1# Sơn La lac tỉnh hu taneh pala saong sản lượng tangei dang akaok taneh ia. Tui kuhria mboh, dalam tỉnh urak ini hu jaik 160 ribau héc ta, sản lượng kuhria rah tapa hu meng 600 ribau tal 700 ribau tấn. Dom thun tapa, phun tangei jeng phun daong patruh eik, patrun kathaot ka bhap bini Sơn La.

2/ Ruak pandiak tabiak drah di tỉnh Bình Định daok patagok. Meng akaok thun tal ini, dalam tỉnh ini hu 3.400 urang ruak pandiak tabiak drah, rilo meng mboh di ban sit Quy Nhơn, ban sit An Nhơn, huyện Phù Cát, huyện Phù Mỹ, Tây Sơn. Gah y tế tỉnh Bình Định daok pambuak bruk saong karja dom puk palei peih dom bruk pruh jru pametai anek ruak piah padam dom sruh jit. Taphia di nan, jak ba bhap bini pametai bọ gậy, pacang cakak ruak pandiak tabiak drak njom mbak tuk bilan hajan daok mai tal. 

3# Dom jabat Hội Nhà báo, kapul pachreih bac, Hội Chữ thập đỏ, Hội Đông y saong Hội Liên hiệp dom kapul nyaom xã hội tỉnh Khánh Hòa pambuak gauk padang kapul iek ruak, brei jru saong alin hadiah pandap ka urang kan kathaot saong dom uraniah daok di 2 palei Vĩnh Yên saong Đầm Môn dalam xã pulao Vạn Thạnh, huyện Vạn Ninh. Di labik nan, kapul hu iek ruak saong brei jru ka 150 urang, alin hadiah jaik 500 pok pandap Trung thu,  25 pok jien bac, khan ao, tapuk siphau brei ka dom uraniah, anek saih kan kathaot kham merat yam tapa kan kandah bac da-a naih joi di dua palei Vĩnh Yên saong Đầm Môn.

 4/ Sở ilamu, Thể thao saong Du lịch tỉnh Lâm Đồng peih tal pato cồng chiêng  Tây Nguyên ka jaik 30 học viên lac dam dara urang bangsa Kơ Ho daok di dom xã dalam huyện Đức Trọng. Tui nan, dalam 20 harei, dom học viên hu dom nghệ nhân lac dom taha palei urang bangsa takik puk palei hu angan je, hu ilamu saong thau cồng chiêng hu pato dom ilamu cơ bản; kỹ thuật taong chiêng, kỹ năng diễu tấu cồng chiêng Tây Nguyên di bhap bini Ko Ho piah khik ramik janih alat ragam meng kan di bhap bini dom bangsa takik daok mbuan lahik nao.

5# Hadei di tuk hu lang talaih dom kan kandah ka phun jien saong jalan ngak, dalam tukvak 2016-2020, tỉnh Gia Lai meda pala veik labaih 13.000ha cà phê saong yaom jien ngak abih jaik 2.000 tỷ đồng. Ini lac dom phun taha, takik baoh, takik kein laba dalam tỉnh.

6/ Gilang pariak Công thương Việt Nam (Vietinbank) dhar di Kon Tum pambuak saong UB MT negar VN huyện Đắk Glei (Kon Tum) saong karja  xã Đắk Blô peih bruk alin hadiah sang jum pataom ka 5 baoh sang kan kathaot daok diuk rai di xã Đắk Blô. Hu thau, 5 baoh sang hu padang lac pakat 4 (daning hu ngak meng kapal, nền xi măng saong tauk gạch bingu, tabung tauk tôn, ngan saong taneh meng 32 tal 40 m2 sa baoh sang; hu Vietinbank dhar Kon Tum daong 30 triệu đồng sa baoh sang. 

7# Harei Sene Đôn-ta thun ini, mBan Bangsa tỉnh meda pambuak bruk haong Sở  Ilamu Thể thao saong Du lịch, Rayo papar sap – papar binguk tỉnh Sóc Trăng saong UB bhap bini huyện Châu Thành peih bruk taom mbaok di baha Tum Núp, xã An Ninh, huyện Châu Thành. mBan Bangsa tỉnh Sóc Trăng jeng hu pok panuac ka Tỉnh ủy, Uỷ ban bhap bini  tỉnh padang dom kapul saong caga pandap nao rivang 26 baoh baha Nam Tông Khmer, ong bhik saong 36 baoh sang sarak karja bangsa Khmer dalam tỉnh saong pilih ruah 10 baoh sang kathaot lac urang Khmer dalam huyện Châu Thành piah alin hadiah pandap dalam var taom mbaok. 

Patui di ini dom khau tin dunya:

8/ Harei 25/9, ban ine Paris di Prang pachreih tui bruk harei oh ô tô piah pasiam veik bruk ô nhiễm môi trường di ban ine praong mekre hu angan di dunya ini.

9# Tổng thống Thổ Nhỹ Kỳ Éc-đô-gan ndom lac, taneh ia ini halan hatian hu mbaok tui điều kiện dalam chiến dịch quân sự di dom taneh ia dunya kayua Mỹ dang akaok, piah taong pateok kol khủng bố IS tabiak truh bhum Rác-ca (Raqqa), labik hu maong lac labik daok siam di kol IS pak Xy-ri. 

10/ Hadei di mbang buh phiếu dalam bruk trưng cầu ý dân, labaih 65,5% cử tri Thụy Sĩ hu njauk hatai sa dự luật an ninh barau, piah patagok quyền hạn ka jabat tình báo ka bruk mesruh pacang khủ ngbố saong tội phạm dalam tuk  dunya dak harei dak hu ralo srau kadau yau urak ini./.