# Harei 5/9, gam haong anek saih dalam negar, labaih 178 ribau anek saih dom pakat di tỉnh Yên Bái chreih chai tame thun bac bahrau. Gah Pato megru Yên Bái brei thau 5 bruk ngak prong njauk pataom tame ngak dalam thun bac 2016 - 2017, dalam nan iek prong bruk pato megru bangsa; tapa bruk pasang iek, rami ramik veik sang bac, tal bac patui veik jak ba dom pren khang buh tame ka gah pato megru, jhul khang bruk xã hội hóa pato megru saong paglaong chất lượng dom gru pato…Amuk Lê Thị Huệ, Phaok Jabat Pato megru huyện Trạm Tấu, tỉnh Yên Bái brei thau:

Băng: Jabat Pato megru hu tacei pato dom sang bac meng tuk hè pataom dom urang jakar, gru pato, urang ngak jeng yau jak ba bhap bani dom xã, bal sit kuhria caga cơ sở vật chất, panduan ba dom duk bac meng dom labik sit mai labik praong piah padang tal bac, pataom veik dom duk chức năng di sang bac piah ngak habar ginup duk bac, ginup labik mbang labik padeih padei ka anek saih.

#/ Dok di sang bac phổ thông bangsa bán trú tiểu học ka 2 Nậm Hàng, huyện Nậm Nhùn, tỉnh Lai Châu taduan mek sang dok bán trú song dom pok jien bac kayua Kapul dam dara Mban khik ramik danak dak Thủy điện Sơn La, Lai Châu alin brei. Urang pan akaok pakat ủy karja dalam tỉnh song mban khik ramik dự án Thủy điện Sơn La mai hu mbaok, peih pakak sang dok bán trú song jao pandap ka sang bac.Amuk Vũ Thị Tố Hoa, Hiệu trưởng sang bac brei thau, sang bán trú hu makna biak prong, dong khik siam ka bruk mbang ndih, daok dang jang yau bac daa di dom adei anek saih di labik sang bac pasak.

# Sang bac Trung học Nhị Hà 3, xã Nhị Hà, huyện Thuận Nam, tỉnh Ninh Thuận bahrau hu buh brei labaih 621 triệu đồng piah pasiam veik 3 duk bac, pandap panda điện saong dom công trình phụ… piah pabak siam ka thun bac bahrau 2016-2017.

#/ Meng thun 2016 tal thun 2020, tỉnh đồng Nai hu peih ngak 41 danak dak sang dok ka urang ngak, sang dok XH ka urang duah hu jien takik dok dalam tỉnh ngan song taneh prong jiak 480 ha. Labik ngak rilo sang dok XH lac ban sit Biên Hòa, ban Long Khánh,  dom huyện Long Thành, Trảng Bom song  Xuân Lộc.Urak ni, bruk caong hu sang daok di urang ngak, sang dok XH ka urang duah hu jien takik di tỉnh ĐN biak glong. Tuk vak tapa bahrau hu labaih 10 danak dak sang daok nan hu peih ngak, min dom dự án ngak bloh pablei song brei pah biak takik.

# Bilan bei li-u thun ini, urang nong huyện Tân Phước dalam bhum Đồng Tháp Mười, tỉnh Tiền Giang pala hu labaih 420 ha bei li-u. Tal akaok bilan 9, miva hu thu hoạch blaoh saong năng suất jaik 12 tấn sa ha, sản lượng labaih 5.000 tấn pablei tabiak darak pasar dalam saong langiu tỉnh. Urak ini, yaom bei li-u urang mai blei yaom 16.000 đồng sa kg, tagok dua mbang dut haong chính vụ. Tui yaom yau nan, yaok sa ha bei li-u mek hu jaik 200 triệu đồng, kaoh abih phun jien buh tame urang nong daok laba yaok rituh triệu đồng.

        #/ Harei 4/9, Chi cục khik ramik darak pasa tỉnh Bình Phước pambuak bruk song Phòng Cảnh sát điều tra  tội phạm ka bruk khik ramik  kinh tế song chức vụ (PC46) - Công an tỉnh Bình Phước peih bruk am cuh klak labaih 30 ribau pok pakao nhập lậu song rilo mỹ phẩ, pandap pandar oh thau asal di nyu. Lingiu di nan, hu rilo mỹ phẩm  ngan song labaih 1.800 paaop rilo janih karei karei yau jru nhuộm mbuk, son môi, phấn trang điểm song dom janih pandap main uranaih kayua TQ ngak tabiak. Tapa pasang iek, tong abih dom janih pandap hu am cuh klak jeng lac pandap nhập lậu, oh thau mai meng halei.

# Chi cục Khik iek darak pasar tỉnh Vĩnh Long hu mboh tangin tame harak taong phạt hành chính ngan haong Nguyễn Văn Chương, daok pak ấp Thành Phú, xã Thành Lợi (huyện Bình Tân) ka bruk bơm aia ngak brei tagok kilo tame athur raong dahlau di tuk thik raih tanut phạt 6 triệu đồng. Langiu di nan, Kapul Khik iek darak pasar ka 4 pambuak haong Cảnh sát Kinh tế (Công an Vĩnh Long) pasang iek athur daok pajeng ba angaok sruh radaih 65K- 6320 kayua Đặng Thanh Phong, daok pak bal sit Cái Vồn (ban sit Bình Minh) nduac, daok pataok di labik 59, tổ 4, ấp Thành Trí, xã Thành Lợi (huyện Bình Tân) saong mboh pak ini hu 14 drei pabui daok hu bơm aia dahlau di tuk thik raih. 

Patui di nan dom khau tin dunya:

#/ Ia ndik ia sua song hajan prong di Xu đăng dalam dom harei tapa ngak ka 76 urang metai. Tui mintri Nội vụ Xu-đăng, 13 dalam 18 tỉnh di Xu Đăng njauk ia ndik ia sua. Ia ndik ia sua jeng ngak tayah abih labaih 3.200 boh sang song ngak khut labaih 3 ribau boh sang karei di tỉnh Cát-xa-la  (Kassala), gah pai negar  Xu-đăng, sa dalam dom labik gaok kan kandah trak di abih kayua ia ndik ia sua.

# Đài Loan (Trung Quốc) brei thau urang ka 4 njaom vi-rút zika pak bhum taneh ini. Tui nan, urang njaom vi-rút Zika nan, lac sa urang kamei mai veik Đài Loan meng bhum taneh hu vi-rút Zika lac Xanh Lu-xi (St. Lucia) saong nao du lịch dalam bhum. Yau nan kuhria meng bilan tha thun ini, Đài  Loan (Trung Quốc) hu 4 urang njaom vi-rút Zika.

#/ Takik di abih 30 uranaih umo ala 5 thun, di labik Tây Bắc Myanmar metai meng kreik bilan 6 mbiah tal ni kayua sa ruak lạ rah tabiak ngak brei kan suan yava. Ong Kay Sai (Cay Xai), sa urang ngak prong di bang Nagaland (Na-ga-lan) brei thau, dom urang metai rilo meng lac di ban sit Nanyun (Na-ni-un) song  Lahe (La-hê),dalam bhum Naga (Na-ga), sa dalam dom labik kan kathaot abih di negar ni, atah di ban ine  klakYangon (Yan-gun) labaih 1.300 km.Urak ni oh ka thau ni lac ruak hagait song ruak ni meda njom mbak./.