# Trung ương Kapul Urang dahlau diah ngak bol lin Việt Nam pambuak haong Kapul urang dahlau diah ngak bol lin dom tỉnh, bal bhum Tây Nam bộ peih Nyaom biai ka bruk “Salih bahrau, patagok saong paglaong pren khang di Hợp tác  xã”. Trung tướng Nguyễn Văn Đạo, Phaok Akaok Kapul urang dahlau diah ngak bol lin Việt Nam brei thau: Pambak prong dom mô hình pambuak bruk siam mekre, ngak brei salih bahrau cak rok patagok. Paglaong kein laba bruk ngak mbang kinh tế kapul nyaom, palagaih  ka bruk cakrok patagok kinh tế.

#/ Labaih 720 tỷ đồng lac phun jien buh tame ngak Jalan tathuak ia song xử lý ia thải ban Sơn La, tỉnh Sơn La kayua rajaei Cộng hòa liên bang Đức song rajaei Thụy Sỹ dong . Dự án hu  sang xử lý ia thải hu công suất bilan thu prong abih lac labaih 10.000 m3/ harei melam song dom bilai njuk, patom mek ia thải, jalan tathuak ia hajan. Urak ni pok jien padang ngak sang mac xử lý ia thải song dom bilai njuk dok dalam tuk vak palih ruah po thầu, tui kuhria hu peih ngak dalam quý 3 thun ni. 

# Ủy ban bhap bani tỉnh Quảng Ngãi bahrau mboh tangin phê duyệt yaom jien jaik 18 tỷ đồng dak padang huyện pulao Lý Sơn tal thun 2025.Tui nan, tỉnh Quảng Ngãi jao ka Công ty Thiên Tân ngak po đầu tư pambuak haong Công ty Nikken Sekkei Civil Engineering Ltd (Nhật Bản) padang quy hoạch huyện pulao tui jalan gam khik ramik di sản thiên nhiên daok tamo, gam pacang biến đổi khí hậu dalam harei hadei. 

#/ Jalan ngak tal thun 2020 di chiến lược negar ka bruk ba ia hacih saat palei pala lac tong abih urang di palei pala pandar ia hacih tui tanut chuẩn negar song takik di abih 60 lít sa urang dalam sa harei. Ong Lê Thiếu Sơn, Akaok pasak pakat negar ia hacih song saat môi trường palei pala brei thau. Dalam tuk vak anak tal pasak brei pasang iek, patom tame ứng dụng song salih công nghệ siam lagaih, khang kajap pabak ia hacih, xử lý ia song vệ sinh môi trường palei pala di bhum biak kan kandah, bhum njauk kan kandah kayua biến đổi khí hậu, bhum bhian gaok bala.

# Piah patrun kan kandah ka dom urang ngak amaik ame dalam bruk kuhria caga ka thun bac bahrau, tỉnh Trà Vinh daok kuhria patrun yaom tapuk giáo khoa 10% dut haong yaom darak pasar. Ini lac thun bac akaok meti Trà Vinh peih ngak sarak ưu đãi ini. Ong Lâm Văn Bạch, Akaok Công ty cổ phần Sách - Thiết bị sang bac Trà Vinh brei thau: “Piah trun yaom ka dom adei 10% dut haong darak pasar, Uỷ ban bhap bani tỉnh hu duyệt ka Công ty mesre 6 tỷ meng phun jien grap tanat yaom kaom, piah blei tapuk khik piah, piah ka yaok adei hu sa bộ tapuk. Gam haong nan công ty jeng hu panuac ka sở pato megru tacei pato dom sang bac pataom mek tapuk klaak daok pandar hu, piah tame thun bac dom adei kathaot thei thei jeng hu tapuk nao bac”.

#/ Ong Võ Hồng Khanh, Phó Giám đốc Sở Y tế tỉnh Bến Tre brei thau 6 bilan tapa, urang njom dom janih ruak njom mbak dalam tỉnh tagok glong dut song tuk vak ni thun 2015. Dalam 12 urang njom rua, hu 8 urang ruak pandiak tabiak drah. Dalam tỉnh hu 872 urang ruak pandiak tabiak drah ( dalam nan hu 1 sa urang metai di tỉnh Bến Tre). Anak bruk kan kandah di ruak, gah y tế tỉnh  BếnTre tagok bruk duah thau dom urang ruak pandiak tabiak drah, mek mẫu bệnh phẩm dut iek, samar duah mboh ruak.

# Giải súng hơi dam dara uranaih pakat negar 2016 hu peih tabiak di harei 22/6 pak sang pakacah Thể dục thể thao tỉnh Đắc Lắc, hu mbaok  130 xạ thủ di 10 tỉnh bal, ngành, dalam nan hu ralo labik khang yau: Hà Nội, Bal raya Hồ Chí Minh, Bol bala, Vĩnh Phúc…Tui điều lệ giải, dom Vận động viên pakacah meblah 40 bộ huy chương di 2 nội dung cá nhân saong đồng đội di dua nyaom umo (meng 16 thun trun saong 18 thun trun). Dom xạ thủ pakacah 2 janih súng trường hơi saong phao katut hơi cự ly 10m.

Patui di ni dom khau tin dunya:

#/ Japon caik bol lin negar ni dalam báo động piah pacang bruk Triều Tiên thử tên lửa. Hãng thông tấn Ki-ô-đô (Kyodo) di Japon ba panuac urang tabiak panuac di Mintri Quốc phòng Japon brei thau, Mintri QP Japon hu ba dom kapan khu trục song dom tên lửa pacang đạn đạo piah caga cuh tên lửa halei par mai gah negar ni.

# Phaok Tổng thư ký Liên Hợp Quốc Xtê-phen Ơ-bri-en (Stephen O'Brien), iek gah ngak pahla, brei thau ka bruk parabha 15 triệu đôla Mỹ piah daong brei chip ka bhap bani bal Pha-lu-gia (Fallujah),  Irắc. Tui ong Ơ-bri-en,  pok jien daong brei chip mbang ini piah daong ka labaih 85 ribau urang pak Pha-lu-gia klaak sang danaok di drei nao daok di labik karei piah plaih bruk mesruh gauk.

 #/ Chủ tịch gam lac Giám đốc điều hành Hãng kapan haoh negar Ai Cập, ong Sắp-oát Mu-xơ-lim (Safwat Mosallim) khan lac, bayar pok jien tạm thời  yaom 25 ribau dola Mỹ ka boh sang dom urang njauk bala di kapan haoh  MS-804.Tui ong Mu-xơ-lim, ni lac pok jien bayar tạm thời song yaom jien bayar luac di abih hu khan brei thau cambaih laih hadei di tuk ngak bruk song dom công ty bảo hiểm./.