1/ Harei kabroi, 18/7 di HN, Thủ tướng Nguyễn Xuân Phúc dang akaok bruk taduan raok Thủ tướng Slovakia RoBert Fico dok rivang VN. Thủ tướng Nguyễn Xuân Phúc brei mboh hatai jia tame mbang nao rivang di  Thủ tướng Slovakia RoBert Fico meda dong ba talei pambuak bruk rilo gah di 2 negar hu tame dalam jang, siam lagaih jang dalam tuk vak bahrau.

2/ Melam kabroi 18/7, di ban sit Đông Hà, tỉnh Quảng Trị, mintri ilamu TT saong DL pambuak bruk saong UB bhap bini tỉnh Quảng Trị peih harei pataom nghệ thuật 5 taneh ia Việt Nam, Lào, Campuchia, Myanmar saong Thái Lan thun 2016”. Hu mbaok tame harei pataom hu 960 nghệ sỹ, diễn viên di 21 kapul nghệ thuật di 5 taneh ia Việt Nam, Lào, Campuchia, Myanmar saong Thái Lan parang me-in 200 kadha nghệ thuật pok meyaom bruk gheih mekre di puk paga, palei negar, anek menuac di yaok bhum palei, pok meyaom talei rohim di dom taneh ia. 

3/ mblang sara Sa Huỳnh, tỉnh Quảng Ngãi prong abih tih jiak 120 ha song jiak 2400 urang ngak sara. Yaok thun, urang ngak sara Sa Huỳnh ngak hu labaih 8000 tấn sara. Kayua yaom sara trun bier, urak ni meng 300-400 đồng sa kg nan ye, urang ngak sara oh duik hu haong bruk ngak. Hu 120/ 590 boh sang urang ngak sara Sa Huỳnh klak 30 ha taneh ngak sara, tame gah merong negar ngak mbang pah. Ong Trần Em, akaok Uỷ ban bhap bini  huyện Đức Phổ, tỉnh Quảng Ngãi caong lac: Hulin pok panuac likau karja sangka buh jien tame ka hạ tầng đồng muối, ka 2 tra nan lac blei sara khik piah. Bruk ni karja hu sarak ye, min urak ni oh ka mboh công ty karja halei blei sara khik piah ka urang.

4/ Di tỉnh Phú Yên, bruk lih mek taneh raong hadang rah tabiak ralo. Dom kapul nyaom, menuac urang, baoh sang eng drei jah tak glai phòng hộ, lih mek labaih 54 ha taneh tapen tasik ngak danao raong hadang, ralo meng lac di dom huyện Tuy An, Đông Hòa, ban sit Sông Cầu saong ban Tuy Hòa. Makna lac, dalam tukvak khik iek taneh riya, rilo palei lui rah tabiak bruk lih mek taneh sung hukum ngak danao raong hadang min oh langyah catang khang.

5/ Bruk glut jaleih krong di tỉnh Cà Mau dok rah tabiak trak kan thau dalam thun ni. Bahrau akaok bilan hajan min hu rilo mbang glut jaleih ar krong, ngak khat lihik rilo drap ar song mbuan si metai, khut khat rilo jalan mbak puk palei. Saai Phan Minh Điền, di xã Tân Tiến, huyện Đầm Dơi brei thau, sa bilan tapa, sang saai 2 mbang glut jaleih song 2 mbang glut sang nan jeng rah tabiak tuk kreik melam, ngak theik rilo pandap panda, tui kuhira labiah 80 triệu đồng.

6/ Kapul daong urang ruak kan kathaot, urang joh jo saong uranaih metui medhua tỉnh Tiền Giang barau alin hadiah 117 radaih lăn ka urang joh jo kan kathaot dalam tỉnh tui yaom jien abih tih 150 triệu đồng. Jien blei radaih lăn ini kayua Công ty JCI Việt Nam saong công ty JCI South Sài Gòn daong. Ong Đỗ Hữu Duyên, urang joh jo di tỉnh Tiền Giang, hadei di tuk taduan hu  radaih lăn chreih chrai lac: “Cty brei dahlak sa sruh radaih piah lagaih nao mai. Harei ini dahlak biak thau dhar phon cty hu daong ka dahlak mbuan lagaih nao mai. Dahlak tadhau yuh ka cty ngak mbang hu kein laba jang”.

7/ Tỉnh Bình Phước hu 60 urang ruak bạch hầu, rilo meng mboh di 2 xã Thuận Lợi song Thuận Phú di huyện Đồng Phú.Anak bruk ini, tỉnh Bình Phước dok peih ngak rilo jalan piah pacang cakak, oh caik ka jit ruak njom mbak  Bác sỹ Nguyễn Đồng Thông, Giám đốc Sở Y tế tỉnh Bình Phước lac: Khol hulin ieu pataom tong abih menuac di dom (bilai y tế di huyện Đồng Phú, Pasak y tế huyện, dom cơ sở dự phòng di tỉnh njauk jhul pakhang bruk klauk jru, menyum jru piah pacang caga ruak bạch hầu. Ngan song labik hu jit ruak peih bruk pruh jru, ngak hacih saat alam môi trường

Patui di ini dom khau tin dunya:

8/ VN saong Mỹ njauk gauk piah langyah bruk merak gauk dalam dom vụ kiện di VN ka je pacang pablei khut yaom bo Mỹ pandar ngan saong hadang di VN. Ini lac asal kadha  praong di sa thỏa thuận hu mbaoh tangin di Washington DC harei 19/7 (tui mong VN) di mintri công thương VN saong mintri pablei salih Mỹ.

9/ Harei kabroi, 18/7 Indonesia brei klauk veik ka yaok pluh uranaih pandar njauk jru ja hadei di tuk sa labik ngak saong pablei salih vắcxin ja hu chap mek di bilan dahlau.Bruk vắcxin ja ngak tatuan megei Indonesia, saong tapa nan brei mboh dom yếu kém dalam bruk khik ramik jru di negar ĐNÁ ni.

10/ Harei kabroi 18/7, sa urang likei pan rìu tấn công dom tuai damuai angaok sa radaih pui di mban Ba-va-ri-a di Đức, ngak dom urang njauk rambuah trak. Urang brei panuac di cảnh sát Đức Flo-ri-an Hu-em-lơ brei thau, bruk tấn công rah tabiak angaok sa radaih pui daok nao tal ban U-ê-buốc./.