1 # Jaik sa adit tabiak bruk, gah chức năng tỉnh Quảng Ngãi hu taong phat 50 mbang urang peih radaih ô tô, radaih patuh vi phạm nồng độ cồn. Dom bruk ini hu khan tal puk palei, jabat piah hu jalan pacang cakak, pato pakai.

2/ Tỉnh Tiền Giang urak ini hu tapon pabui jaik 600 ribau drei, dang akaok bhum taneran kraong Cửu Long. Dalam dom bilan tapa yaom pabui daok di tanut biar, meng 2,6 tal 2,8 triệu đồng sa tạ. Tui yaom ini urang raong khat jaik 1 triệu đồng/tạ. Piah klah bruk laik yaom, gah thú y tỉnh pachreih saong daong ka bhap bini patagok dom bruk raong pabui tui jalan pambuak gauk. Tuk camereip, dom bruk ngak ini patagok hu kein lagaih yau: patrun yaom kaom, paglaong chất lượng tapon pabui saong hu jien mek tame gilac meng bruk pablei khak pabui, patak pataom điện.

3 # Dam dara uranaih tỉnh Kon Tum bahrau tamat “Bilan dam dara” ngan haong ralo bruk ngak rik daong tame bruk padang ngak palei pala bahrau. Sa dalam dom kadha prong di bilan dam dara thun ini di tỉnh Kon Tum LAC “dam dara uranaih sa tangin padang ngak palei pala bahrau”. Tapa nan brei mboh ralo công trình, bruk di dam dara puk palei ba mai ralo siam mekre ka bhap bani, yau ngak bahrau 11 baoh tatua, sang rông, sân bóng chuyền; alin 800 pok pandap ka baoh sang kan kandah, pok jien bac ka anek saih; brei jru  oh mek jien ka labaih 1.000 mbang urang… ngan haong yaom jien jaik 2 tỷ đồng.

4/ Hadei di 3 thun peih ngak Nghị định 67 di rajaei, tỉnh Bến Tre tok ngak barau, pasiam veik hu 10 kapal ikan, oh ka samu ¼ duk saong bruk hu parabha. Tui harak angan brei adat tuk camereip, dalam tỉnh hu 26 urang likau ngak barau, ngak pasiam veik kapal, ngan saong yaom jien brei mesraiy labaih 67 tỷ đồng. Min hu 16 urang lakau luai, daok veik 10 urang dalam nan hu 3 kapal hu ngak pasiam veik, 7 kapal ngak barau; taong abih kapal ini jeng ngak dịch vụ hậu cần.

5 # Pak mblang bein pasak Hành chính tỉnh Bình Dương, Festival Đờn ca tài tử pakat negar mbang ka 2 hu peih pakak ngan haong kadha “Đờn ca tài tử Nam Bộ - Báu vật Đất phương Nam”. Meng angan ieu nan, Festival Đờn ca tài tử pakat negar mbang ka 2 lac labik mai ngak ilamo rivang ma-in ka bhap bani, tuai damuai dalam saong langiu negar, patui veik iek prong saong meyaih khan dom yaom glaong di janih nghệ thuật di bhap bani gah Meraong.  

6/  Harei 9/4, di Cung ilamu hữu nghi Việt Xô, Hà Nội nyaom darak pasar du lịch dunya  (VITM) Hà Nội 2017 ngan saong kadha “Hà Nội- labik mai tal di Du lịch Việt Nam 2017” hu tamat bloh hadei di 4 harei peih tabiak ngak saong ralo bruk ngak chreih chrai. Nyaom darak pasar DL dunya mbang ka 5 pachreih hu 650 doanh nghiệp, ngan saong 465 gian hàng, dalam nan hu 109 gian di dom doanh nghiệp saong jabat xúc tiến di 25 taneh ia saong bhum lãnh thổ hu mbaok tame.

7 # Hadei di klau harei pakacah chreih chrai, harei 9/4, Nyaom pakacah padhih dom bangsa tỉnh Lai Châu mbang ka VII thun 2017 hu tamat blaoh ngan haong huyện Tam Đường dang akaok kapul pakacah. Hu mbaok tame nyaom pakacah hu 28 kapul ngan haong labaih 200 vận động viên, mai meng dom sở, ban, ngành, huyện, bal sit bal prong dalam tỉnh. Dom vận động viên hu mbaok tame dom môn: Jhul gai, katung talei, parah còn, tù lu, cuh hane, cầu lông. Hadei di 3 harei pakacah Ban tổ chức hu pok brei dom  giải saong pok meyaom ka 140 kapul nyaom saong cá nhân.

Patui di ini dom khau tin dunya:

8/ Tui lệnh di Tòa án Tối cao Băng-la-đét, cảnh sát taneh ia ini harei kabroi hu kreik pabah mbang labik ngak klik Ha-da-ri-bát di ban ine Đắc-ca piah khik caga kraong Bu-ri-gan-ga, jalan ia praong dalam ban ini.

9   # Yaok ribau bhap bani harei kabroi pataom rgauk pak quảng trường Xéc-gơ Tooc (Sergels Torg) di bal ine Xtốcc-hôm (Stockholm) di Thụy Điển piah caik bingu, pahadar tal dom urang njauk bala di mbang tấn công khủng bố bố meng radaih tải harei 7/4 meng blaoh, ngak ka 4 urang metai saong 15 urang karei njauk rambuis. 

10/ Mintri y tế Ai Cập barau brei thau, dom urang metai saong njauk rambuah dalam mbang taong mbom tame nhà thờ Mar Girgis di ban Tanta pasak tỉnh miền tây (gah brak ban ine Cairo), tagok tal 96 urang, dalam nan hu 25 urang metai saong 71 urang karei njauk rambuah./.