#/ Harei 8/12, di Jabat rajaei, Thủ tướng Nguyễn Xuân Phúc hu taduan raok Đại sứ Tây Ban Nha di Việt Nam ong Tê-na Gác-xi-a. Thủ tướng tong yaom glong talei pambuak bruk siam mekre di 2 negar tuk vak tapa dalam rilo bruk ngak, dong jhul pakhang talei pambuak bruk di 2 negar song mboh lac, 2 gah brei jhul tagok khang jang rilo bruk piah njauk song talei pambuak bruk praong di 2 negar.

#/ Jaik 10 harei tapa, rai diuk di bhap bini bhum ia sua tỉnh Quảng Ngãi gaok ralo kan kandah, kuhrang rilo janih. Urak ini, ia di dom kraong dalam tỉnh daok trun suai, karja dom puk palei brei kapul mai pasiam dom khut khat kayua hajan ia sua. Ong Huỳnh Ngọc Quận, Phaok akaok  Uỷ ban bhap bini huyện Tư Nghĩa, tỉnh Quảng Ngãi brei thau: “Dom puk palei di Nghĩa Mỹ, Nghĩa Hiệp, Sông Vệ oh nao mai hu. Uỷ ban bhap bini huyện hu tacei pato dom xã ban sit nao pasang iek saong panduan ba bhap bini di bhum daok dau ia piah khik salamat ka menuac urang saong khik drap ar ka mikva”.

#/ Tui kuhria mboh, dalam negar hu labaih 1 triệu 300 ribau uranaih ngak dom bruk oh brei urang oh ginup umo atau bruk ngak độc hại song labaih meteh urang ngak lac anek naih njauk padeih bac. Tapa nan mboh lac, rilo uranaih lihik nao quyền bo dom adei njauk hu.

#/ Dahalau daih,  sang saai Rơ Chăm H’Troanh daok di xã Ea Chà Rang, huyện Sơn Hòa, tỉnh Phú Yên lac sang kan kathaot. Hu Hội liên hiệp urang kamei xã dang tabiak tín chấp saong gilang pariak sarak karja, daong brei mesraiy phun jien, patagok kinh tế, urak ini  sang saai oh lac tabiak truh kan kathaot bo daok jeng baoh sang urang bangsa takik ngak mbang joi hadah krah di tỉnh.

#/ Langik tasik oh ka lagaih, hajan ngak ka rilo bein kanduik  di tỉnh Bà Rịa - Vũng Tàu oh ndam boh. Bruk ni ngak ka rilo sang bein oh hu kanduik piah pablei  tuk tết thun ni.

#/ Mban bangsa tỉnh Bình Phước pambuak saong sở Tư pháp peih nyaom meyai pathau khan, pato pakai hukum ka dom urang jakar ngak bruk bangsa, taha palei, akaok palei, bí thư chi bộ, urang hu angan je saong ralo bhap bini bangsa takik di xã Đồng Tâm, huyện Đồng Phú. Nyaom meyai hu pathau khan dom bruk piah patrun bruk tảo hôn saong lakhah gam ralo drah dalam bhap bini bangsa takik; Hukum likhah caga saong baoh sang, an toàn jalan mbak, ma túy saong bruk jhak di ma túy, bruk tội phạm ma túy; trách nhiệm di kapul nyaom, menuac urang, baoh sang saong bhap bini dalam pacang cakak ma túy.

Patui di ni dom khau tin dunya:

#/ Urang vak di rayo sap ndom VN dok di CPC brei thau, 13 urang metai song labaih 60 urang tame sang iek ruak kayua menyum alak u medhil lac hu nồng độ methanol glong di bhum gah barak CPC.

#/ UB Châu Âu barau peih ngak dự án “jum pataom”  daok ieu lac Xo-li-đe-ri-ti piah pambuak dom dam dara ranaih umo oh hu bruk ngak dalam umo meng 18 thun tal 30 thun saong dom kapul nyaom lingiu rajaei daok ruah duah urang halan hatian./.

#/ Tui khau tin bahrau di abih, kuhria tal jala pandiak harei kabroi 8/12, urang metai dalam mbang megei boh taneh khang 6,4 độ rích-te di tỉnh A-chê (Aceh), gah pai In-đô-nê-xi-a  tagok tal 102 urang