1/  # Bahrau ni, tỉnh Hưng Yên peih mbaok Lễ hội pok meyaom nhãn lồng – nyaom darak pasa kaya pandap bhum palei thun 2017. Ni lac mbang camereip di abih tỉnh Hưng Yên peih lễ hội ni piah yaih khan janih pandap mbang pok tagok patao, hu angan je di bhum taneh Phố Hiến saman dahlau. Tui nan hu 350 gian hàng di 22 tỉnh, ban dalam negar mai parang iek dom janih pandap kaya nong, pandap thủ công mỹ nghệ, pandap panda palei ngak... piah yaih khan pren khang di dom bhum palei. Lễ hội pok meyaom nhãn lồng Hưng Yên – nyaom darak pasa kaya pandap bhum palei thun 2017 rah tabiak tal abih harei 14/8.

2/ Pachreih tui bruk padang ngak palei pala barau, dom thun tapa, Công ty TNHH MTV Cà phê 15 (di Quân khu 5)  hu daong dom puk palei 3 tỉnh Gia Lai, Đắk Lắk saong Đắk Nông, daok dalam bhum dự án padang ngak 2 sang bac phổ thông, 2 sang bac mầm non, 50km jalan mbak nao mai, 30km jalan điện saong rilo công trình thủy lợi, ia pandar, 2 bệnh xá quân – dân y pambuak bruk. Công ty hu tuyển dụng yaok ribau urang ngak, dalam nan hu yaok rituh bhap bini bangsa takik, rik daong ba bruk ngak, patagok jien mek tame ka bhap bini puk palei.

       3/    # Tỉnh Khánh Hòa dok patagok khik iek bruk peih ia dom danao, piah khik siam mekre ka dom danao song bhum taneran dalam bilan hajan ia sua, bhian rah tabiak meng bilan 9 tal bilan 12. Urak ni, tỉnh Khánh Hòa  hu  30 danao ia song thủy điện padang ia hu abih tih labaih 250 triệu m3; dalam nan hu 6 danao padang hu labaih10 triệu m3 ye: Đá Bàn, Cam Ranh, Suối Dầu, Hoa Sơn, Tà Rục song Eakrông Rou; 10 danao praong meng  1 triệu tal 10 triệu m3; dom danao dok veik padang hu  ala 1 triệu m3. 

4/ UB bhap bini tỉnh Tây Ninh barau mbaoh tangin brei adat Công ty Thanh Bảo Hân peih ngak Dự án padang ngak lò sik  ralo athur menuk ada, di palei Ninh Bình, xã Bàu Năng, huyện Dương Minh Châu. Dự án hu peih ngak di angaok taneh praong 28.200 m2, công suất sik 6.000 drei menuk ada sa harei meng dây chuyền barau, hu kho li-ar, khik hu siam mekre, hacih sa-at. Abih tih phun jien peih ngak  dự án jaik 8,5 tỷ đồng meng kadung jien di doanh nghiệp. Tui kuhria puac bilan 3/2018 labik sik ralo ini hu padang ngak salah, ba tame pandar.

5/   # Piah khik siam dom krong ribong dalam bilan hajan thun ni, Sở ngak nong song patagok palei pala tỉnh Bình Phước song dom gah pagam tal bahrau pasang  iek  66 công trình thủy lợi dalam  tỉnh.  Tapa nan mboh lac, dom công trình daok hu siam mekre, hu tong yaom lac salamat. Min jeng hu dom labik khut, njauk ngak pasiam dalam thun ni song dom thun hadei di nan.

6/ Harei 8/8, dự án hầm chui di nút giao thông Tân Phong, ban Biên Hòa, tỉnh Đồng Nai hu peih ngak hadei di sa tukvak suai livik daok cang. Tui po đầu tư lac mban khik iek dự án đầu tư xây dựng tỉnh, dự án nút giao thông canah pak Tân Phong hu labik hầm chui tah 430m, dalam nan hu 50m hầm kín, 380m hầm hở saong jalan tame tabiak 2 akaok hầm tah 150m, labik gờ chắn tah125m; abih tih phun jien đầu tư lac 260 tỷ đồng meng kadung jien karja.

7/    # Mintri jalan mbak pajeng ba brei thau, meng harei 10/8 brei padeih mek jien tapa jalan di  Bilai Dốc Xây (dok jaik tỉnh Thanh Hoá song Ninh Bình). Makna lac kayua kein liba di po đầu tư yam tapa dut song harak hợp đồng yaom lac tuk vak mek jien oh ka abih. 

Patui di ini dom khau tin dunya:

8/ Ngoại trưởng Mỹ Rếch Tin-lơ-xơn barau ndom lac Mỹ meda phản ứng anak bruk ngak di Nga pambuak tal bruk cakak nhân viên ngoại giao Mỹ daok di Nga dahlau harei 1/9.

9/ # Bruk boh menuh da  oh hacih saat dok pambak praong di  châu Âu. Harei 7/8,  Anh song Pháp brei thau dom boh menuh da njom jru  halak hu ba tame negar drei, dalam tuk yaok  triệu drei menuh di  Hà Lan brei ba nao am cuh klak.

10/ Jabat Khí tượng Nhật Bản harei 8/8 brei thau, ribuk angan Nô-rư tuh tame dom bhum gah Tây Nam NB hadei di tuk tuh tame pulao praong Hông-xu harei 7.8 ngak tayah tayac khang dom labik ribuk nao tapa./.