1/ Thủ tướng rajaei jao ka mintri jien padai buh tabiak brei saoh 6.900 tấn brah ka 3 tỉnh Nghệ An, Hà Tĩnh, Quảng Bình piah dong pacang iek lipa ka bhap bini gaok bala hajan ia sua thun 2016. Thủ tướng jeng hu jao ka mintri jien padai buh brei labaih 900.000 tấn brah ka tỉnh Nghệ An song labaih 2.000.000 tấn brah ka tỉnh Hà Tĩnh piah dong pacang iek lipa ka bhap bini njauk ribuk ka 4 song hajan ia sua.. 

2/ Meng harei 27 tal harei 29/11, Tỉnh ủy Bắc Kạn pambuak saong miuyim Hải quân VN peih parang iek bản đồ saong parang tabiak tư liệu “Hoàng Sa, Trường Sa di VN – dom bằng chứng sajarah saong adat hukum”. Parang iek hu labaih 200 tư liệu brei mboh quyền ngak pô tasik pulao di VN meng abhap XVII tal abhap XX; dom bản đồ saong dom atlas pambuak tal quyền ngak pô di VN ngan saong dua quần đảo Hoàng Sa saong Trường Sa. Dahlau di nan, tỉnh Bắc Cạn hu pambuak saong Quân chủng Hải quân brei 2 kapul nao rivang saong ngak bruk hong dom đơn vị di quần đảo Trường Sa saong nhà giàn DK 1.

3/ Piah dui pachreih ralo tuai du lịch dalam song langiu negar. , Miunyim tỉnh Gia Lai hu peih bruk padang ngak labik parang iek rup kayau bhap bini di 2 bangsa J'rai song Bahnar, ngan song 120 rup kayau, dalam nan hu 70 rup kayau di urang J'rai song 50 rup kayau di urang Bahnar gam song yaok rituh rup kayau hu dahlau di nan. Tapa dom rup kayau ni, urang mong hu thau jang ka rai duik di 2 bangsa J'rai, Bahnar song dom ilamu gheih mekre dalam bruk ngak mbang, ngak huak.

4/ Mesup harei 29/11, mban Chỉ huy pacang cakak bala meng langik tasik saong duah daong urang njauk  bala ban sit La Gi tỉnh Bình Thuận hu ieu pataom dom kapal ikan công suất praong di puk palei, tổ jum pataom angaok tasik daong sraong mek kapal ikan BTh 99308 TS daok gaok bala langiu tasik. Dahlau nan, tuk mesup kabroi, kapal ikan BTh 99308 TS hu 11 urang kayua ong Lê Thành Tâm, umo 40 thun, daok di phường Phước Hội, ban sit La Gi ngak po kapal gam lac thuyền trưởng dalam tuk daok taong cap oh patuah njauk kram trun tasik. Kapal ikan ini gaok bala  di bhum tasik atah pabah tasik La Gi jaik 84 hải lý mai gah meraong. Dom urang taong cap ikan samar chat TABIAK SAONG HU kapal ikan BTh 99168 TS daok taong cap ikan di labik nan daong sraong hu abih.      

5/ Danak dak taom gaok doh tako Đờn ca tài tử di 2 tỉnh Bạc Liêu song Bình Dương hu peih ngak di Liên hiệp dom kapul Văn học Nghệ thuật tỉnh Bạc Liêu.Ni lac bruk ilamu nghệ thuật di gah ilamu Bạc Liêu peih ngak piah ba dom bruk ilamu mai puk palei, duh ka bhap bini, salam uan bruk pahadar 20 thun harei padang veik tỉnh Bạc Liêu Liêu (1/1/1997 – 1/1/2017).

 Patui di ini dom khau tin dunya:

6/ Dalam sa kadha vak angaok blah Thời báo Niu-Óoc  harei 28/11,  ong Dim-my Cát-tơ  - umo 92 thun, urang dahlau daih ngak Tổng thống Mỹ ba tabiak panuac lac,Tổng thống urak ini - ong Ba-rắc Ô-ba-ma brei samar taduan bruk hu mbaok di Palextin dahlau di tuk ong Đô-nan Trăm tagok ngak Tổng thống di harei 20/1 anak tal. Ong brei thau bruk ngak ini gah ngoại giao di Mỹ ngan saong karja Palextin lac jalan nao biak praong bo rajaei Mỹ brei peih ngak dahlau di tuk ong Ô-Ba-ma padeih ngak Tổng thống saong chuyển giao quyền lực piah daong taneh ia ini jeng thành viên chính thức di LHQ. Biak di nyu, tal urak ini hu 137 taneh ia taduan bruk hu mbaok di karja Palextin.

7/ Rajaei Ấn độ bahrau ba tabiak dự thảo sarak phần mềm pakat negar akaok meti kuhria meng dahlau mai piah tal thun 2025 meda tagok 10 mbang thị phần di dom sản phẩm phần mềm negar ni di darak pasa dunya, tui kuhria mek hu 148 tỷ USD song ba bruk ngak ka labaih 3,5 triệu menuac.

8/ Hãng kapal haok Đức Lúp-than-xa meda brei klaak jaik 1.700 mbang par dalam 2 harei tal kayua bruk đình công barau di dom urang peih kapal haok kayua oh ka njauk gauk ka jien bilan. Adit dahlau, hãng kapal haok Lúp-than-xa jeng klaak jaik 3.800 mbang par dalam 4 harei ngak bruk, ngak kan kandah tal labaih 350 ribau tuai damuai. Nan lac mbang đình công ka 14 dalam dom mbang ginum biai oh njauk gauk ka jien bilan di dom urang peih kapal haok saong hãng kapal haok ini meng akaok thun 2014 tal ini, ngak ka hãng ini khat lahik yaok rituh triệu ơ-rô./.