1/ Mesup 18/10,  di Hà Nội, mintri Thông tin- Truyền thông saong mintri Kế hoạch hong Đầu tư  pambuak saong dom Hiệp hội Tin học; Internet, pablei salih điện tử Việt Nam peih nyaom meyai xúc tiến đầu tư gah thông tin saong truyền thông Việt Nam. Brei panuac di nyaom meyai, Phaok Thủ tướng Vũ Đức Đam ndom lac: dalam nền kinh tế số urak ini, dữ liệu lac sa dalam dom nguồn lực biak praong. Rajaei saong dom ngành daok peih ngak ralo bruk piah pataom dữ liệu, ngak jeng nguồn tài nguyên hong gauk piah taong abih gam pandar, duah jalan, padang mbang ngui.

2/ Chi cục raong glang saong Thú y tỉnh Kon Tum brei thau, meng bilan 6/2016 tal urak ini, dalam tỉnh Kon Tum hu thụ tinh nhân tạo meng tinh limo lai Brahman ka jaik 800 drei limo kanyik puk palei, tapa nan limo metian hu labaih 85%. Tui nan, hu 40 drei limo anek hu menek tabiak, yaok drei limo anek trak meng 25 tal 30 kg, hu pren khang praong siam rik daong paglaong chất lượng tapon limo puk palei.   

3/ Harei 18/10, di jalan raya 1A labik nao tapa  xã Hưng Thịnh, huyện Trảng Bom, tỉnh Đồng Nai rah tabiak bala angaok jalan ngak sa anek saih metai. Phạm Văn Hoàng, anek saih tal 9 sang bacTrung học cơ sở Nguyễn Thượng Hiền nduah radaih điện nao bac angaok jalan raya 1A labik nao tapa xã Hưng Thịnh, huyện Trảng Bom, tui canah pak Dầu Giây nao ban Biên Hòa. Tuk ini radaih tải biển kiểm soát 63L – 8587 (oh ka thau menuac peih) nduac gah likuk paoh khang tame radaih di adei Hoàng ngak ka adei prah tame takai jaan, metai di labik.

4/ Meng akaok thun tal ini, tỉnh Tuyên Quang hu ba bruk ngak barau ka labaih 18.800 urang ngak,  hu labaih 70% lac bhap bini bangsa takik. Dalam nan, ba bruk ngak pak di labik ka jaik 13.660 urang ngak; 4.840 urang nao ngak bruk di dom tỉnh, ban dalam taneh ia saong nao ngak di negar lingiu 311 urang ngak,. Ttỉnh hu ralo sarak ưu đãi, ieu dom DN, tập đoàn praong dalam taneh ia mai đầu tư.

5/ UB bhap bini tỉnh Thừa Thiên - Huế barau hu quyết định taduan Dự án daong oh bayar veik “Thí điểm patagok akhar vak Cơ Tu tal 4, tal 5 saong akhar vak Pa Cô, Tà Ôi tal 1, 2, 3 ka anek saih tiểu học” kayua Tổ chức FARO AS (Na Uy) daong. Ngan saong yaom jien labaih 4 tỷ đồng, dự án hu peih ngak meng ini tal thun 2022. Bruk ngak nan piah khik kajap, patagok akhar vak ka urang Cơ Tu, Pa Cô, Tà Ôi; rik daong khik ramik, patagok ilamu bangsa dalam dom bangsa VN.

6/ Tổ chức Hòa bình saong Hữu nghị Hiroshima (Nhật Bản) - Việt Nam barau alin 60 paok jien bac, yaom yaok paok 120 USD (samu 2,5 triệu đồng) alin ka anek saih kan kathaot yam tapa kan kandah, bac joi sang bac Phổ thông bangsa gam bac gam daok tỉnh Quảng Trị. Tukvak tapa, Tổ chức Hòa bình saong Hữu nghị Hiroshima - Việt Nam hu ralo bruk ngak daong ka bhap bini bhum ceik tỉnh Quảng Trị yau daong chip bhap bini bhum njauk bala, alin dom pandap y tế, alin pandap ka anek saih bangsa takik. 

7/ Hội Liên hiệp urang kamei ban raya Hồ Chí Minh pambuak saong Ban bangsa ban raya hu peih bruk taom mbaok urang jakar hội, urang kamei jakar công chức lac urang bangsa takik tuk pahadar 87 thun harei padang Hội Liên hiệp urang kamei Việt Nam (20/10/1930 -20/10/2017). Tapa nan, mban peih bruk hu alin 100 paok pandap ka urang jakar hội, urang kamei jakar công chức lac urang bangsa takik gaok kan kandah.

Patui di ini dom khau tin dunya:

8/ Di Ðại lễ đường Nhân dân di ban ine Bắc Kinh, urang brei panuac báo chí nyaom roya pakat negar mbang ka 19 Ðảng Cộng sản Trung Quốc Thỏa Chấn peih họp báo. Tui nan, nyaom roya peih tabiak harei 18/10 saong rah tabiak dalam 7 harei.

9/ Rajaei Bangladesh brei thau bruk kuhria padang sa trại tị nạn 800 ribau urang daok, rik daong langyah labik daok ka urang tị nạn. Ini hu iek lac trại tị nạn praong abih di dunya.

10/ Đại hội đồng Liên hợp quốc (LHQ) hu buh phiếu kín palih ruah 15 taneh ia tame Hội đồng Nhân quyền, lac kapul dom rajaei pakat glaong abih di  di LHQ ka dom bruk pambuak tal khik caga saong jhul patagok nhân quyền di dunya. Dom taneh ia barau hu palih tame Hội đồng Nhân quyền LHQ nan lac: Afghanistan, Angola, Australia, Chile, Cộng hòa dân chủ Congo, Mexico, Nepal, Nigeria, Pakistan, Peru, Qatar, Senegal, Slovakia, Tây Ban Nha saong Ucraina. Dom taneh ia ini hu mbaok tame ngak dalam nhiệm kỳ klau thun, meng harei 1-1-2018./.