njauk  bala tỉnh brei thau, di ban sit Huế hu hajan khang, ngak dauk di 30 labik angaok dom jalan saong labik dân cư. Ralo jalan dauk dalam meng meteh mét tal 7 tấc. Ia dauk ngak ka labaih 2000 radaih ô tô, radaih mac padam jariah angaok jalan. Daok labaih 35 ha padai saong njam patam puac vụ hè thu oh ka paik, yuak di dom puk aplei dauk dalam ia saong khat lahik trak.

5# Di Thanh Hóa, piah daong urang nong pala drak bilan đông 2016-2017, Uỷ ban bhapbini tỉnh Thanh Hóa tabiak bruk daong labaih 11 tỷ đồng ka sang urang nong, hợp tác xã, doanh nghiệp pala drak dom janih phun njam ye : baok tamun, tangei, ritak tương, bei prang, amraik…di taneh padai 2 vụ. Tanut daong meda parabha jeng 2 mbang, dalam nan mbang sa brei dahlau 70% yaom jien ngak ( jaik  8 tỷ đồng) piah daong blei pajaih tangei pala drak di taneh padai 2 vụ saong daong pah taneh, nyim taneh piah pala drak vụ Đông. Yaom jien daok veik, urang nong, hợp tác xã, doanh nghiệp hu taduan mek hadei di tuk ngak blaoh bruk pala drak bilan Đông 2016-2017. 

6/ Di NT, Gah Lương thực saong ngak nông LHQ ieu lac FAO pambuak bruk saong sở ngak nông saong patagok palei pala tỉnh daong pajaih, vật tư khak drak ka bhap bini dalam tỉnh piah ngak vụ mùa 2016 – 2017. Bruk ngak ini hu daong urang kan kathaot, urang gaok kan kandah kayua pandiak bhang di NT pasiam veik bruk pala drak.

7# 35 urang jakar, urang lin ngak bruk khik caga trật tự an toàn jalan mbak di dom đơn vị nghiệp vụ Công an tỉnh Yên Bái saong công an dom puk palei dalam tỉnh hu pasram paglaong ilamu, siam lagaih bruk khik iek saong langyah bruk menyum alak mbia di urang ndih radaih di jalan.

Patui di ini dom khau tin dunya:

8/ Tổng thống Iran Rô-ha-ni brei thau, dom công ty di Mỹ hu taduan rok tuk buh jien tame ngak mbang di Iran. Ini lac thỏa thuận brei mboh kadha patagok bahrau dalam bruk pambuak veik talei rohim di Mỹ saong Iran./.

9# Thủ tướng Nhật Bản Xin-dô-A-bê hu nao tal La Ha-ba-na  ravang Cuba. Ini lac mbang ravang akaok mereip di Thủ tướng Nhật Bản tal Cuba. Thủ tướng Nhật Bản Xin-dô-A-bê hu ginum biai saong Lãnh tụ cách mạng Cuba Phi-đen Cát-xờ-tô-rô (Phidel Castro), Chủ tịch Ra-un-Cát-xờ-tô-rô (Raúl Castro) saong taom gaok dom urang dang akaok di Cuba.

10/  Sa mbang taong mbom pametai rup  rah tabiak di labik gah meraong Xy-ri ngak 12 urang metai. Dalam nan hu sa urang gah đối lập di Xy-ri./.