1 # Ngak tui Quyết định ka 146/QĐ-TTg harei 15/6/2005 di Thủ tướng Raja-ei ka bruk mek veik taneh di dom công ty lâm nghiệp, mban khik iek glai khik caga piah jao brei ka baoh sang bhap bani bangsa takik kan kathaot kurang taneh pala drak, tỉnh Khánh Hòa hu neh tabiak labaih 10.000 ha taneh glai saong jao brei ka labaih 1.000 baoh sang bhap bani bangsa takik kan kathaot kurang taneh pala drak. Mblang taneh daok veik karja puk palei khik iek. Tapa nan, piah daong ka bhap bani bangsa takik patrun kathaot, grap tanat rai diuk.

2/ Tal urak ini, tỉnh Đăk Lăk hu brei labaih 752.561 harak chứng nhận quyền pandar taneh mbang akaok meti ngan saong taneh praong labaih 801.592 ha, samu jaik 94% bruk ba tabiak. Min Sở Tài nguyên saong Môi trường tỉnh Đắk Lắk taong yaom bruk brei harak chứng nhận quyền pandar taneh ka dom baoh sang saong menuac urang di tỉnh jeng daok suai damuai. Tỉnh Đắk Lắk kham merat tal thun 2018 ngak salah bruk brei harak chứng nhận quyền pandar taneh mbang akaok meti ka dom baoh sang, menuac urang, jeng yau dom tổ chức dalam tỉnh.

3 # Urak ini, tỉnh Gia Lai daok patagok bruk tacei pato bhap bani pataom tame pala veik saong pagam pasiam dom mblang taneh cà phê taha piah dui patagok năng suất, chất lượng di janih phun pala praong ini di tỉnh. Tok kuhria meng akaok thun tal ini, dalam tỉnh pala veik hu labaih 2.800 ha cà phê, rilo jang jaik 30% bruk ba tabiak. Jalan ngak tal thun 2020, tỉnh meda padang jaik 4.000 ha mblang taneh pala caphe prong di dom puk palei. 

4/ Mesup harei 16/10, Ban An toàn jalan mbak tỉnh Bình Thuận oh brei dom radaih peih meng Bình Thuận nao Lâm Đồng saong talap veik di jalan raya 28B. Hajan khang dalam dom harei tapa ngak glut jaleih ralo labik di jalan raya 28B pambuak canah klau Lương Sơn (huyện Bắc Bình, tỉnh Bình Thuận) tagok đèo Đại Ninh, tỉnh Lâm Đồng. Hu taong abih 11 labik glut jaleih meng km 32 tal km 47. Di ralo labik haluk patau angaok ceik tuh trun jalan ngak ka radaih oh nao mai hu.

5 # Thun 2002, Ủy ban bhap bani tỉnh Thừa Thiên - Huế jao ka Sang bac Cao đẳng Sư phạm Thừa Thiên - Huế peih ngak danak dak pato anek saih Lào tui Harak pambuak bruk dua gah di tỉnh ini haong 7 tỉnh, bal di negar Lào. Tal urak ini, danak dak ini hu pato pakai jaik 1.100 anek saih Lào, dalam nan hu 497 anek saih Lào bac tamat blaoh saong hu ba brei bruk ngak di dom jabat praong di negar Lào.

6/ Yaok thun Việt Nam hu jaik 12.500 urang kamei barau njauk ruak ung thư tasau, meblah 25% abih tih dom janih ruak ung thư di kamei saong jhak jang nan lac, umo njauk ruak ung thư dak harei dak ranaih. Nan lac panuac di akaok mintri y tế Nguyễn Thị Kim Tiến di mbang peih bruk “Tầm soát ung thư tasau tuk  umo 40” kayua mintri  Y tế pambuak saong Quỹ Hỗ trợ urang ruak ung thư – kayua harei hadei hadah hadai peih tabiak di ban raya Hồ Chí Minh harei 15/10. 

7 # Danak dak taom gaok, ndom biai nao mai "Haniem phol diuk pasang urang jaoh jo" thun 2017 meda hu peih ngak di harei 17/10 pak Pasak adaoh tamia Âu Cơ, Hà Nội. Danak dak kayua Kapul daong urang jaoh jo saong uranaih metui medal Việt Nam dang tabiak ngak. Hu mbaok dalam danak dak thun ini meda hu 30 yau diuk pasang urang jaoh jo naih gheih mai meng 24 tỉnh, bal dalam negar kayua Kapul Daong urang jaoh jo saong uranaih metui medal Việt Nam duah mboh, palih ruah, dalam nan hu 17 urang kamei jaoh jo, 4 urang urang bangsa takik, 9 urang nao radaih gilun.

Patui di ini dom khau tin dunya:

8/ Megei baoh taneh, ia sua, ribuk saong langik tasik oh lagaih ngak ka jaik 14 triệu menuac yaok thun njauk klak sang danaok saong bruk ini meda hu rilo jang dalam dom thun anak tal. Dalam harak pathau khan barau ba tabiak harei 15/10, jabat Liên hợp quốc ka patrun bala ndom lac, patrun menuac gaok kan kandah kayua bala meng lingik tasik lac bruk meda ngak hu meyah dom rajaei brei ka bhap bini labik daok an toàn saong yaom kaom mbiah, lap.

9 #  Hadei di 20 thun ngak bruk, kapul dom urang ilamu Mỹ hu nao jaik tal bruk ngak tabiak thận nhân tạo akaok mereip dalam dakrai sajarah y học. Tui ong Shu-vô Roi (Shuvo Roy), giáo sư gah thận di sang bac Đại học Van-đơ-bin (Vanderbilt) pak Ten-nét-xi (Tennessee), Mỹ, Pasak y tế di sang bac đại học ini hu Jabat pasang iek pandap mbang menyum saong jru cavao Mỹ (FDA) brei adat patagok thận nhân tạo. Kadha ini brei adat ka dom urang ilamu peih bruk ngak iek lâm sàng thiết bị di akaok thun 2018. Urak ini angaok dunya hu jaik 2 triệu urang daok nduac thận nhân tạo.

10/ Dom urang ilamu daok patagok sa thế hệ robot barau, daong ka anek menuac ngak dom bruk biak nguy hiểm yau ngak hacih saong pacang lão hóa dom cơ sở hạt nhân. Saong Avexis lac sa dalam dom robot ngak bruk ini. Robot Avexis kayua công ty Forth Engineering di Anh ruah duah patagok dalam 5 thun, ngan saong bruk daong  di sang bac Đại học Manchester. Hu yaom jaik 13.200 USD./.