1 # Nyaom darak du lịch dunya Việt Nam thun 2017 ngan haong kadha  “Hà Nội – labik mai di du lịch Việt Nam” bahrau peih pakak di Hà Nội. Pak nyaom darak, dom doanh nghiệp du lịch saong dom hãng kapal haok meda peih ngak danak dak kích cầu du lịch prong ngan haong jaik 20.000 tour du lịch yaom lap; 150.000 harak kapar haok yaom lap saong ralo bruk khuyến mại karei karei

2/ Uỷ ban bhap bini tỉnh Quảng Ngãi tacei pato dom pakat karja, dom mban ngành pambuak tal brei pacang klaoh bruk tảo hôn saong lakhah gam ralo drah. Urang hu trách nhiệm brei ba tabiak jalan ngak cambaih laih jaik saong bruk di yaok puk palei, saong brei patahu khan piah salih barau akaok saneng di bhap bini.

3 # Meng thun 2011 tal ini, peih ngak sarak di Đảng, Karja, tỉnh Bắc Giang hu daong taneh pala drak ka 40 baoh sang urang bangsa takik ngan haong phun jien 1,2 tỷ đồng, lac biak takik dut haong bruk daok caong. Kayua yau nan ye, tỉnh Bắc Giang hu peih bruk daong ka dom baoh sang salih bruk ngak. Tal urak ini tỉnh hu daong jaik 2000 baoh sang salih bruk ngak ngan haong phun jien 40 tỷ đồng, mboh ralo lac blei mac moc, pandap ngak nong duh ka bruk pala drak yau mac cakak hareik, mac li-ua.

4/ Tỉnh Hải Dương daok pataom tame dom jalan ngak piah  pacang cakak jit njom mbak nguy hiểm, oh lui ka dom jit ruak tamuh tabiak di puk palei. Tui nan, tỉnh Hải Dương patagok bruk pathau khan paglaong akaok saneng di bhap bini, jak ba bhap bini nao nao klauk jru ginup, njauk tukvak.

5 # Ủy ban Mặt trận negar Việt Nam tỉnh Ninh Thuận pambuak haong  Quỹ Thiện Tâm dalam Tập đoàn Vingroup bahrau daong brei  300 drei limo binai pajaih ka dom baoh sang kathaot di Ninh Thuận, kuhria tabiak yaom jien abih tih labaih 4,8 tỷ đồng. Dom baoh sang taduan mek limo raong mbang ini ngak tui jalan pajeng (hadei di tuk limo menek, urang raong khik veik drei anek piah raong, daok limo amaik jao veik ka baoh sang kathaot karei di puk palei).

6/ Pa-uan Tết Bunpimay di taneh ia Cộng hòa Dân chủ bhap bini Lào saong Chol Chnam Thmay di taneh ia  Campuchia, Thành đoàn ban raya Hồ Chí Minh barau peih danak dak taom gaok saong ndom meyai nao mai di sinh viên 3 taneh ia VN – Lào – CPC daok bac megru di ban raya. Danak dak rah tabiak chreih chrai ngan saong dom kadha daoh tamia mbak carak ilamu yaok taneh ia. 

7 # Bahrau ini, jalan ba aia hacih praong di xã Thới Hưng, huyện Cờ Đỏ, bal Cần Thơ hu peih pakak, ba tame pandar. Jalan ba aia nan di xã Thới Hưng hu ngak salah blaoh hadei di 4 bilan padang ngak saong yaom phun jien jaik 33 tỷ đồng meng kadung jien Trung ương. Dom bruk di jalan ba ia nan, lac: 2 baoh bingun khoan công suất 50m3 sa tuk, bể lọc samar trọng lực, bingun padang aia hacih 300m3, balai bơm pakat 2, jalan nding raok ba aia atah jaik 135.000 m.

Patui di ini dom khau tin dunya:

8/ Liên minh Châu Âu (EU) peih praong dom jalan trừng phạt ngan saong Cộng hòa dân chủ bhap bini Triều Tiên hadei di tuk taneh ia ini hu dom mbang thử hạt

9 # Dalam mbang ndom biai tapa phone harei 6/4, Thủ tướng Nhật Bản Shinzo Abe saong Tổng thống Mỹ Donald Trump njauk gauk lac bruk cuh tên lửa đạn đạo bahrau ini di Triều Tiên nan lac "sa bruk khiêu khích nguy hiểm saong sa  mối đe dọa prong", taphia di nan sanya pambuak bruk khang kajap piah pacang mối đe dọa meng Bình Nhưỡng.

10/ Xingapo brei thau hu sa sruh jit Zika barau jaik bhum Bắc-Đông taneh ia ini. Panuac khan di jabat Môi trường negar Xingapo brei thau dom mbang pasang iek sruh jit daok hu peih ngak di dom labik hu  jit. Jabat ini kakei bhap bini brei caik hatai sangka saong brei pametai jamuok, ramik hacih môi  trường oh lui jamuok caih anek./.