1/ Tui jalan tacei pato di Thủ tướng rajaei Nguyễn Xuân Phúc, dalam harei 29-3,  di ban sit Vũng Tàu, Akaok mintri pajeng ba Trương Quang Nghĩa  peih bruk dong duah 9 urang di kapan Hải Thành 26-BLC  dok lihik. Dalam melam 28/3, 2 urang njauk bala hu duah mboh saong ba tame boh taneh lac thuyền trưởng Nguyễn Viết Thắng song sỹ quan boong Hoàng Tiến Khôi. Urak ni 2 urang nan daok hu nhân viên y tế iek glang, pren yava daok siam veik. Tui kuhria di gah dong duah, 9 urang lihik meda dok gar veik dalam kapan. 

2/ Ginum meyai jalan pambuak bruk ngak mbang – pablei salih di Vĩnh Phúc hu rah tabiak di ban ine Tô-ki-ô, Nhật Bản pachreih hu yaok rituh doanh nghiệp praong di NB hu mbaok tame piah duah thau bruk buh jien tame ngak mbang di tỉnh Vĩnh Phúc. Ini lac tuk piah ka Vĩnh Phúc patui jalan jhul pakhang, dui pachreih dom doanh nghiệp NB buh jien tame ngak mbang. Urak ini, đầu tư di NB tame Vĩnh Phúc dang ka 3 gah số lượng dự án saong phun jien tut angan tame, min dang akaok gah tỷ lệ phun jien peih ngak.

3/ Ub bhap bini tỉnh Đắc Nông bahrau peih nyaom biai ba tabiak ngak danak dak pambuak gauk patagok dom yaom glaong am riak kalu di  huyện Đắk Song. Am riak kalu lac phun pala praong di tỉnh Đắk Nông, min urak ni dok hu pala biak rilo, oh tui jalan khang kajap. Ni lac mbang camereip UB bhap bini tỉnh Đắc Nông peih nyaom biai pambuak gauk patagok am riak kalu khang kajap, tapa nan, ngak brei salih bahrau jalan sahneng di urang nong dalam bruk pamong tal patagok khang kajap, paglaong yaom saong pren khang meriak gauk di am riak kalu Đắk Nông di darak pasa. 

4/ Urang dang akaok UB bhap bini ban sit Tam Kỳ, tỉnh Quảng Nam hu peih bruk nao rivang saong daong baoh sang uranaih metai di danao ia công trình 10 triệu đồng. Dahlau di nan, tukvak 17 tuk harei 27/3, di phường Trường Xuân, ban sit Tam Kỳ, tỉnh Quảng Nam, 2 adei saai lac Ưng Hoàng Long, umo 12 thun saong Ưng Hoàng Quân umo 4 thun, tuk nao bac mai jak gauk tabiak labik taneh jaik sang me-in min oh patuah tangar takai laik trun lubang dalam. Lubang ia dua adei gaok bala lac labik công ty đầu tư Công  Nghệ Nam Thắng daok padang ngak. Tuk nan hu menuac mboh saong daong sron dua adei tagok ba nao cấp cứu min adei Quân metai, daok adei Long nguy kịch daok hu cấp cứu di sang iek ruak.  

5/ Labik rong pato đối tượng XH di baha Diệu Pháp daok dalam palei Tân Cang, xã Phước Tân, ban sit Biên Hoà, tỉnh Đồng Nai bahrau hu pok brei harak meyaom di nyaom biai pakat negar pok meyaom dom cơ sở tôn giáo ngak hu rilo kadha praong dalam bruk daong XH song pato bruk ngak. Meng thun 1983 tal urak ni, labik raong pato ini taduan raong pato, iek glang bruk bac da-a ka labaih 200 kamuan, rilo meng lac dom uranaih metui medar oh hu labik dok. Urak ni hu labaih 100 kamuan bac tamat ĐH dom gah yau Y khoa, Bách khoa, Ngân hàng…  dalam nan hu 8 urang mek hu angan tiến sỹ, 14 urang thạc sỹ.

6/ Sang iek ruak Nhi đồng 1 ban raya Hồ Chí Minh barau ngak hu siam bruk blac daraih baoh hatai ka sa uranaih kamei ndih tapui oh ka tal bilan hanjul kilo di abih kuhria meng dahlau mai, trak 850gr min. Uranaih ruak nan palei daok di Vĩnh Long ndih tapui tuk barau hu 31 adit, njauk hẹp eo động mạch chủ, mbuan metai. Meng hatai kham merat daong ka uranaih plaih di metai, hadei di labaih sa tuk, dom y bác sĩ sang iek ruak Nhi đồng 1 blac draih hu siam ka uranaih ini. Urak ini pren yava  di uranaih hu tani tanat.

7/ Urak ni, urang jakar , gru pato song jiak 300 anek saih di sang bac tiểu học Bình Đức, palei Tân Thuận A, xã Bình Đức, huyện Châu Thành, tỉnh Tiền Giang biak pandik hatai anak bruk hu mblang hareik gah anak sang bac ngak nerak tasuak biak trak ka môi trường rilo thun tapa. Ni lac labik patom hareik, ia nerak tasuak di rilo boh sang dalam palei. Trak di abih lac dalam bilan hajan, mblang hareik gah anak sang bac hu rilo ruồi, ngak jak tal pren yava di bhap bini, abih di nyu nan lac dom anek sai. Sang bac song bhap bini hu rilo mbang pathau tagok karja puk palei min mbiah tal urak ni oh ka hu pasiam veik

Patui di ini dom khau tin dunya:

8/ Dự án jalan pasei Thai-Sino kayua Thái Lan saong Trung Quốc pambuak gauk ngak oh ka peih tabiak ngak hu tui tukvak ba tabiak kayua oh ka ngak salah hồ sơ thiết kế. Ini lac dự án padang ngak jalan pasei meng Băng-cóc tal Na-khon Rát-cha-si-ma, atah labaih 252 km, yaom 179 tỷ bạt. 

9/ Harei kabroi, Tổng thống Mỹ Đô-nan Trăm (Donald Trump) mbaoh tangin tame sa sắc lệnh brei klaak dom quy định ka bruk biến đổi khí hậu hu phê chuẩn di puac thun 2016, meng tuk ong Ba-rắc Ô-ba-ma dok ngak. Tui sắc lệnh ini, Rajaei Tổng thống Đô-nan Trăm brei padeih, klaak atau pasang iek veik dom kadha pambuak tal bruk biến đổi khí hậu, piah jhul patagok gah công nghiệp năng lượng hóa thạch dalam negar.

10/ Theo hãng tin karja An-đi-na, Pe-Ru, jaik 10 ribau menuac njauk panduan nao kayua ia sua di gah brak taneh ia ini. Tui Tổng thống Pê-ru Cúc-din-xki, bhap bini di Piu-ra, pasak bang Piu-ra, Tây Bắc  taneh ia ini daok njauk pacang cakak dalam bhum ia sua hadei di dom mbang hajan khang dui atah luac 15 harei tapa./.